2021ರ ಬಳಿಕ ದಕ್ಷಿಣ ಕನ್ನಡಕ್ಕೆ ಮನೆ ಮಂಜೂರಾತಿಯೇ ಆಗಿಲ್ಲ!

ಕನ್ನಡಪ್ರಭ ವಾರ್ತೆ ಮಂಗಳೂರು

ನಗರದ ಜಿಲ್ಲಾ ಪಂಚಾಯ್ತಿ ಸಭಾಂಗಣದಲ್ಲಿ ದ.ಕ. ಜಿಲ್ಲಾ ಉಸ್ತುವಾರಿ ಸಚಿವ ದಿನೇಶ್‌ ಗುಂಡೂರಾವ್‌ ಅಧ್ಯಕ್ಷತೆಯಲ್ಲಿ ಶುಕ್ರವಾರ ನಡೆದ ಜಿಲ್ಲಾ ಮಟ್ಟದ ಪ್ರಗತಿ ಪರಿಶೀಲನಾ ಸಭೆಯಲ್ಲಿ ಪುತ್ತೂರು ಶಾಸಕ ಅಶೋಕ್‌ ರೈ ಈ ವಿಚಾರವನ್ನು ಬೆಳಕಿಗೆ ತಂದರು. ರಾಜ್ಯದ ಎಲ್ಲ ಜಿಲ್ಲೆಗಳಿಗೆ ವಸತಿ ಯೋಜನೆಗಳು ಮಂಜೂರಾಗಿವೆ. ಆದರೆ ದಕ್ಷಿಣ ಕನ್ನಡ ಜಿಲ್ಲೆಗೆ ಮಾತ್ರ 2021-22ರ ಬಳಿಕ ಯಾವುದೇ ಹೊಸ ಮನೆ ಮಂಜೂರಾತಿ ಆಗಿಲ್ಲ ಎಂದು ಆಕ್ಷೇಪ ವ್ಯಕ್ತಪಡಿಸಿದರು. ಟ

ಪ್ರತಿಕ್ರಿಯಿಸಿದ ಸಚಿವ ದಿನೇಶ್‌ ಗುಂಡೂರಾವ್, 49 ಸಾವಿರದಷ್ಟು ವಸತಿ ರಹಿತರು ಇದ್ದರೂ 4 ವರ್ಷಗಳಿಂದ ಒಂದೂ ಮನೆ ಮಂಜೂರಾಗಿಲ್ಲ ಎಂದರೆ ಏನರ್ಥ? ಸರ್ಕಾರಿ ಜಾಗ ಇದ್ದರೂ ಮನೆ ಕೊಡಲು ಸಾಧ್ಯವಾಗಿಲ್ಲ ಎಂದಾದರೆ ಅದಕ್ಕೆ ಕಾರಣಕರ್ತರಾದ ಸಂಬಂಧಿಸಿದ ಅಧಿಕಾರಿಗಳ ವಿರುದ್ಧ ಶಿಶ್ತು ಕ್ರಮ ಜರುಗಿಸಬೇಕು, ಬಡವರಿಗೆ ಮನೆ ಮಂಜೂರು ಮಾಡುವಲ್ಲಿ ಯಾವುದೇ ನಿರ್ಲಕ್ಷ್ಯ ಸಲ್ಲದು ಎಂದು ಸೂಚನೆ ನೀಡಿದರು.

