ಈ ಬಾರಿಯೂ ಬಿಬಿಎಂಪಿಯಿಂದ ಹಿಂದಿನ ಪದ್ಧತಿಯಂತೆ ಕೇಂದ್ರೀಕೃತ ಬಜೆಟ್‌ ಮಂಡನೆಗೆ ಸಿದ್ಧತೆ

| Published : Jan 23 2025, 02:01 AM IST / Updated: Jan 23 2025, 05:07 AM IST

ಈ ಬಾರಿಯೂ ಬಿಬಿಎಂಪಿಯಿಂದ ಹಿಂದಿನ ಪದ್ಧತಿಯಂತೆ ಕೇಂದ್ರೀಕೃತ ಬಜೆಟ್‌ ಮಂಡನೆಗೆ ಸಿದ್ಧತೆ
Share this Article
  • FB
  • TW
  • Linkdin
  • Email

ಸಾರಾಂಶ

ವಲಯವಾರು ಬಜೆಟ್‌ ಮಂಡಿಸುವ ಚಿಂತನೆ ಕೈಬಿಟ್ಟಿರುವ ಬಿಬಿಎಂಪಿಯು ಈ ಬಾರಿಯೂ ಹಿಂದಿನ ಪದ್ಧತಿಯಂತೆ ಕೇಂದ್ರೀಕೃತ ಬಜೆಟ್‌ ಮಂಡನೆಗೆ ಸಿದ್ಧತೆ ಮಾಡಿಕೊಳ್ಳುತ್ತಿದೆ.

 ಬೆಂಗಳೂರು : ವಲಯವಾರು ಬಜೆಟ್‌ ಮಂಡಿಸುವ ಚಿಂತನೆ ಕೈಬಿಟ್ಟಿರುವ ಬಿಬಿಎಂಪಿಯು ಈ ಬಾರಿಯೂ ಹಿಂದಿನ ಪದ್ಧತಿಯಂತೆ ಕೇಂದ್ರೀಕೃತ ಬಜೆಟ್‌ ಮಂಡನೆಗೆ ಸಿದ್ಧತೆ ಮಾಡಿಕೊಳ್ಳುತ್ತಿದೆ.

ಬಿಬಿಎಂಪಿಯ 8 ವಲಯಗಳಿಗೆ 8 ಐಎಎಸ್‌ ಅಧಿಕಾರಿಗಳನ್ನು ವಲಯ ಆಯುಕ್ತರಾಗಿ ನಿಯೋಜನೆ ಮಾಡಿ ಮುಖ್ಯ ಆಯುಕ್ತರ ಅಧಿಕಾರವನ್ನು ವಿಕೇಂದ್ರಿಕರಣ ಮಾಡಲಾಗಿದೆ. ಅದರಂತೆ ವಲಯ ಮಟ್ಟದಲ್ಲಿಯೇ ಬಿಲ್‌ ಪಾವತಿ ಸೇರಿದಂತೆ ಮೊದಲಾದ ಕಾರ್ಯಗಳಾಗುತ್ತಿವೆ. ಈ ಹಿನ್ನೆಲೆಯಲ್ಲಿ ಬಿಬಿಎಂಪಿಯು 2025-26ನೇ ಸಾಲಿನ ಬಜೆಟ್ ಅನ್ನು ವಲಯವಾರು ವಿಭಜಿಸಿ ಮಂಡಿಸುವುದಕ್ಕೆ ಚಿಂತನೆ ನಡೆಸಿತ್ತು. ಈ ಕುರಿತು ಬಿಬಿಎಂಪಿಯ ಮುಖ್ಯ ಆಯುಕ್ತರು ಹಾಗೂ ಹಣಕಾಸು ವಿಭಾಗದ ವಿಶೇಷ ಆಯುಕ್ತರು ಎಲ್ಲ ವಲಯ ಆಯುಕ್ತರಿಗೆ ಪ್ರತ್ಯೇಕವಾಗಿ ಬಜೆಟ್‌ ಬೇಡಿಕೆ ಸಲ್ಲಿಸುವುದಕ್ಕೂ ಸೂಚನೆ ನೀಡಲಾಗಿತ್ತು. ಅದರಂತೆ ಬೇಡಿಕೆಯನ್ನು ಈಗಾಗಲೇ ಸಲ್ಲಿಕೆ ಮಾಡಿದ್ದಾರೆ. ಅದನ್ನು ಪರಿಶೀಲನೆ ನಡೆಸಿರುವ ಅಧಿಕಾರಿಗಳು ವಲಯವಾರು ಬಜೆಟ್‌ ಮಂಡನೆಯಿಂದ ಎದುರಾಗುವ ಸವಾಲುಗಳು, ಅಸಮತೋಲನಗಳನ್ನು ಮನಗಂಡು ಇದೀಗ ಈ ಹಿಂದಿನ ಪದ್ಧತಿಯಂತೆಯೇ ಕೇಂದ್ರೀಕೃತ ಬಜೆಟ್‌ ಮಂಡಿಸುವುದಕ್ಕೆ ನಿರ್ಧಸಿದ್ದಾರೆ.

