ಕರಾವಳಿಯ ವಿನಯ್ ತೋನ್ಸೆ ಈಗ ಎಸ್.ಬಿ.ಐನ ಎಂಡಿ!

ಕನ್ನಡಪ್ರಭ ವಾರ್ತೆ ಮೂಡುಬಿದಿರೆ

ಬ್ಯಾಂಕಿನ ಉದ್ಯೋಗಿಯಾಗಿ ಮೂರೂವರೆ ದಶಕಗಳ ಬಳಿಕ ಇಂತಹದ್ದೊಂದು ಉನ್ನತ ಹುದ್ದೆಗೇರುವ ಅಪರೂಪದ ಸಾಧನೆ ಮಾಡಿರುವ ವಿನಯ್ ತೋನ್ಸೆ ದೊರೆತ ಅವಕಾಶದಲ್ಲಿ ರಾಷ್ಟ್ರ ನಿರ್ಮಾಣದ ಕನಸು ಕಂಡಿದ್ದಾರೆ. 2047ರ ಸಮೃದ್ಧ ಭಾರತಕ್ಕಾಗಿ ಅಮೃತಕಾಲವನ್ನು ಸದುಪಯೋಗಪಡಿಸಿಕೊಳ್ಳುವ ಇಚ್ಛೆ ಹೊಂದಿದ್ದಾರೆ. ಬಿಡುವಿಲ್ಲದ ಚಟುವಟಿಕೆಗಳ ನಡುವೆಯೂ ಕನ್ನಡ ಪ್ರಭದೊಂದಿಗೆ ಸಂತಸದಿಂದ ತಮ್ಮ ಮನದಾಳದ ಅನಿಸಿಕೆಗಳನ್ನು ಹಂಚಿಕೊಂಡಿದ್ದಾರೆ.

ಭಾರತ ಸ್ವಾತಂತ್ರ್ಯದ ನೂರು ವರ್ಷ ಪೂರೈಸುವ ಹೊತ್ತಿಗೆ ಸದೃಢ ಆರ್ಥಿಕ ರಾಷ್ಟ್ರವಾಗುವ ಸಂಕಲ್ಪಕ್ಕೆ ಪೂರಕವಾಗಿ ನಾವೇನು ಮಾಡಿದರೂ ಅದು ದೇಶ ಸೇವೆಯೇ! ಈಗಿನ ಅಮೃತಕಾಲದಲ್ಲಿ ನಾವೇನು ಮಾಡಬಹದು ಎನ್ನುವುದೇ ನಮ್ಮ ಗುರಿಯಾಗಬೇಕು. ಶಿಕ್ಷಣ, ಯುವ ಸಬಲೀಕರಣ, ನಾಯಕತ್ವ ಈ ನಿಟ್ಟಿನಲ್ಲಿ ನಾವು ಬಹಳಷ್ಟು ಕೊಡುಗೆ ಸಲ್ಲಿಸಬಹುದು. ಬ್ಯಾಂಕಿನ ಎಂಡಿಯಾಗಿ 22 ಸಾವಿರ ಶಾಖೆಗಳು, 2.30 ಲಕ್ಷ ಉದ್ಯೋಗಿಗಳ ಉತ್ತರದಾಯಿತ್ವದಲ್ಲಿ ಮಾತ್ರವಲ್ಲ ವೈಯಕ್ತಿಕ ನೆಲೆಯಲ್ಲೂ ನಾನು ಈ ವಿಷಯಗಳಿಗೆ ಆದ್ಯತೆ ನೀಡಲು ಬಯಸಿದ್ದೇನೆ ಎಂದರು ವಿನಯ್.

ಬ್ಯಾಂಕಿನ ಆಡಳಿತ ನಿರ್ದೇಶಕನಾಗಿ ದೇಶ, ಗ್ರಾಹಕರು, ಉದ್ಯೋಗಿಗಳ ಜತೆಗೆ ಸುತ್ತಲಿರುವ ಸಮಾಜದಲ್ಲೂ ನಾವು ಹೇಗೆ ಅಭಿವೃದ್ಧಿಯ ಬದಲಾವಣೆ ತರಬಹುದು ಎನ್ನುವುದೇ ನಮ್ಮ ಗುರಿಯಾಗಬೇಕು. ಪ್ರತಿಯೊಬ್ಬರಲ್ಲೂ ಇರುವ ಶಕ್ತಿ ಸಾಮರ್ಥ್ಯದ ಸದ್ಬಳಕೆಯಾಗಬೇಕು. ನಾಯಕತ್ವ, ಜವಾಬ್ದಾರಿ, ಪಾತ್ರ ನಿರ್ವಹಣೆಯ ಮೂಲಕ ಅತ್ಯುತ್ತಮ ಕೊಡುಗೆ ಸಲ್ಲಿಸುವ ಪರಿವರ್ತನೆಗೆ ನಾವು ಕಾರಣರಾಗಬೇಕಿದೆ ಎನ್ನುತ್ತಾರೆ ವಿನಯ್ ತೋನ್ಸೆ. ಮುಂದಿನ ಯುವಪೀಳಿಗೆಗೆ ಬರೇ ಶಿಕ್ಷಣ ಸಾಲದು. ನೈತಿಕತೆ, ಸದೃಢ ಮಾನಸಿಕತೆಯ ಅಗತ್ಯವಿದೆ. ಪಾಠದ ಜತೆಗೆ ಆಟಕ್ಕೆ ಮಹತ್ವ ಸಿಗಬೇಕು. ಕ್ರೀಡೆಯಿಂದ ಏಕತೆ, ಸ್ವಸ್ಥ ಸದೃಢತೆ ಪಡೆಯುವುದರ ಜತೆಗೆ ಕಳೆದು ಹೋಗುತ್ತಿರುವ ನೈತಿಕ ಮೌಲ್ಯಗಳಿಗೆ ಒತ್ತು ನೀಡಬೇಕು. ಮಾನಸಿಕ ಆರೋಗ್ಯವನ್ನು ಕಾಯ್ದುಕೊಂಡಾಗ ಉನ್ನತ ಸಾಧನೆ ಅರ್ಥಪೂರ್ಣವಾಗುತ್ತದೆ ಎಂದವರು ವಿಶ್ವಾಸ ವ್ಯಕ್ತಪಡಿಸಿದರು.

ಸಾಧಕ... ವಿನಾಯಕ!!

ವಿನಯ್ ತಂದೆ ಕಿನ್ನಿಮೂಲ್ಕಿ ನಿವಾಸಿ ಮುರಳೀಧರ ರಾವ್ ರಾಜ್ಯ ಕಂದಾಯ ಇಲಾಖೆಯಲ್ಲಿದ್ದವರು. ತಾಯಿ ಕೃಷ್ಣಾ ಬಾಯಿ, ಉಡುಪಿ ಕಲ್ಯಾಣಪುರ ಸುಂಕದಕಟ್ಟೆಯ ಇಷ್ಟದೇವರು ವಿನಾಯಕನ ಹೆಸರಿಟ್ಟಿದ್ದರೂ ಅದು ಬಳಿಕ ವಿನಯ್ ಆಯಿತು.