ಚೆನ್ನೈ ಕಿಂಗ್ಸ್‌ ತೆಕ್ಕೆಗೆ ಸಿಕ್ಸರ್‌ ಸರದಾರ ರಿಜ್ವಿ!

ನವದೆಹಲಿ: ಪ್ರತಿ ಬಾರಿಯಂತೆ ಈ ಬಾರಿಯೂ ಐಪಿಎಲ್‌ ಯುವ ಪ್ರತಿಭೆಗಳನ್ನು ಕ್ರೀಡಾ ಜಗತ್ತಿಗೆ ಪರಿಚಯಿಸಲು ಸಜ್ಜಾಗಿದೆ. ದೇಸಿ ಟೂರ್ನಿಗಳಲ್ಲಿ ಅಬ್ಬರಿಸಿ, ಫ್ರಾಂಚೈಸಿಗಳ ಗಮನ ಸೆಳೆದು ಹರಾಜಿನಲ್ಲಿ ದೊಡ್ಡ ಮೊತ್ತಕ್ಕೆ ಹರಾಜಾಗಿರುವ ಹಲವು ಪ್ರತಿಭೆಗಳಿದ್ದು, ಇವರಲ್ಲಿ ಉತ್ತರ ಪ್ರದೇಶ ಸಮೀರ್‌ ರಿಜ್ವಿ ಕೂಡಾ ಒಬ್ಬರು.ಮಂಗಳವಾರ ಹರಾಜಿನಲ್ಲಿ ಸಮೀರ್‌ಗೆ ಚೆನ್ನೈ ತಂಡ ಬರೋಬ್ಬರಿ ₹8.4 ಕೋಟಿ ನೀಡಿ ತಂಡಕ್ಕೆ ಸೇರಿಸಿಕೊಂಡಿದೆ. 20 ವರ್ಷದ ಸಮೀರ್‌ ಈ ವರೆಗೂ ವಿವಿಧ ಟೂರ್ನಿಗಳಲ್ಲಿ ಅಬ್ಬರಿಸಿದ್ದು, ಐಪಿಎಲ್‌ನಲ್ಲೂ ತಮ್ಮ ಛಾಪು ಮೂಡಿಸುವ ನಿರೀಕ್ಷೆಯಲ್ಲಿದ್ದಾರೆ.ಯುಪಿ ಟಿ20 ಲೀಗ್‌ನಲ್ಲಿ ಕಾನ್ಪುರ ಸೂಪರ್‌ ಸ್ಟಾರ್ಸ್‌ ಪರ ಆಡಿರುವ ಸಮೀರ್‌ ಟೂರ್ನಿಯಲ್ಲಿ 9 ಪಂದ್ಯಗಳಲ್ಲಿ 455 ರನ್‌ ಕಲೆಹಾಕಿದ್ದಾರೆ. ಅದರಲ್ಲಿ 47 ಎಸೆತಗಳಲ್ಲಿ ಸಿಡಿಸಿದ ಸ್ಫೋಟಕ ಶತಕ ಕೂಡಾ ಒಳಗೊಂಡಿದೆ. ಟೂರ್ನಿಯಲ್ಲಿ ಅವರ ಸ್ಟ್ರೈಕ್‌ರೇಟ್‌ 188.80. ಇನ್ನು, ರಾಜ್ಯದ ಅಂಡರ್‌-23 ಟೂರ್ನಿಯಲ್ಲಿ ಅವರು 7 ಪಂದ್ಯಗಳಲ್ಲಿ 454 ರನ್‌ ಸಿಡಿಸಿದ್ದಾರೆ. ಎಲ್ಲಕ್ಕಿಂತ ಮುಖ್ಯವಾಗಿ ಸಮೀರ್‌ ಸಿಕ್ಸರ್‌ ಸಿಡಿಸುವುದರಲ್ಲಿ ಎತ್ತಿದ ಕೈ. ಅವರು ಈ 2 ಟೂರ್ನಿಗಳಲ್ಲಿ 16 ಪಂದ್ಯಗಳಲ್ಲಿ 72 ಸಿಕ್ಸರ್‌ ಸಿಡಿಸಿದ್ದಾರೆ. ಇನ್ನು, ಮುಷ್ತಾಕ್‌ ಅಲಿ ಟಿ20 ಟೂರ್ನಿಯಲ್ಲೂ ಸಮೀರ್‌ ಅಬ್ಬರಿಸಿದ್ದು, 18 ಸಿಕ್ಸರ್‌ಗಳೊಂದಿಗೆ ಅಗ್ರ-10 ಸಿಕ್ಸರ್‌ ಸರದಾರರ ಪಟ್ಟಿಯಲ್ಲಿ ಸ್ಥಾನ ಪಡೆದಿದ್ದಾರೆ. ಅವರು ಪ್ರತಿ 11 ಎಸೆತಕ್ಕೆ 1 ಸಿಕ್ಸರ್‌ ಬಾರಿಸಿದ್ದಾರೆ ಎನ್ನುವುದು ಗಮನಾರ್ಹ ಸಂಗತಿ.ಟ್ರಯಲ್ಸ್‌ಗೆ ಗೈರು: ಹರಾಜಿಗೂ ಮುನ್ನ ಸಮೀರ್‌ರನ್ನು ಪಂಜಾಬ್‌ ಕಿಂಗ್ಸ್‌ 3 ಐಪಿಎಲ್‌ ಫ್ರಾಂಚೈಸಿಗಳು ಟ್ರಯಲ್ಸ್‌ಗೆ ಆಹ್ವಾನಿಸಿದ್ದವು. ಆದರೆ ಅಂಡರ್‌-23 ಟೂರ್ನಿಯ ಕಾರಣಕ್ಕೆ ಅವರು ಕೆಲ ತಂಡಗಳ ಟ್ರಯಲ್ಸ್‌ಗೆ ಗೈರಾಗಿದ್ದರು.

