ಸರ್ಕಾರಿ ಅಂಗನವಾಡಿಗಳಿಗೆ ಆಧುನಿಕ ಸ್ಪರ್ಶ

ಗೋಪಾಲ್‌ ಯಡಗೆರೆ

ಅದು ಯಾವುದೇ ಖಾಸಗಿ ಪ್ಲೇ ಹೋಂಗಾಗಲಿ, ನರ್ಸರಿಗಾಗಲಿ, ಕಿಂಡರ್ ಗಾರ್ಡನ್‌ಗಾಗಲಿ, ಮಾಂಟೆಸ್ಸರಿಗಾಗಲಿ ಕಮ್ಮಿ ಇಲ್ಲ. ಭವಿಷ್ಯದ ಕುಡಿಗಳು ಹೊಸ ತಲೆಮಾರಿನ ಶಿಕ್ಷಣಕ್ಕೆ ಅಣಿಯಾಗುವಂತೆ ರೂಪುಗೊಂಡ ಆ ಕಟ್ಟಡವನ್ನು ನೋಡಿದಾಗ ಅಚ್ಚರಿ ಮೂಡಿಸುವಂತೆ ಮಾಡುತ್ತದೆ. ಇದು ಸರ್ಕಾರಿ ಕಟ್ಟಡವಾ? ಹೀಗೆಲ್ಲ ಸಾಧ್ಯವಾ? ಎಂಬೆಲ್ಲ ಉದ್ಘಾರಗಳು ಸಹಜವಾಗಿಯೇ ಮೂಡುತ್ತದೆ. ನಿಜ, ಇದು ಸರ್ಕಾರಿ ಅಂಗನವಾಡಿ ಕಟ್ಟಡಗಳು!

ಇದು ಜಿಲ್ಲೆಯಲ್ಲಿ ಸರ್ಕಾರದ ಯೋಜನೆಯಂತೆ ಹೊಸದಾಗಿ ನಿರ್ಮಾಣಗೊಂಡ ಮತ್ತು ನಿರ್ಮಾಣಗೊಳ್ಳುತ್ತಿರುವ ಸರ್ಕಾರಿ ಅಂಗನವಾಡಿ ಕಟ್ಟಡಗಳ ನೋಟ.

ಸರ್ಕಾರ ಕೂಡ ಅಂಗನವಾಡಿ ಹೆಸರಿನಲ್ಲಿ ತೆರೆದ ನರ್ಸರಿ, ಬಾಲವಾಡಿ ಶಾಲೆಗಳಲ್ಲಿ ಮಕ್ಕಳ ಸಂಖ್ಯೆ ತೀರಾ ಕಡಿಮೆಯಿತ್ತು. ಗ್ರಾಮೀಣ ಭಾಗದ ಕಡು ಬಡವರು ಮಾತ್ರ ಇಲ್ಲಿನ ಫಲಾನುಭವಿಗಳು. ಬೇರೆಯವರು ಬಾರದಿರುವುದಕ್ಕೆ ಕಾರಣ ಎಂದರೆ ಅಲ್ಲಿನ ವ್ಯವಸ್ಥೆ ಮತ್ತು ಮೂಲಭೂತ ಸೌಲಭ್ಯಗಳ ಕೊರತೆ, ಅರ್ಹ ಶಿಕ್ಷಕರ ಅಲಭ್ಯತೆ. ಸೋರುವ ಕಟ್ಟಡ, ಕಿತ್ತು ಬಂದ ಸಿಮೆಂಟ್‌ ಗೋಡೆಗಳು, ಮುರಿದ ಬೆಂಚುಗಳು, ಕೊಳಕಾಗಿರುವ ಟಾಯ್ಲೆಟ್ ಅಥವಾ ಬಯಲು ಶೌಚಾಲಯ. ಇಂತಹ ಪರಿಸ್ಥಿತಿಯ ದುರ್ಲಾಭ ಪಡೆಯುವ ಖಾಸಗಿ ವಲಯದ ನರ್ಸರಿ ಶಾಲೆಗಳು ಆಧುನಿಕ ಸೌಲಭ್ಯದ ಕಟ್ಟಡ ಮತ್ತು ವ್ಯವಸ್ಥೆ ಇಲ್ಲದಿದ್ದರೂ ಇರುವ ಕಟ್ಟಡಕ್ಕೆ ನವ ನವೀನ ರೀತಿಯಲ್ಲಿ ಪೇಂಟಿಂಗ್‌, ಆಕರ್ಷಕ ಬೆಂಚುಗಳು, ಇಂಗ್ಲೀಷ್‌ನಲ್ಲಿಯೇ ಮಾತನಾಡುವ ಟೀಚರ್‌ಗಳು ಸಹಜವಾಗಿಯೇ ಮಧ್ಯಮ ಮತ್ತು ಮೇಲ್ಮಧ್ಯಮ ವರ್ಗದ ಆಕರ್ಷಣೆಯ ಕೇಂದ್ರವಾಗಿದ್ದವು.

