ಅಭಿಷೇಕ್‌ ಶರ್ಮಾ ಬ್ಯಾಟಿಂಗ್ ಧಮಾಕಾ: ಸಣ್ಣ ಇನ್ನಿಂಗ್ಸ್‌, ಬಿಗ್‌ ಇಂಪ್ಯಾಕ್ಟ್‌

ಅಹಮದಾಬಾದ್‌: ಈ ಬಾರಿ ಐಪಿಎಲ್‌ನಲ್ಲಿ ಹಲವು ಯುವ ಬ್ಯಾಟರ್‌ಗಳು ತಮ್ಮ ಆಟದ ಮೂಲಕ ಎಲ್ಲರ ಗಮನ ಸೆಳೆದಿದ್ದಾರೆ. ಅದರಲ್ಲೂ ಸನ್‌ರೈಸರ್ಸ್‌ ಹೈದರಾಬಾದ್‌ ಯುವ ತಾರೆ ಅಭಿಷೇಕ್‌ ಶರ್ಮಾ ತಮ್ಮ ಆಕ್ರಮಣಕಾರಿ ಶೈಲಿಯಿಂದ ಕ್ರಿಕೆಟ್‌ ಜಗತ್ತನ್ನು ಬೆರಗಾಗಿಸಿದ್ದಾರೆ.ಮೊದಲ ಎಸೆತದಿಂದಲೇ ಸ್ಫೋಟಕ ಆಟವಾಡುವ 23ರ ಅಭಿಷೇಕ್‌ ಶರ್ಮಾ ಈ ಬಾರಿ 14 ಪಂದ್ಯಗಳಲ್ಲಿ ಗಳಿಸಿದ್ದು ಬರೋಬ್ಬರಿ 470 ರನ್‌. ಆದರೆ ವಿಶೇಷತೆ ಏನೆಂದರೆ ಅವರು 14ರಲ್ಲಿ ಒಂದು ಪಂದ್ಯದಲ್ಲೂ 30+ ಎಸೆತಗಳನ್ನು ಎದುರಿಸಿಲ್ಲ. ವಿಶ್ವದ ಯಾವುದೇ ಟಿ20 ಲೀಗ್‌ನಲ್ಲಿ ಒಂದು ಇನ್ನಿಂಗ್ಸ್‌ನಲ್ಲೂ 30+ ಎಸೆತ ಎದುರಿಸದೆ 400+ ರನ್‌ ಗಳಿಸಿದ ಮೊದಲ ಬ್ಯಾಟರ್‌ ಎಂಬ ಹೆಗ್ಗಳಿಗೆ ಅಭಿಷೇಕ್‌ ಶರ್ಮಾ ಅವರದ್ದು.ಈ ಬಾರಿ 207.04ರ ಸ್ಟ್ರೈಕ್‌ರೇಟ್‌ನಲ್ಲಿ ಬ್ಯಾಟ್‌ ಬೀಸಿರುವ ಅವರು, 8 ಪಂದ್ಯಗಳಲ್ಲಿ 30+, 3 ಪಂದ್ಯಗಳಲ್ಲಿ 60+ ರನ್‌ ಕಲೆಹಾಕಿದ್ದಾರೆ. ಮಂಗಳವಾರ ಕೆಕೆಆರ್‌ ವಿರುದ್ಧ ಕ್ವಾಲಿಫೈಯರ್‌ ಪಂದ್ಯದಲ್ಲಿ 3 ರನ್‌ ಗಳಿಸಿದ್ದು ಬಿಟ್ಟರೆ ಉಳಿದ 13 ಇನ್ನಿಂಗ್ಸ್‌ಗಳಲ್ಲೂ ಎರಡಂಕಿ ಮೊತ್ತ ದಾಖಲಿಸಿದ್ದಾರೆ. ಸಣ್ಣ ಇನ್ನಿಂಗ್ಸ್‌ ಆದರೂ ದೊಡ್ಡ ಇಂಪ್ಯಾಕ್ಟ್‌ ಮೂಲಕ ಹೈದರಾಬಾದನ್ನು ನಾಕೌಟ್‌ಗೇರಿಸುವಲ್ಲಿ ಅಭಿಷೇಕ್‌ ಶರ್ಮಾ ಅವರ ಪಾತ್ರ ಪ್ರಮುಖವಾದದ್ದು.