ಸರ್ಕಾರದ ಅನುದಾನದ ಮೇಲೆ ಗಾತ್ರ:  ಬಿಬಿಎಂಪಿಯು ರಾಜ್ಯ ಸರ್ಕಾರದ ಅನುದಾನದ ಮೇಲೆ ಹೆಚ್ಚು ಅವಲಂಭಿಸಿದೆ. ಹೀಗಾಗಿ, ರಾಜ್ಯ ಸರ್ಕಾರವು ಬಜೆಟ್‌ನಲ್ಲಿ ಬಿಬಿಎಂಪಿಗೆ ಘೋಷಿಸುವ ಅನುದಾನ ಆಧಾರದ ಮೇಲೆ ಬಿಬಿಎಂಪಿಯ ಬಜೆಟ್‌ ಗಾತ್ರ ನಿರ್ಧಾರವಾಗಲಿದೆ. ಕಳೆದ ವರ್ಷ 13 ಸಾವಿರ ಕೋಟಿ ರು. ಗಾತ್ರದ ಬಜೆಟ್‌ ಮಂಡಿಸಲಾಗಿತ್ತು. ಈ ಬಾರಿಯೂ 13 ರಿಂದ 14 ಸಾವಿರ ಕೋಟಿ ರು. ಮೊತ್ತದ ಬಜೆಟ್‌ ಮಂಡನೆಯಾಗುವ ಸಾಧ್ಯತೆ ಇದೆ ಎನ್ನಲಾಗಿದೆ.

ಸರ್ಕಾರಕ್ಕೆ ಬೇಡಿಕೆ ಸಲ್ಲಿಸಲು ಸಿದ್ಧತೆ:  ರಾಜ್ಯ ಸರ್ಕಾರವು 2025-26ನೇ ಸಾಲಿನ ಬಜೆಟ್‌ ಮಂಡನೆಗೆ ಸಿದ್ಧತೆ ನಡೆಸುತ್ತಿದೆ. ಈಗಾಗಲೇ ಸಿಎಂ ಇಲಾಖೆವಾರು ಅಧಿಕಾರಿಗಳ ಸಭೆ ಆರಂಭಿಸಿದ್ದು, ಬಿಬಿಎಂಪಿ ಅಧಿಕಾರಿಗಳೊಂದಿಗೆ ಫೆಬ್ರವರಿ ಮೊದಲ ವಾರದಲ್ಲಿ ಸಭೆ ನಡೆಸುವುದಕ್ಕೆ ದಿನಾಂಕ ನಿಗದಿಪಡಿಸಿದ್ದಾರೆ. ಈ ಹಿನ್ನೆಲೆಯಲ್ಲಿ ಈಗಾಗಲೇ ಬಿಬಿಎಂಪಿಯ ಅಧಿಕಾರಿಗಳು ಕಳೆದ ವರ್ಷದ ಸಾಧನೆ, ಅನುಷ್ಠಾನ ಹಾಗೂ ಮುಂದಿನ ಸಾಲಿಗೆ ಸರ್ಕಾರದ ಅನುದಾನಕ್ಕೆ ಬೇಡಿಕೆ ಸಲ್ಲಿಸುವುದಕ್ಕೆ ಸಂಬಂಧಿಸಿದಂತೆ ಸಿದ್ಧತೆಗಳನ್ನು ಮಾಡಿಕೊಳ್ಳುವುದಕ್ಕೆ ಆರಂಭಿಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ.