ಒಕ್ಕಲಿಗರಿಗೆ ಮುಕ್ತವಾಗದ ಕಲ್ಯಾಣ ಮಂಟಪ

ಎಚ್.ವಿ.ರವಿಕುಮಾರ್

ಪಟ್ಟಣದ ಡಾ.ಬಾಬು ಜಗಜೀವನ್‌ರಾಮ್ ವೃತ್ತ ಹಾಗೂ ಎಪಿಎಂಸಿ ಮಾರುಕಟ್ಟೆ ಸಮೀಪವಿರುವ ಒಕ್ಕಲಿಗರ ಕಲ್ಯಾಣ ಮಂಟಪ ನಿಮಾರ್ಣಕ್ಕೆ ೧೯೮೫ ಚುನಾವಣೆಯಲ್ಲಿ ವಿಜೇತರಾಗಿ ಮೊದಲ ಸಲ ಸಚಿವರಾಗಿದ್ದ ಎಚ್.ಡಿ.ದೇವೇಗೌಡರು ೧೯೬೨ರಲ್ಲಿ ಪ್ರಥಮವಾಗಿ ಶಾಸಕರಾಗಿ ಆಯ್ಕೆಯಾಗಿ ೨೬ ವರ್ಷಗಳ ನಂತರ ಸಿಕ್ಕ ಸಚಿವ ಸ್ಥಾನದಿಂದ ೧೯೮೮ ಅ.೨೩ ರಂದು ಬಾಲಗಂಗಾಧರನಾಥ ಸ್ವಾಮೀಜಿಗಳ ಉಪಸ್ಥಿತಿಯಲ್ಲಿ ಒಕ್ಕಲಿಗರ ಸಂಘ ಟ್ರಸ್ಟ್ ವತಿಯಿಂದ ಒಕ್ಕಲಿಗರ ವಿದ್ಯಾರ್ಥಿ ಹಾಸ್ಟೆಲ್ ಮತ್ತು ಕಲ್ಯಾಣ ಮಂಟಪಕ್ಕೆ ಶಂಕುಸ್ಥಾಪನೆ ಮಾಡಿ ಕಾಮಗಾರಿ ನಡೆಯಿತು.

೧೯೮೯ರ ಚುನಾವಣೆಯಲ್ಲಿ ಎಚ್.ಡಿ.ದೇವೇಗೌಡರು ಪರಾಜಿತರಾದರು. ೨೦೦೬ ಆ.೧೮ರಲ್ಲಿ ಮಾಜಿ ಸಚಿವ ಜಿ.ಪುಟ್ಟಸ್ವಾಮಿಗೌಡರು ನಿಧನರಾದರು, ನಂತರದ ದಿನಗಳಲ್ಲಿ ೨೦೨೩ ಚುನಾವಣೆಯಲ್ಲೂ ಶಾಸಕ ಎಚ್.ಡಿ.ರೇವಣ್ಣ ಜಯಗಳಿಸಿ, ನಿರಂತರ ಶಾಸಕರಾಗಿದ್ದರೂ ಮಾಜಿ ಪ್ರಧಾನಿ ಎಚ್.ಡಿ.ದೇವೇಗೌಡರ ಕನಸಿನ ಕೂಸು ಒಕ್ಕಲಿಗರ ವಿದ್ಯಾರ್ಥಿ ಹಾಸ್ಟೆಲ್ ಮತ್ತು ಕಲ್ಯಾಣ ಮಂಟಪ ಶಂಕುಸ್ಥಾಪನೆಗೊಂಡು ೩೫ ವರ್ಷಗಳು ಗತಿಸಿದರೂ ಉದ್ಘಾಟನೆಯ ಭಾಗ್ಯ ಕಂಡಿಲ್ಲ. ದೈವಭಕ್ತರಾದ ಶಾಸಕ ಎಚ್.ಡಿ.ರೇವಣ್ಣ ಅವರಿಗೆ ಒಕ್ಕಲಿಗರ ಕಟ್ಟಡದಲ್ಲಿ ನಡೆದ ಆತ್ಮಹತ್ಯೆಗಳು ಮತ್ತು ಕುಹಕದ ಮಾತುಗಳು ಇದಕ್ಕೆ ಕಾರಣ ಎನ್ನಲಾಗಿದೆ.

ಸೆ.೫ ರಂದು ಪಟ್ಟಣದಲ್ಲಿ ಆಯೋಜಿಸಿದ್ದ ಶಿಕ್ಷಕರ ದಿನಾಚರಣೆಯಲ್ಲಿ ದಿಗ್ಗಜ ನಾಯಕರೊಬ್ಬರ ಮಗ ಹಾಗೂ ಮತ್ತೊಬ್ಬರ ಮೊಮ್ಮಗ ಒಂದೇ ವೇದಿಕೆಯಲ್ಲಿ ಉಭಯ ಕುಶಲೋಪರಿ ವಿನಿಮಯವೂ ಸಭೆಯಲ್ಲಿ ಮಿಂಚಿನ ಸಂಚಾರ ಮೂಡಿಸಿತ್ತು. ಹೊಸ ಆಯಾಮ ಸೃಷ್ಟಿಸಿತ್ತು. ಇದೇ ಮನಸ್ಥಿತಿಯಲ್ಲಿ ಇನ್ನಾದರೂ ಒಕ್ಕಲಿಗರ ಕಲ್ಯಾಣ ಮಂಟಪ ಉದ್ಘಾಟನೆಯ ಭಾಗ್ಯ ಕಾಣುತ್ತದೆಯೇ ಎಂಬ ಯಕ್ಷಪ್ರಶ್ನೆ ಒಕ್ಕಲಿಗರನ್ನು ಕಾಡುತ್ತಿದೆ.