ಇಂದು ಅಮೆರಿಕ ಚುನಾವಣೆ: ಸಮೀಕ್ಷೇಲಿ ಟ್ರಂಪ್‌ ಮುನ್ನಡೆ

ವಾಷಿಂಗ್ಟನ್‌: ಅಮೆರಿಕ ಅಧ್ಯಕ್ಷೀಯ ಚುನಾವಣೆ ಮಂಗಳವಾರ ನಡೆಯಲಿದ್ದು, ರಿಪಬ್ಲಿಕನ್‌ ಪಾರ್ಟಿ ನಾಯಕ ಡೊನಾಲ್ಡ್‌ ಟ್ರಂಪ್‌ ಗೆಲ್ಲುತ್ತಾರಾ ಅಥವಾ ಭಾರತೀಯ ಮೂಲದವರಾದ ಡೆಮಾಕ್ರೆಟಿಕ್‌ ಪಾರ್ಟಿ ಅಭ್ಯರ್ಥಿ ಕಮಲಾ ಹ್ಯಾರಿಸ್ ಗೆಲ್ಲುತ್ತಾರಾ ಎಂಬುದು ನಿರ್ಧಾರವಾಗಲಿದೆ.

ಒಂದು ವೇಳೆ ಸಮೀಕ್ಷೆ ತಲೆಕೆಳಗಾಗಿ ಕಮಲಾ ಗೆದ್ದರೆ ಅಧ್ಯಕ್ಷ ಪದವಿ ಪಡೆದ ಮೊದಲ ಭಾರತೀಯೆ ಎಂಬ ಖ್ಯಾತಿ ಪಡೆಯಲಿದ್ದರೆ, ಟ್ರಂಪ್‌ ಗೆದ್ದರೆ 2ನೇ ಬಾರಿ ಅಧ್ಯಕ್ಷ ಆದ ಸಾಧನೆ ಮಾಡಲಿದ್ದಾರೆ. ಆದರೆ ಇದು ಇವಿಎಂ ಬದಲು ಮತಪತ್ರದ ಮೂಲಕ ನಡೆಯುವ ಚುನಾವಣೆ ಆಗಿರುವ ಕಾರಣ ಅಂತಿಮ ಫಲಿತಾಂಶ ಪ್ರಕಟಕ್ಕೆ ಕೆಲವು ದಿನ ಹಿಡಿಯಬಹುದಾಗಿದೆ.50 ರಾಜ್ಯಗಳಲ್ಲಿ 24 ಕೋಟಿ ಮತದಾರರು ಮತದಾನಕ್ಕೆ ಅರ್ಹರಾಗಿದ್ದು, ಈಗಾಗಲೇ ಇ-ಮೇಲ್‌ ಮೂಲಕ ಕೋಟ್ಯಂತರ ಜನ ಮತ ಚಲಾಯಿಸಿದ್ದಾರೆ. ಮತದಾನಕ್ಕೆ ಮಂಗಳವಾರ ತೆರೆ ಬೀಳಲಿದೆ. ಇವರು ಆಯ್ಕೆ ಮಾಡುವ 538 ಜನಪ್ರತಿನಿಧಿಗಳು (ಎಲೆಕ್ಟೋರಲ್‌ ಕಾಲೇಜ್‌) ಅಧ್ಯಕ್ಷರ ಆಯ್ಕೆಯಲ್ಲಿ ನಿರ್ಣಾಯಕ ಪಾತ್ರ ವಹಿಸಲಿದ್ದಾರೆ. 270 ಜನಪ್ರತಿನಿಧಿಗಳ ಬೆಂಬಲ ಪಡೆದವರು ಅಧ್ಯಕ್ಷರಾಗಿ ಆಯ್ಕೆ ಆಗಲಿದ್ದಾರೆ.50ರಲ್ಲಿ 7 ರಾಜ್ಯಗಳು ಬಹುಪಾಲು ಕ್ಷೇತ್ರಗಳನ್ನು ಹೊಂದಿದ್ದು ಅಧ್ಯಕ್ಷರ ಆಯ್ಕೆಯಲ್ಲಿ ಪ್ರಮುಖ ಪಾತ್ರ ವಹಿಸಲಿವೆ. ಇದರಲ್ಲಿ ಪೆನ್ಸಿಲ್ವೇನಿಯಾ ಹಾಗೂ ಒಹಾಯೋದಲ್ಲಿ ಗೆದ್ದವರಿಗೆ ಅಧ್ಯಕ್ಷ ಪಟ್ಟ ಖಚಿತ ಎಂಬ ನಂಬಿಕೆ ಇದೆ. ಏಕೆಂದರೆ ಇದುವರೆಗೂ ಒಂದು ಬಾರಿ ಬಿಟ್ಟರೆ ಉಳಿದೆಲ್ಲ ಚುನಾವಣೆಗಳಲ್ಲೂ ಒಹಾಯೋದಲ್ಲಿ ಮುನ್ನಡೆ ಸಾಧಿಸಿದವರಿಗೇ ಅಧ್ಯಕ್ಷ ಪಟ್ಟ ಸಿಕ್ಕಿದೆ. ಪೆನ್ಸಿಲ್ವೇನಿಯಾದಲ್ಲಿ 1948ರ ನಂತರ ಗೆದ್ದವರೆಲ್ಲ ಅಧ್ಯಕ್ಷರಾಗಿದ್ದಾರೆ.

