ಧೋನಿ ಹ್ಯಾಟ್ರಿಕ್‌ ಸಿಕ್ಸರ್‌ಗೆ ಹುಚ್ಚೆದ್ದು ಕುಣಿದ ಫ್ಯಾನ್ಸ್‌!

ಮುಂಬೈ: ತಮ್ಮ ಬಲಿಷ್ಠ ಸಿಕ್ಸರ್‌ಗಳ ಮೂಲಕವೇ ಅಭಿಮಾನಿಗಳ ಮನರಂಜಿಸುವ ಮಹೇಂದ್ರ ಸಿಂಗ್‌ ಧೋನಿ ಭಾನುವಾರ ಮುಂಬೈ ಇಂಡಿಯನ್ಸ್‌ ವಿರುದ್ಧದ ಪಂದ್ಯದಲ್ಲೂ ಅಭಿಮಾನಿಗಳನ್ನು ಹುಚ್ಚೆದ್ದು ಕುಣಿಯುವಂತೆ ಮಾಡಿದ್ದಾರೆ. 

ಚೆನ್ನೈ ಇನ್ನಿಂಗ್ಸ್‌ನ ಕೊನೆ 4 ಎಸೆತಗಳು ಬಾಕಿ ಇರುವಾಗ ಕ್ರೀಸ್‌ಗೆ ಆಗಮಿಸಿದ ಧೋನಿ, ಹಾರ್ದಿಕ್‌ ಪಾಂಡ್ಯ ಅವರ ಮೊದಲ 3 ಎಸೆತಗಳನ್ನು ಸಿಕ್ಸರ್‌ಗೆ ಅಟ್ಟಿದರು. ಈ ಮೂಲಕ ತಮ್ಮಲ್ಲಿ ಇನ್ನೂ ಆಟ ಬಾಕಿಯಿದೆ ಎಂದು 42ರ ಧೋನಿ ತೋರಿಸಿಕೊಟ್ಟರು. ಧೋನಿ ಆಟವನ್ನು ಕಣ್ತುಂಬಿಕೊಳ್ಳಲು ಕಾಯುತ್ತಿದ್ದ ಅಪಾರ ಪ್ರಮಾಣದ ಅಭಿಮಾನಿಗಳ ಹರ್ಷೋದ್ಗಾರ ಮುಗಿಲು ಮುಟ್ಟಿತ್ತು. 

ಪಂದ್ಯದುದ್ದಕ್ಕೂ ಧೋನಿ...ಧೋನಿ...ಘೋಷಣೆಗಳೇ ಹೆಚ್ಚಾಗಿ ಮೊಳಗಿದವು.ಧೋನಿ ಮುಂಬೈ ವಿರುದ್ಧದ 3 ಸಿಕ್ಸರ್ ಸೇರಿ ಕೊನೆ ಓವರ್​ನಲ್ಲಿ ಐಪಿಎಲ್ ಇತಿಹಾಸದಲ್ಲಿ ಅವರು ಸಿಡಿಸಿದ ಸಿಕ್ಸರ್​ಗಳ ಸಂಖ್ಯೆ 64ಕ್ಕೆ ಏರಿಕೆಯಾಗಿದೆ. ಐಪಿಎಲ್​ ಇತಿಹಾಸಲ್ಲಿ 20ನೇ ಓವರ್​ನಲ್ಲಿ ಧೋನಿ ಅವರು 309 ಎಸೆತಗಳನ್ನು ಎದುರಿಸಿದ್ದು, ಅತಿ ಹೆಚ್ಚು ಸಿಕ್ಸರ್ ಸಿಡಿಸದ ಬ್ಯಾಟರ್‌ಗಳ ಪಟ್ಟಿಯಲ್ಲಿ ತಮ್ಮ ಅಗ್ರಸ್ಥಾನವನ್ನು ಕಾಯ್ದುಕೊಂಡಿದ್ದಾರೆ.

500 ಸಿಕ್ಸರ್‌ ಕ್ಲಬ್‌ಗೆ ರೋಹಿತ್‌

ರೋಹಿತ್‌ ಟಿ20 ಕ್ರಿಕೆಟ್‌ನಲ್ಲಿ 500 ಸಿಕ್ಸರ್‌ ಸಿಡಿಸಿದವ ಕ್ಲಬ್‌ ಸೇರ್ಪಡೆಗೊಂಡರು. ಅವರು ಈ ಸಾಧನೆ ಮಾಡಿದ 5ನೇ ಬ್ಯಾಟರ್‌. ವಿಂಡೀಸ್‌ನ ಕ್ರಿಸ್‌ ಗೇಲ್‌ 1056, ಪೊಲ್ಲಾರ್ಡ್‌ 860, ರಸೆಲ್‌ 678, ಕಿವೀಸ್‌ನ ಕಾಲಿನ್ ಮನ್ರೋ 548 ಸಿಕ್ಸರ್‌ ಸಿಡಿಸಿದ್ದಾರೆ.