ಕಾಫಿ ತೋಟಗಳ ನಡುವೆ ಔಷಧೀಯ ಗಿಡ ಬೆಳೆದರೆ ಉತ್ತಮ ಆದಾಯ!

ವಿಘ್ನೇಶ್ ಎಂ. ಭೂತನಕಾಡು

ಇತ್ತೀಚಿನ ದಿನಗಳಲ್ಲಿ ಔಷಧೀಯ ಗಿಡಗಳಿಗೆ ಭಾರಿ ಬೇಡಿಕೆಯಿದೆ. ಔಷಧೀಯ ಗಿಡಗಳನ್ನು ಬೆಳೆಸಿದರೆ ಅದನ್ನು ಕೊಂಡುಕೊಳ್ಳಲು ಕೆಲವು ಸಂಸ್ಥೆಗಳು ಮುಂದೆ ಬರುತ್ತದೆ. ಆದ್ದರಿಂದ ಕಾಫಿ ತೋಟಗಳ ನಡುವೆಯೇ ಹಲವು ಬಗೆಯ ಸ್ಥಳೀಯ ಔಷಧೀಯ ಗಿಡಗಳನ್ನು ಬೆಳೆಸುವ ಮೂಲಕ ಬೆಳೆಗಾರರು ತಮ್ಮ ಆದಾಯವನ್ನು ದ್ವಿಗುಣಗೊಳಿಸಬಹುದಾಗಿದೆ.

ಕೊಡಗು ಜಿಲ್ಲೆ ಗುಡ್ಡಗಾಡು ಪ್ರದೇಶವಾಗಿದೆ. ಜಿಲ್ಲೆ ಪಶ್ಚಿಮಘಟ್ಟ ಪ್ರದೇಶ ವ್ಯಾಪ್ತಿಯಲ್ಲಿರುವುದರಿಂದ ಜಿಲ್ಲೆಯಲ್ಲಿ ಅಪಾರ ಸಸ್ಯ ಸಂಪತ್ತಿದೆ. ಅದರಲ್ಲೂ ಪ್ರಮುಖವಾಗಿ ಔಷಧೀಯ ಸಸ್ಯಗಳು ಸಾಕಷ್ಟಿವೆ. ಜಿಲ್ಲೆಯಲ್ಲಿ ಬೆಳೆಗಾರರು ತಮ್ಮ ಕಾಫಿ ತೋಟಗಳ ನಡುವೆ ನೈಸರ್ಗಿಕವಾಗಿ ಬೆಳೆಯುವ ಔಷಧಿ ಸಸ್ಯಗಳಾದ ಹಿಪ್ಪಲಿ, ಅಶೋಕ, ಕರಿಧೂಪ, ಆಡುಸೋಗೆ ಯನ್ನು ಬೆಳೆದು ಆದಾಯ ಪಡೆಯಬಹುದಾಗಿದೆ.

ಕರ್ನಾಟಕ ರಾಜ್ಯವು ಅಪಾರ ಔಷಧಿ ಸಸ್ಯ ಸಂಪತ್ತನ್ನು ಹೊಂದಿದೆ. ರಾಜ್ಯದಲ್ಲಿ ಸುಮಾರು 6,771 ಸಸ್ಯ ಪ್ರಭೇದಗಳನ್ನು ಗುರುತಿಸಲಾಗಿದೆ. ಅವುಗಳಲ್ಲಿ ಸುಮಾರು 2,247 ಸಸ್ಯ ಪ್ರಭೇದಗಳನ್ನ ವಿವಿಧ ಶಾಸ್ತ್ರೀಯ ವೈದ್ಯ ಪದ್ಧತಿಗಳಲ್ಲಿ ಬಳಸಲಾಗುತ್ತಿದೆ. ದಿನ ನಿತ್ಯದ ಆಹಾರ, ಅನೇಕ ಸಂಪ್ರದಾಯ ಹಾಗೂ ಹಬ್ಬ ಹರಿದಿನಗಳಲ್ಲಿ ಸಾಕಷ್ಟು ಔಷಧೀಯ ಸಸ್ಯಗಳ ಬಳಕೆಯನ್ನು ಕಾಣಬಹುದಾಗಿದೆ.

