ಮಾನವನ ಪ್ರತಿಭೆಯನ್ನು ಎಐ, ರೊಬೋ ಸರಿಗಟ್ಟಲು ಸಾಧ್ಯವಿಲ್ಲ: ಶುಭಾಂಶು ಶುಕ್ಲಾ

ಕನ್ನಡಪ್ರಭ ವಾರ್ತೆ ಬೆಂಗಳೂರು

ಮಂಗಳವಾರ ನಗರದಲ್ಲಿ ಜವಾಹರ್ ಲಾಲ್ ನೆಹರು ತಾರಾಲಯ ಮತ್ತು ವಿಜ್ಞಾನ ಮತ್ತು ತಂತ್ರಜ್ಞಾನ ಇಲಾಖೆಯಿಂದ ಆಯೋಜಿಸಿದ್ದ ವಿದ್ಯಾರ್ಥಿಗಳೊಂದಿಗಿನ ಸಂವಾದ ಕಾರ್ಯಕ್ರಮದಲ್ಲಿ, ರೊಬೋಟ್, ಎಐ ಇರುವಾಗ ಗಗನಯಾನಿ ಏಕೆ ಬಾಹ್ಯಾಕಾಶಕ್ಕೆ ಹೋಗಬೇಕು ಎಂದು ವಿದ್ಯಾರ್ಥಿಯೊಬ್ಬರು ಕೇಳಿದ ಪ್ರಶ್ನೆಗೆ ಉತ್ತರಿಸಿದ ಅವರು, ಯಾವುದೇ ಸಮಸ್ಯೆ ಎದುರಾದ ಕ್ಷಣದಲ್ಲೇ ಮನುಷ್ಯ 10 ರೀತಿಯಲ್ಲಿ ಯೋಚಿಸಿ ಪರಿಹಾರ ಕಂಡುಕೊಳ್ಳುತ್ತಾನೆ. ಆದರೆ, ರೊಬೋಟ್ ಅಥವಾ ಎಐನಿಂದ ಅದು ಸಾಧ್ಯವಿಲ್ಲ ಎಂದರು.

ಕಡಿಮೆ ವೆಚ್ಚದಲ್ಲಿ ಬಾಹ್ಯಾಕಾಶ ಯೋಜನೆ ಕೈಗೊಳ್ಳುವ ಇಸ್ರೋಗೆ ಭವಿಷ್ಯದ ಯೋಜನೆಗಳಿಗೆ ಕಡಿಮೆ ವೆಚ್ಚ ತೊಡಕಾಗುವುದೇ ಎಂಬ ಪ್ರಶ್ನೆಗೆ, ವೆಚ್ಚ ಕಡಿಮೆ ಇದ್ದರೂ ಗುಣಮಟ್ಟ ಜಾಗತಿಕಮಟ್ಟದ್ದಾಗಿದೆ. ಬಾಹ್ಯಾಕಾಶದಲ್ಲಿ ವೈದ್ಯಕೀಯ ತುರ್ತು ಪರಿಸ್ಥಿತಿ ಎದುರಿಸಲು ಬಹಳಷ್ಟು ತರಬೇತಿ ನೀಡಲಾಗುತ್ತದೆ. ಆದರೆ, ಹಲ್ಲಿನ ಚಿಕಿತ್ಸೆ ಮಾಡಲಾಗದು. ಹೀಗಾಗಿ, ನಿಮ್ಮ ಹಲ್ಲು ಉತ್ತಮವಾಗಿರಬೇಕು ಎಂದು ಶುಕ್ಲಾ ಹೇಳಿದರು.

ವಿದ್ಯಾರ್ಥಿಗಳು ಭಾರತದ ಬಾಹ್ಯಾಕಾಶ ಕೇಂದ್ರ ಸ್ಥಾಪಿಸಲು ಮತ್ತು ಚಂದ್ರನ ಮೇಲೆ ಇಳಿಯುವ ಮಹತ್ವಾಕಾಂಕ್ಷೆ ಹೊಂದಬೇಕು. 20240ರ ವೇಳೆಗೆ ಭಾರತೀಯರು ಚಂದ್ರನ ಮೇಲೆ ಇಳಿದು ವಾಪಸ್ ಭೂಮಿಗೆ ಮರಳುವ ಗುರಿ ಹೊಂದಲಾಗಿದೆ. ಚಂದ್ರನ ಮೇಲೆ ಕಾಲಿಡುವವರಲ್ಲಿ ನೀವೇ ಯಾರಾದರೂ ಒಬ್ಬರೂ ಆಗಿರಬಹುದು. ಭಾರತದ ಬಾಹ್ಯಾಕಾಶ ಭವಿಷ್ಯ ಉಜ್ವಲವಾಗಿದೆ ಎಂದು ಶುಕ್ಲಾ ಹೇಳಿದರು.