ಮತದಾನ ಮುಗಿದ 12 ತಾಸಿನೊಳಗೆ ಮುಂದಿನ ಅಧ್ಯಕ್ಷರಾರು ಎಂಬುದು ಸ್ಪಷ್ಟವಾಗತೊಡಗುತ್ತದೆ. ಕಳೆದ ಸಲ ಸ್ಪಷ್ಟವಾಗಲು 4 ದಿನ ಹಿಡಿದಿತ್ತು. ಏಕೆಂದರೆ ಆದರೆ ಇದು ಬ್ಯಾಲೆಟ್‌ ಬಾಕ್ಸ್‌ ನಲ್ಲಿ ನಡೆಯುವ ಮತದಾನವಾದ ಕಾರಣ ಮತ ಎಣಿಕೆ ಪೂರ್ಣಗೊಂಡು ಅಂತಿಮ ಫಲಿತಾಂಶ ಪ್ರಕಟವಾಗಲು ವಾರಗಟ್ಟಲೇ ಸಮಯ ಹಿಡಿಯಬಹುದಾಗಿದೆ. ಅಲ್ಲದೆ, ಮರು ಎಣಿಕೆಗಳೂ ಅನೇಕ ಕಡೆ ನಡೆಯುತ್ತವೆ. ಹೀಗಾಗಿ ಎಣಿಕೆ ಪೂರ್ಣಗೊಳಿಸಲು ಡಿ.10ರ ಗಡುವು ವಿಧಿಸಲಾಗಿದೆ.

ಅಂತಿಮ ಫಲಿತಾಂಶ ಪ್ರಕಟಣೆ ಬಳಿಕ ಆಯ್ಕೆ ಆಗುವ ಅಭ್ಯರ್ಥಿ, ಜನವರಿಯಲ್ಲಿ ಅಧ್ಯಕ್ಷರಾಗಿ ಪ್ರಮಾಣವಚನ ಸ್ವೀಕರಿಸಲಿದ್ದಾರೆ.

2016ರಲ್ಲಿ ‘ಗೆದ್ದರೂ’ ಸೋತಿದ್ದ ಹಿಲರಿ!

2016ರಲ್ಲಿ ಡೆಮೋಕ್ರಾಟ್ ಹಿಲರಿ ಕ್ಲಿಂಟನ್ ಅವರು, ಟ್ರಂಪ್ ಅವರಿಗಿಂತ ಸುಮಾರು 30 ಲಕ್ಷ ಹೆಚ್ಚು ಮತ ಪಡೆದಿದ್ದರು. ಆದರೆ ಅವರು ಎಲೆಕ್ಟೋರಲ್‌ ಕಾಲೇಜಲ್ಲಿ ಅವರ ಪರ ಆಯ್ಕೆ ಆಗಿದ್ದು 227 ಪ್ರತಿನಿಧಿಗಳು ಮಾತ್ರ. ರಿಪಬ್ಲಿಕನ್‌ ಅಭ್ಯರ್ಥಿ ಡೊನಾಲ್ಡ್‌ ಟ್ರಂಪ್‌ ಪರ 306 ಪ್ರತಿನಿಧಿಗಳು ಗೆದ್ದಿದ್ದರು. ಹೀಗಾಗಿ ಬಹುಮತದ 270ರ ಅಂಕಿ ದಾಟಿದ್ದ ಟ್ರಂಪ್‌ ಅಧ್ಯಕ್ಷರಾದರು.