24x7 ಕುಡಿಯುವ ನೀರು ಪೂರೈಕೆಯ ಜಲಜೀವನ್‌ ಮಿಷನ್‌ 2019ರಲ್ಲಿ ಆರಂಭಗೊಂಡು ಎರಡು ವರ್ಷಗಳ ಹಿಂದೆ ಮುಕ್ತಾಯವಾಗಬೇಕಿದ್ದರೂ ಇನ್ನೂ ಅರ್ಧದಷ್ಟೂ ಕಾಮಗಾರಿ ಮುಗಿದಿಲ್ಲ. ಶೇ. 45ರಷ್ಟು ಮಾತ್ರವೇ ಕಾಮಗಾರಿ ಪೂರ್ಣವಾಗಿದೆ. 2025ರ ಮಾರ್ಚ್‌ ಒಳಗೆ ಉಳಿದ ಶೇ.50ಕ್ಕೂ ಅಧಿಕ ಕಾಮಗಾರಿ ಹೇಗೆ ಮುಗಿಸ್ತೀರಿ ಎಂದು ಅಧಿಕಾರಿಗಳನ್ನು ದಿನೇಶ್‌ ಗುಂಡೂರಾವ್ ತರಾಟೆಗೆ ತೆಗೆದುಕೊಂಡರು.

ಆದ್ಯತೆಯಲ್ಲಿ ಕೃಷಿ ಸಾಲ ನೀಡಿ:

ವಾಟರ್‌ ಫ್ರಂಟ್‌ ತಡೆಗೋಡೆ ಕುಸಿತ: ವಾರದೊಳಗೆ ವರದಿಗೆ ಸೂಚನೆ

ಬಂದರು ಇಲಾಖೆ ಅಧಿಕಾರಿಗಳ ನಿರ್ಲಕ್ಷ್ಯದಿಂದ ಯೋಜನೆ ವಿಳಂಬವಾಗಿದೆ ಎಂದು ಸಂಸದ ಬ್ರಿಜೇಶ್‌ ಚೌಟ ಹಾಗೂ ಶಾಸಕ ವೇದವ್ಯಾಸ ಕಾಮತ್‌ ಆಕ್ಷೇಪಿಸಿದರು. ತಡೆಗೋಡೆ ಕುಸಿತದ ಬಗ್ಗೆ ತನಿಖೆ ನಡೆಸಿ ಒಂದು ವಾರದೊಳಗೆ ವರದಿ ನೀಡುವಂತೆ ಸಚಿವ ದಿನೇಶ್‌ ಗುಂಡೂರಾವ್‌ ಜಿಲ್ಲಾಧಿಕಾರಿಗೆ ಸೂಚನೆ ನೀಡಿದರು.

ಬೆಳ್ತಂಗಡಿಯ ಶಿಬಾಜೆಯಲ್ಲಿ ವಿದ್ಯುತ್ ಆಘಾತದಿಂದ ಯುವತಿ ಸಾವಿಗೀಡಾಗುವ ಮೊದಲು ಆ ಜಾಗ ಅಪಾಯದಲ್ಲಿದ್ದ ಕುರಿತು ಮೆಸ್ಕಾಂಗೆ ಎರಡು ಬಾರಿ ಸಾರ್ವಜನಿಕರಿಂದ ದೂರು ಸಲ್ಲಿಕೆಯಾಗಿತ್ತು. ಆದರೂ ನಿರ್ಲಕ್ಷ್ಯ ವಹಿಸಿದ್ದರಿಂದ ಯುವತಿ ಸಾವು ಸಂಭವಿಸಿದೆ. ಮೆಸ್ಕಾಂಗೆ ನೀಡಿದ ದೂರು ಮತ್ತು ಯುವತಿ ಸಾವಿನ ಕಾರಣ ಒಂದೇ ಆದರೆ ಅಧಿಕಾರಿಗಳ ಮೇಲೆ ಕ್ರಮ ಆಗಲೇಬೇಕು ಎಂದು ಸಂಸದ ಕ್ಯಾ.ಬ್ರಿಜೇಶ್‌ ಚೌಟ ಒತ್ತಾಯಿಸಿದರು. ಈ ಕುರಿತು 10 ದಿನದೊಳಗೆ ಸ್ವತಂತ್ರ ಅಧಿಕಾರಿಗಳ ಮೂಲಕ ತನಿಖೆ ನಡೆಸಿ ವರದಿ ಸಲ್ಲಿಸುವಂತೆ ಉಸ್ತುವಾರಿ ಸಚಿವ ಸೂಚಿಸಿದರು.