ಜೂ. ಧೋನಿ ಖ್ಯಾತಿಯ

ಜಾರ್ಖಂಡ್‌ನ ಯುವ ತಾರೆ ಕುಮಾರ್‌ ಕುಶಾಗ್ರ ಹರಾಜಿನಲ್ಲಿ ಗಮನ ಸೆಳೆದ ಮತ್ತೋರ್ವ ಬ್ಯಾಟರ್‌. ಅವರನ್ನು ಡೆಲ್ಲಿ ತಂಡ ₹7.2 ಕೋಟಿ ನೀಡಿ ತನ್ನದಾಗಿಸಿಕೊಂಡಿದೆ. ಈಗಾಗಲೇ ಭಾರತ ‘ಎ’ ತಂಡದ ಪರ ಮಿಂಚಿರುವ ಕುಶಾಗ್ರ ಅವರನನ್ನು ಜೂನಿಯರ್‌ ಧೋನಿ ಖ್ಯಾತಿಗೆ ಒಳಗಾದ ಬ್ಯಾಟರ್‌. ಭಾರತದ ಮಾಜಿ ನಾಯಕ ಸೌರವ್‌ ಗಂಗೂಲಿಯೇ ಕುಶಾಗ್ರರನ್ನು ಧೋನಿಗೆ ಹೋಲಿಸಿದ್ದು ವಿಶೇಷ. ಅವರು 2022ರಲ್ಲಿ ಜಾರ್ಖಂಡ್‌ ಪರ ಮೊದಲ ಪ್ರಥಮ ದರ್ಜೆ ಪಂದ್ಯವಾಡಿದ್ದು, ಭಾರತದ ಅಂಡರ್-19 ತಂಡದಲ್ಲೂ ಮಿಂಚಿದ್ದಾರೆ. ಈ ವರೆಗೆ 23 ಲಿಸ್ಟ್ ಎ ಪಂದ್ಯಗಳಲ್ಲಿ 700 ರನ್ ಗಳಿಸಿದ್ದಾರೆ. ಇದರಲ್ಲಿ 7 ಅರ್ಧಶತಕಗಳೂ ಒಳಗೊಂಡಿವೆ. ಜೊತೆಗೆ 13 ಪ್ರಥಮ ದರ್ಜೆ ಪಂದ್ಯಗಳಲ್ಲಿ 868 ರನ್ ಗಳಿಸಿದ್ದು, ಐಪಿಎಲ್‌ನಲ್ಲೂ ಅಬ್ಬರಿಸಲು ಕಾಯುತ್ತಿದ್ದಾರೆ.