ಭದ್ರಾ ನೀರು ಹರಿಸೋ ಯೋಜನೆ ಕೈಬಿಡಿ: ಹರೀಶ್‌

- ಚಿಕ್ಕಮಗಳೂರು, ತರೀಕೆರೆ, ಹೊಸದುರ್ಗಕ್ಕೆ ನೀರು ಪೂರೈಕೆಗೆ ಆಕ್ಷೇಪ । ಭದ್ರಾ ಬಲದಂಡೆ ನಾಲೆ ಸೀಳಾದರೆ ರೈತರಿಗೆ ಅನ್ಯಾಯ - - -

ದಾವಣಗೆರೆ ಜಿಲ್ಲೆಯ ಜೀವನಾಡಿ ಭದ್ರಾ ಬಲದಂಡೆ ನಾಲೆಯನ್ನೇ ಸೀಳಿ ಚಿಕ್ಕಮಗಳೂರು, ತರೀಕೆರೆ, ಹೊಸದುರ್ಗಕ್ಕೆ ಕುಡಿಯುವ ಉದ್ದೇಶಕ್ಕೆ 30 ಕ್ಯುಸೆಕ್ ನೀರು ಹರಿಸುವ ಯೋಜನೆಯನ್ನು ತಕ್ಷಣ‍ವೇ ರಾಜ್ಯ ಸರ್ಕಾರ ಕೈಬಿಡಬೇಕು ಎಂದು ಹರಿಹರದ ಬಿಜೆಪಿ ಶಾಸಕ ಬಿ.ಪಿ. ಹರೀಶ ಒತ್ತಾಯಿಸಿದರು.

ವಾಸ್ತವವಾಗಿ ಭದ್ರಾ ನಾಲೆ ವ್ಯಾಪ್ತಿಯ ಶಾಸಕರ ಸಭೆ ಕರೆದು, ಅಭಿಪ್ರಾಯ ಕೇಳಬೇಕಾಗಿತ್ತು. ಆದರೆ, ಸರ್ಕಾರ ಮತ್ತು ನೀರಾವರಿ ಇಲಾಖೆ ಅಧಿಕಾರಿಗಳು ಗುಪ್ತವಾಗಿ ಸಕಲ ಕಾರ್ಯ ನಡೆಸಿದೆ. ಭದ್ರಾ ಡ್ಯಾಂನ ಬಫರ್ ಝೋನ್‌ನಲ್ಲೇ ಭದ್ರಾ ಬಲದಂಡೆ ನಾಲೆಯನ್ನೇ ಸೀಳುವ ಕೆಲಸಕ್ಕೆ ಕೈಹಾಕಿದ್ದಾರೆ ಎಂದು ಅವರು ದೂರಿದರು.

ಈಗಾಗಲೇ ಶೇ.40ರಷ್ಟು ಅಚ್ಚುಕಟ್ಟು ಪ್ರದೇಶ ಕಳೆದುಕೊಂಡ ರೈತರು ಕ್ರಮೇಣ ಹರಪನಹಳ್ಳಿ, ದಾವಣಗೆರೆ, ಹರಿಹರ ತಾಲೂಕಿನ ಜಮೀನುಗಳಿಗೆ ಭದ್ರಾ ನೀರು ಕಣ್ಣೀರಾಗುವುದರಲ್ಲಿ ಯಾವುದೇ ಅನುಮಾನವೂ ಇಲ್ಲ. ಯಾವುದೇ ಕಾರಣಕ್ಕೂ ಭದ್ರಾ ನಾಲೆ ನೀರು ಒಯ್ಯಲು ನಾವು ಬಿಡುವುದಿಲ್ಲ. ಭದ್ರಾವತಿ ಭಾಗದ ರೈತರಿಂದ ಬಂದ ಮಾಹಿತಿ ಆಧರಿಸಿ, ಈ ವಿಷಯ ಎಲ್ಲ ರೈತರಿಗೆ ತಲುಪಿಸುವ ಕೆಲಸ ಮಾಡಲಾಗುತ್ತಿದೆ. ರೈತರು ಸಭೆ ನಡೆಯುವ ಸ್ಥಳಕ್ಕೆ ಹೆಚ್ಚಿನ ಸಂಖ್ಯೆಯಲ್ಲಿ ಪಾಲ್ಗೊಂಡು, ತಮ್ಮ ನಿಲುವು ಸ್ಪಷ್ಟಪಡಿಸಬೇಕು ಎಂದು ತಿಳಿಸಿದರು.

ಬಿಜೆಪಿ ನಿಕಟ ಪೂರ್ವ ಜಿಲ್ಲಾಧ್ಯಕ್ಷ ಎಸ್.ಎಂ.ವೀರೇಶ ಹನಗವಾಡಿ, ಹರಿಹರ ಗ್ರಾಮಾಂತರ ಬಿಜೆಪಿ ಅಧ್ಯಕ್ಷ ಲಿಂಗರಾಜ ಇತರರು ಇದ್ದರು.

(ಕೋಟ್‌ ) 2020ರಲ್ಲಿ ಸರ್ಕಾರ ಮಾಡಿದ್ದ ಇಂತಹ ನಿರ್ಧಾರದಿಂದ ಇಂದು ನಮ್ಮ ರೈತರಿಗೆ ತೊಂದರೆಯಾಗುತ್ತಿದೆ. ಸರ್ಕಾರದ ಇಂತಹ ನಿರ್ಧಾರ ರೈತ ವಿರೋಧಿಯಾಗಿದೆ. ಬಲದಂಡೆ ನಾಲೆ ಬಳಿಯೇ ಇಂತಹ ಕಾಮಗಾರಿ ಕೈಗೊಂಡಿದ್ದರಿಂದ ಭದ್ರಾ ಡ್ಯಾಂಗೂ ಅಪಾಯವಾಗಲಿದೆ. ತಕ್ಷಣ‍ವೇ ಈ ಕಾಮಗಾರಿ ಕೈಬಿಡಬೇಕು.

- - -

ಭದ್ರಾ ಅಚ್ಚುಕಟ್ಟು ರೈತರ ಮನವಿಗೆ ರಾಜ್ಯ ಸರ್ಕಾರ ಸ್ಪಂದಿಸದಿದ್ದರೆ ದಾವಣಗೆರೆ ಬಂದ್‌ಗೆ ಕರೆ ನೀಡಲಾಗುವುದು. ಯಾವುದೇ ಕಾರಣಕ್ಕೂ ಬಲದಂಡೆ ಭಾಗಕ್ಕೆ ನೀರೊಯ್ಯಲು ನಾವು ಬಿಡುವುದಿಲ್ಲ. ಶೀಘ್ರವೇ ರೈತರ ಜೊತೆಗೆ ಚರ್ಚಿಸಿ, ಬಂದ್‌ಗೆ ಕರೆ ನೀಡುವ ಕೆಲಸ ಮಾಡುತ್ತೇವೆ. ಜಿಲ್ಲಾ ಸಚಿವರು, ಸಂಸದರು, ಶಾಸಕರು ಈ ಭಾಗದ ರೈತರ ಹಿತಾಸಕ್ತಿ ಕಾಪಾಡಲು ಮುಂದಾಗಲಿ.

- - -