ಇರುವೈಲಿನ ನಗರ ಸಂಕೀರ್ತನೆಯ ವಿಶೇಷ ಪರಂಪರೆಗೆ ಅಮೃತ ಸಂಭ್ರಮ

ಗಣೇಶ್ ಕಾಮತ್

ತುಳುನಾಡಿನಲ್ಲಿ ಭಜಕರ ದರ್ಶನಕ್ಕಾಗಿ ಹಲವು ದೇವಾಲಯಗಳಿವೆ. ದರ್ಶನ, ಉತ್ಸವಾದಿಗಳಲ್ಲಿ ದೇವರ ಪೇಟೆ ಸವಾರಿಯೂ ಇದೆ. ಆದರೆ ಮನೆ ಮನೆಗೂ ಊರಿನ ಆರಾಧ್ಯ ದೇವಿ ಭೇಟಿ ಇತ್ತು ಪೂಜೆ ಪ್ರಾರ್ಥನೆ ಸ್ವೀಕರಿಸುವ ವಿಶೇಷತೆಯ ವಿವರ ಇದು.

ಸಂಜೆ ಕತ್ತಲಾಗುತ್ತಿದ್ದಂತೆ ದೇವಳದಿಂದ ಹೊರಡುವ ಭಜನಾ ತಂಡಕ್ಕೆ ದೇವಿಯ ಭಜನಾ ಮೂರ್ತಿಯೇ ಅಧಿನಾಯಕಿ! ಪೂರ್ವ ಸೂಚನೆಯಂತೆ ಭಜಕರು ಮನೆಯ ಅಂಗಳ ಸಿಂಗರಿಸಿ ತುಳಸೀಕಟ್ಟೆಯಲ್ಲಿ ದೇವಿಯ ಉತ್ಸವ ಮೂರ್ತಿಯನ್ನು ಸ್ವಾಗತಿಸಿ ದೀಪಾಲಂಕಾರ ಸಹಿತ ನೈವೇದ್ಯ ಅರ್ಪಿಸಿ ಪೂಜಿಸುತ್ತಾರೆ.

ದಿನವೊಂದಕ್ಕೆ 50-70 ಮನೆ ಭೇಟಿ. ಕೆಲವೊಮ್ಮೆ ನೂರಾರು ಮನೆಯ ಗಡಿ ದಾಟುವುದೂ ಇದೆ. ಹೀಗೆ ಸಾಗುವ ನಗರ ಭಜನಾ ಉತ್ಸವ ತಡರಾತ್ರಿ ಮೂರರಿಂದ ನಾಲ್ಕರ ಹೊತ್ತಿಗೆ ಕೆಲವೊಮ್ಮೆ ಬೆಳಗಿನ ಜಾವ ಮರಳಿ ದೇವಸ್ಥಾನಕ್ಕೆ ತಲುಪುವುದೂ ಇದೆ. ಇದು ಒಂದು ತಿಂಗಳ ನಿತ್ಯ ಸಂಭ್ರಮ.

ಕೀರ್ತಿಶೇಷರಾದ ಐ. ರಾಮ ಆಸ್ರಣ್ಣ, ಜನಾರ್ದನ ಆಚಾರ್ಯ, ವಾಸುದೇವ ಆಚಾರ್ಯ, ಪುಂಡಳೀಕ ಪ್ರಭು ನಡುಬಾಳಿಕೆ, ಮೋನಪ್ಪ ಶೆಟ್ಟಿ, ದೇಜು ಪೂಜಾರಿ ಕಾಳೂರು, ಪದ್ಮನಾಭ ಶೆಟ್ಟಿ ಮೊದಲಾದ ಹಿರಿಯರ ಪರಿಶ್ರಮ, ಬೆಂಗಳೂರಿನ ನಾರಾಯಣ ನಾಯಕ್ ಮಂಡಳಿ ಅಧ್ಯಕ್ಷ ಬಾಲಚಂದ್ರ ಶೆಟ್ಟಿ, ಕಾರ್ಯದರ್ಶಿ ನಾರಾಯಣ ದೇವಾಡಿಗ ಸಹಿತ ಊರ ಪ್ರಮುಖರ ,ಕಾರ್ಯಕರ್ತರ ಉತ್ಸಾಹ ಈ ಭಜನಾ ಮಹೋತ್ಸವವನ್ನು ಇನ್ನಷ್ಟು ವರ್ಣಮಯ, ವಿಶಿಷ್ಟವಾಗಿಸಿದೆ.

ಈ ಬಾರಿ 75ನೇ ವರ್ಷದ ಭಜನಾ ಮಂಗಲೋತ್ಸವ ಮಕರ ಸಂಕ್ರಮಣದ ದಿನ ಮಂಗಳವಾರ ನಡೆಯಲಿದೆ. ಬೆಳಗ್ಗೆ 9ರಿಂದ ಚಂಡಿಕಾ ಯಾಗ, 11ರಿಂದ ಧಾರ್ಮಿಕ ಸಭೆ, ಹಿರಿಯ ಭಜಕರಿಗೆ ಸಮ್ಮಾನ, ಅಪರಾಹ್ಹ, ರಾತ್ರಿ ಮಹಾ ಅನ್ನಸಂತರ್ಪಣೆ, ಸಂಜೆ 7ರಿಂದ ಮಂಗಲೋತ್ಸವ ಸಂಕೀರ್ತನೆ ಆರಂಭ, ಜತೆಗೆ ವರ್ಷಾವಧಿ ಜಾತ್ರಾ ಮಹೋತ್ಸವ ( ಜ 11ರಿಂದ 19 ) ಸಂಭ್ರಮ, ರಾತ್ರಿ ಪೂರ್ತಿ ಸಂಕೀರ್ತನೆ, ಪೂಜೆ ನಡೆದು ಮರುದಿನ ಉಷಾಕಾಲದಲ್ಲಿ ಧಾರ್ಮಿಕ ಕಾರ್ಯಕ್ರಮಗಳು ಸಂಪನ್ನಗೊಳ್ಳಲಿವೆ. ....................

- ದಿವಾಕರ ಪ್ರಭು ಇರುವೈಲು, ಕ್ಷೇತ್ರದ ಮಾಜಿ ಮೊಕ್ತೇಸರ.