ಆಸಕ್ತಿ ಇರುವ ಬೆಳೆಗಾರರಿಗೆ ಕರ್ನಾಟಕ ರಾಜ್ಯ ಔಷಧಿ ಗಿಡ ಮೂಲಿಕಾ ಪ್ರಾಧಿಕಾರವು ಮಾಹಿತಿ ಹಾಗೂ ತಾಂತ್ರಿಕ ಸಹಾಯವನ್ನು ನೀಡುತ್ತಿದೆ.

ನಾಪಂಡ ಪೂಣಚ್ಚ ಆಯ್ಕೆ

ಈ ಬಗ್ಗೆ ನಾಪಂಡ ಪೂಣಚ್ಚ ಕನ್ನಡಪ್ರಭದೊಂದಿಗೆ ಪ್ರತಿಕ್ರಿಯಿಸಿ, ನಾವು ಈಗಾಗಲೇ ಆದಿ ಬಯೋಡೈವರ್ಸಿಟಿ ಕನ್ಸರ್ವೇಷನ್ ಟ್ರಸ್ಟ್ ಆರಂಭಿಸಿದ್ದೇವೆ. ಔಷಧಿ ಗಿಡಮೂಲಿಕಾ ಪ್ರಾಧಿಕಾರದಿಂದ ನಮಗೆ ಅನುದಾನವನ್ನು ನೀಡಿದ್ದಾರೆ. ಸ್ಥಳೀಯ ಔಷಧಿ ಗಿಡಗಳನ್ನು ಬೆಳೆದು ಇಲ್ಲಿನ ರೈತರಿಗೆ ವಿತರಣೆ ಮಾಡುತ್ತೇವೆ. ಮುಂದಿನ ದಿನಗಳಲ್ಲಿ ರೈತರಿಂದ ಬೇಡಿಕೆ ಬಂದಷ್ಟು ಗಿಡಗಳನ್ನು ನೀಡುತ್ತೇವೆ ಎಂದು ಹೇಳುತ್ತಾರೆ.

ಕೊಡಗಿನ ಕಾಫಿ ತೋಟಗಳ ನಡುವೆ ನೈಸರ್ಗಿಕವಾಗಿ ಬೆಳೆಯುವ ಔಷಧಿ ಸಸ್ಯಗಳಾದ ಹಿಪ್ಪಲಿ, ಅಶೋಕ, ಕರಿಧೂಪ, ಆಡುಸೋಗೆ ಬೆಳೆದು ಆದಾಯ ಗಳಿಸಬಹುದಾಗಿದೆ.

-ಡಾ.ಪ್ರಭು, ಕರ್ನಾಟಕ ರಾಜ್ಯ ಔಷಧಿ ಗಿಡ ಮೂಲಿಕಾ ಪ್ರಾಧಿಕಾರ ಬೆಂಗಳೂರುಪಶ್ಚಿಮಘಟ್ಟದಲ್ಲಿ ಅಪಾರ ಔಷಧೀಯ ಸಸ್ಯ ಸಂಪತ್ತಿದೆ. ಅಂತಹ ಸಸ್ಯಗಳನ್ನು ಕಾಫಿ ತೋಟದ ನಡುವೆ ಬೆಳೆದರೆ ಬೆಳೆಗಾರರು ತಮ್ಮ ಆದಾಯವನ್ನು ದ್ವಿಗುಣ ಮಾಡಬಹುದಾಗಿದೆ. ನಾವು ಸಸ್ಯಗಳನ್ನು ಕೂಡ ನೀಡಲಾಗುವುದು. ಒಬ್ಬರು ರೈತರು ಬೆಳೆದರೆ ಮಾತ್ರ ಸಾಲದು. ತಂಡವಾಗಿ ಬೆಳೆದರೆ ಅವರಿಗೆ ಅನುದಾನವನ್ನು ನೀಡುತ್ತೇವೆ. ಇದರಿಂದ ಮಾರುಕಟ್ಟೆ ಮಾಡಲು ಕೂಡ ಸಹಕಾರಿಯಾಗುತ್ತದೆ.