ಇದನ್ನು ಮನಗಂಡ ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆ ಅಂಗನವಾಡಿ ಕಟ್ಟಡದ ಸ್ವರೂಪವನ್ನು ಬದಲಿಸಲು ನಿರ್ಧರಿಸಿದ್ದು, ಅದಕ್ಕಾಗಿ ರಾಜ್ಯಕ್ಕೆ ಅನ್ವಯ ವಾಗುವಂತೆ ಒಂದು ಮಾದರಿ ಕಟ್ಟಡದ ನಕ್ಷೆಯನ್ನು ಸಿದ್ಧಪಡಿಸಿದೆ.

2023-24ನೇ ಸಾಲಿನ ಮಾರ್ಚ್ ಅಂತ್ಯಕ್ಕೆ ಮಂಜೂರಾಗಿದ್ದ 20 ಅಂಗನವಾಡಿ ಕಟ್ಟಡಗಳ ಪೈಕಿ 19 ಅಂಗನವಾಡಿ ಕಟ್ಟಡದ ಕೆಲಸವನ್ನು ತಲಾ 20 ಲಕ್ಷ ರು. ವೆಚ್ಚದಲ್ಲಿ ನಿರ್ಮಿತಿ ಕೇಂದ್ರ ಪೂರ್ಣಗೊಳಿಸಿದೆ.

ಒಟ್ಟು 10.2 ಚದರದ ಅಂಗನವಾಡಿ ಕಟ್ಟಡದ ರಚನೆ ಹಾಗೂ ವಿನ್ಯಾಸ ಮೊದಲ ನೋಟದಲ್ಲೇ ನೋಡುಗರ ಮನ ಗೆಲ್ಲುವಂತಿದೆ. ಹಾಲಿ ಇರುವ ಅಂಗನವಾಡಿ ಕಟ್ಟಡಗಳು 4 ರಿಂದ 6 ಚದರೊಳಗೆ ಕಿರಿದಾದ ಸ್ಥಳದಲ್ಲಿದ್ದರೆ, ಆಧುನಿಕ ಅಂಗನವಾಡಿ ಕಟ್ಟಡ ವಿಶಾಲವಾದ ಜಾಗವನ್ನೊಳಗೊಂಡಿದೆ. ಕಟ್ಟಡದ ಪ್ರವೇಶದ್ವಾರದ ಎಡಬದಿ ಪಾದರಕ್ಷೆ ಬಿಡುವ ಜಾಗವಿದ್ದರೆ, ಬಲಬದಿ ವಿಶೇಷ ಚೇತನ ಮಕ್ಕಳ ಆಟಕ್ಕಾಗಿ ಮರಳಿನ ಗುಂಡಿ ನಿರ್ಮಿಸಲಾಗಿದೆ.

ಎಲ್ಲಕ್ಕಿಂತ ಮುಖ್ಯವಾಗಿ ಆಧುನಿಕ ಅಂಗನವಾಡಿಯಲ್ಲಿ ಗಮನ ಸೆಳೆಯುವುದು ವಿಶಾಲವಾದ ತರಗತಿ ಕೊಠಡಿ 16x17 ಅಳತೆಯ ಕೊಠಡಿಯಲ್ಲಿ ಸುಮಾರು 30 ಮಕ್ಕಳು ಆರಾಮವಾಗಿ ಕುಳಿತು ಪಾಠ ಕೇಳಬಹುದಾಗಿದೆ. ಮಕ್ಕಳಿಗೆ ಅಕ್ಷರ ಸುಲಭವಾಗಿ ಕಾಣುವಂತಾಗಬೇಕು ಎಂಬ ಕಾರಣಕ್ಕೆ ವಿಶಾಲವಾದ ಬ್ಲ್ಯಾಕ್ ಬೋರ್ಡ್ ಕೊಠಡಿಯಲ್ಲಿದೆ. ಗಾಳಿ ಮತ್ತು ಬೆಳಕಿನ ಕೊರತೆಯಾಗದಂತೆ ಫ್ಯಾನ್ ಮತ್ತು ಲೈಟಿಂಗ್ಸ್ ವ್ಯವಸ್ಥೆಯ ಜೊತೆಗೆ ವಿಶಾಲವಾದ ಕಿಟಕಿಯನ್ನೊಳಗೊಂಡ ಕೊಠಡಿ ನಿರ್ಮಾಣಗೊಂಡಿರುವುದು ವಿಶೇಷ. ಅತಿ ಹೆಚ್ಚು ಮಳೆ ಬೀಳುವ ತೀರ್ಥಹಳ್ಳಿ, ಸಾಗರ ತಾಲೂಕಿನಲ್ಲಿ ಮಳೆ ನೀರು ಸುಲಭವಾಗಿ ಹರಿದು ಹೋಗುವಂತೆ ರೂಫಿಂಗ್ ವಿನ್ಯಾಸಗೊಳಿಸಿ ಅದಕ್ಕೆ ವಾಟರ್ ಪ್ರೂಫಿಂಗ್ ಮಾಡಲಾಗಿದೆ.

