ಬೆಂಬಲ ಬೆಲೆಗೆ ರಾಗಿ ಮಾರಾಟ: ಆರಂಭದಲ್ಲೇ ವಿಘ್ನ

ಕನ್ನಡಪ್ರಭ ವಾರ್ತೆ ಬಂಗಾರಪೇಟೆ

೬ ಲಕ್ಷ ಮೆಟ್ರಿಕ್ ಟನ್ ರಾಗಿ ಖರೀದಿ ಗುರಿ

ಸರಕಾರ ಅ.೧ ರಿಂದ ಡಿ.೨೧ರವರೆಗೂ ರಾಗಿ ಮಾರಾಟಕ್ಕೆ ರೈತರಿಗೆ ನೋಂದಣಿ ಮಾಡಿಸಿಕೊಳ್ಳಲು ಅವಕಾಶ ನೀಡಿದೆ. ಈ ಹಿಂದೆ ಪ್ರತಿ ಎಕರೆಗೆ ೧೦ ಕ್ವಿಂಟಾಲ್‌ನಂತೆ ಗರಿಷ್ಟ ೨೦ ಕ್ವಿಂಟಾಲ್‌ ವರೆಗೂ ಒಬ್ಬ ರೈತ ರಾಗಿ ಮಾರಾಟ ಮಾಡಲು ಅವಕಾಶ ಕಲ್ಪಿಸಿತ್ತು. ಆದರೆ ಈ ವರ್ಷ ೫೦ ಕ್ವಿಂಟಾಲ್‌ವರೆಗೂ ಅವಕಾಶ ನೀಡಿರುವುದರಿಂದ ದೊಡ್ಡ ರೈತರಿಗೆ ಶುಕ್ರದೆಸೆ ಬಂದಂತಾಗಿದೆ.

ಇನ್ನೂ ನೋಂದಾಯಿಸಿದ ರೈತರಿಂದ ರಾಗಿ ಖರೀದಿಗೆ ೨೦೨೬ರ ಜ.೧ ರಿಂದ ಮಾ.೩೧ ರತನಕ ಅವಧಿ ನಿಗದಿ ಮಾಡಲಾಗಿರುವ ಕಾರಣ ರೈತರು ಖರೀದಿ ಕೇಂದ್ರಗಳತ್ತ ನೋಂದಾಯಿಸಲು ಮುಖ ಮಾಡಿದ್ದಾರೆ. ಆದರೆ ನೋಂದಣಿ ಮಾಡಿಕೊಳ್ಳಲು ಬರುತ್ತಿರುವ ರೈತರಿಗೆ ವಿವಿಧ ಸಮಸ್ಯೆಗಳು ಕಾಡಲಾರಂಭಿಸಿದ್ದು, ಪರಿಹಾರ ಕಂಡುಕೊಳ್ಳಲು ಕಚೇರಿಗಳಿಗೆ ಅಲೆದಾಡುವ ಪರಿಸ್ಥಿತಿ ಎದುರಾಗಿದೆ.

ಖರೀದಿಯಲ್ಲಿ ಪಾರದರ್ಶಕತೆ ಕಾಪಾಡಲು ರೈತರಿಗೆ ಬಯೋಮೆಟ್ರಿಕ್ ಕಡ್ಡಾಯ ಮಾಡಲಾಗಿದೆ. ನೋಂದಣಿ ಮಾಡಿಸಲು ಬರುತ್ತಿರುವ ಹಲವು ರೈತರಿಗೆ ಬಯೋಮೆಟ್ರಿಕ್ ತೆಗೆದುಕೊಳ್ಳುತ್ತಿಲ್ಲ. ನ್ಯಾಯಬೆಲೆ ಅಂಗಡಿಯಲ್ಲಿ ಪಡಿತರ ಪಡೆಯಲು ಕುಟುಂಬದ ಮುಖ್ಯಸ್ಥರ ಬಯೋಮೆಟ್ರಿಕ್ ತೆಗೆದುಕೊಂಡಿಲ್ಲ ಎಂದರೆ ಕುಟುಂಬದಲ್ಲಿ ಯಾರಾದರೂ ಬಂದು ಬಯೋಮೆಟ್ರಿಕ್ ನೀಡಿ ಪಡಿತರ ಪಡೆಯಬಹುದು. ಆದರೆ ರಾಗಿ ಮಾರಾಟಕ್ಕೆ ಪಹಣಿಯಲ್ಲಿ ನಮೂದಿಸಲ್ಪಟ್ಟಿರುವ ರೈತ ಮಾತ್ರ ಬಯೋಮೆಟ್ರಿಕ್ ನೀಡಬೇಕಿರುವ ಕಾರಣ ವಯಸ್ಸಾದ ಹಾಗೂ ಇನ್ನಿತರರು ಬಯೋಮೆಟ್ರಿಕ್ ಸ್ವೀಕಾರ ಆಗುತ್ತಿಲ್ಲ. ಇದರಿಂದ ರಾಗಿ ನೋಂದಣಿ ಮಾಡಿಸಲು ರೈತರು ಪರದಾಡುವಂತಾಗಿದೆ.

ಎಲ್ಲ ಸರಿ ಇದ್ದು, ನೊಂದಣಿ ಮಾಡಿಸಲು ಬರುವಂತಹ ರೈತರಿಗೆ ಮತ್ತೊಂದು ಸಮಸ್ಯೆ ಎದುರಾಗಿದ್ದು, ರೈತರು ತಮ್ಮ ಜಮೀನಿನಲ್ಲಿ ರಾಗಿ ಬೆಳೆ ಬೆಳೆದಿದ್ದರೂ ಫೂಟ್ ತಂತ್ರಾಂಶದಲ್ಲಿ ರಾಗಿ ಬೆಳೆ ಕಾಣಿಸದ ಪರಿಣಾಮ ನೋಂದಣಿ ಮಾಡಿಸಲು ಸಾಧ್ಯವಾಗುತ್ತಿಲ್ಲ. ಬೆಳೆ ಸಮೀಕ್ಷೆ ಸಂದರ್ಭದಲ್ಲಿ ಸಮೀಕ್ಷೆದಾರ ಜಮೀನಿನಲ್ಲಿ ಇರುವ ರಾಗಿ ಬೆಳೆ ಬದಲಾಗಿ ಬೇರೊಂದು ಬೆಳೆ ಅಥವಾ ಬೆಳೆ ಇಲ್ಲವೆಂದು ನಮೂದು ಮಾಡಿರುವುದರಿಂದ ರೈತರಿಗೆ ಸಮಸ್ಯೆ ಬಿಗಡಾಯಿಸಿದೆ. ಇದರಿಂದಾಗಿ ಸಮಸ್ಯೆಗೆ ಪರಿಹಾರ ಕಂಡುಕೊಂಡು ರಾಗಿ ಮಾರಾಟಕ್ಕೆ ರೈತರು ಕೃಷಿ ಮತ್ತು ಕಂದಾಯ ಇಲಾಖೆಗಳಿಗೆ ಸುತ್ತಾಡುವಂತಹ ಪ್ರಮೇಯ ಎದುರಾಗಿದೆ.