ಸುಮಾರು 8 ಅಡಿ ಅಗಲದ ಮಧ್ಯ ಭಾಗದಿಂದ ಹಾಲ್ ಪ್ರವೇಶಿಸುವ ಎಡಬದಿ ಬಾಣಂತಿಯರ ಕೊಠಡಿ ಇದೆ. ಮಕ್ಕಳನ್ನು ಬಿಡಲು ಹಾಗೂ ಕರೆದುಕೊಂಡು ಹೋಗಲು ಬರುವ ಬಾಣಂತಿಯರು ಅಥವಾ ತಾಯಂದಿರು ಹೊರಗಡೆ ಕಾಯುವುದನ್ನು ತಪ್ಪಿಸಲೆಂದೇ ಈ ಕೊಠಡಿ ನಿರ್ಮಿಸಲಾಗಿದೆ.ಎದ್ದು ಕಾಣುವ ಆರ್ಟ್ ಗ್ಯಾಲರಿ

ಜಿಲ್ಲೆಯ ಅಂಗನವಾಡಿ ಕಟ್ಟಡಗಳ ಚಿತ್ರಣ:

ಕಳೆದ ವರ್ಷ ಜಿಲ್ಲೆಗೆ 20 ಕಟ್ಟಡ ಮಂಜೂರಾಗಿದ್ದು, ಅವುಗಳಲ್ಲಿ 19 ಕಾಮಗಾರಿ ಮುಗಿದಿದೆ. ಸಾಗರ ಮತ್ತು ತೀರ್ಥಹಳ್ಳಿ ತಾಲೂಕಿನಲ್ಲಿ ತಲಾ 6 ಹಾಗೂ ಶಿವಮೊಗ್ಗ ತಾಲೂಕಿಗೆ 8 ಕಟ್ಟಡ ಮಂಜೂರಾಗಿತ್ತು. ಇದಲ್ಲದೆ ಈ ವರ್ಷ ಮತ್ತೆ 22 ಹೊಸದಾಗಿ ಮಂಜೂರಾಗಿದೆ. ಕಟ್ಟಡ ನಿರ್ಮಾಣಕ್ಕೆ ಒಟ್ಟು 20 ಲಕ್ಷ ರೂಪಾಯಿ ನಿಗದಿ ಪಡಿಸಿದ್ದು ನರೇಗಾದಿಂದ 8 ಲಕ್ಷ ಹಾಗೂ ಇಲಾಖೆಯಿಂದ 12 ಲಕ್ಷ ನೀಡಲಾಗಿದೆ. ಆಧುನಿಕ ಸೌಲಭ್ಯಗಳೊಂದಿಗೆ ನೂತನ ಕಟ್ಟಡ ನಿರ್ಮಾಣಗೊಂಡ ನಂತರ ಸರ್ಕಾರಿ ಅಂಗನವಾಡಿಗೆ ಮಕ್ಕಳ ದಾಖಲೆ ಪ್ರಮಾಣ ಹೆಚ್ಚಾಗಿದೆ. ಮಕ್ಕಳು, ಪೋಷಕರು ಹಾಗೂ ಜನಪ್ರತಿನಿಧಿಗಳಿಗೆ ಸರ್ಕಾರಿ ಅಂಗನವಾಡಿ ಕಟ್ಟಡದ ಹೊಸ ವಿನ್ಯಾಸ ಹಾಗೂ ಸೌಲಭ್ಯ ಸಂತಸ ತಂದಿದೆ ಎಂದು ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆ ಉಪ ನಿರ್ದೇಶಕರು - ಬಿ.ಎಚ್.ಕೃಷ್ಣಪ್ಪ ಹೇಳಿದರು.