ಬೆಲೆ ಏರಿಕೆಯ ನಡುವೆ ಹೈನುಗಾರರಿಗೆ ದರ ಇಳಿಕೆ ಬಿಸಿ

ಕೊಪ್ಪಳ: ಮಾರುಕಟ್ಟೆ ಹಾಲಿನ ದರ ₹50-60 ಇದೆಯಾದರೂ ರೈತರಿಗೆ ಇದರ ಅರ್ಧ ಕೊಡುತ್ತಿದ್ದ ರಾಯಚೂರು, ಬಳ್ಳಾರಿ, ಕೊಪ್ಪಳ ಹಾಗೂ ವಿಜಯನಗರ (ರಾಬಕೊವಿ) ಒಕ್ಕೂಟ, ಈಗ ಅದರಲ್ಲಿಯೂ ಕಡಿತ ಮಾಡಿ ರೈತರ ಆಕ್ರೋಶಕ್ಕೆ ತುತ್ತಾಗಿದೆ.

3.5 ಎಸ್‌ಎನ್‌ಎಫ್‌ ಇರುವ ಹಾಲಿನ ದರ ಈಗ ಲೀಟರ್‌ಗೆ ₹30.50 ಇದ್ದು, ಅದನ್ನು ಸೆ. 1ರಿಂದ ₹1.50 ಕಡಿಮೆ ಮಾಡಿ ₹29ಗೆ ಇಳಿಸಿದೆ. ಇದು 3.5 ಎಸ್ಎನ್‌ಎಫ್‌ ಇರುವ ಹಾಲಿನ ದರದ ಲೆಕ್ಕಾಚಾರ, ಫ್ಯಾಟ್ ಕಡಿಮೆ ಆದಂತೆ ಇನ್ನೂ ಹಾಲಿನ ದರ ಕಡಿಮೆಯಾಗುತ್ತದೆ ಎನ್ನುತ್ತಾರೆ ರೈತರು.

ರಾಬಕೊವಿ ಒಕ್ಕೂಟದಲ್ಲಿಯೇ ಪ್ರತಿನಿತ್ಯ ಒಂದೂವರೆಯಿಂದ 2 ಲಕ್ಷ ಲೀಟರ್ ಹಾಲು ಸಂಗ್ರಹವಾಗುತ್ತದೆ. ಹಾಲಿಗೆ ಬೇಡಿಕೆ ಇದೆಯಾದರೂ ಹಾಲಿನ ಸಂಸ್ಕರಣೆ ಮಾಡುವ ನೆಪ ಮಾಡಿಕೊಂಡು ಹಾಲಿನ ದರ ಇಳಿಸುತ್ತಿದ್ದಾರೆ.

ಮಾರುಕಟ್ಟೆಯಲ್ಲಿ ಖಾಸಗಿ ಕಂಪನಿಗಳಿಂದ ಹಾಲಿಗೆ ಬೇಡಿಕೆ ಸಾಕಷ್ಟಿದೆ. ಅನೇಕ ಖಾಸಗಿ ಕಂಪನಿಗಳು ಫ್ಯಾಟ್ ಲೆಕ್ಕಾಚಾರ ಇಲ್ಲದೆಯೇ ಇದಕ್ಕಿಂತಲೂ ಅಧಿಕ ಹಣದಿಂದ ರೈತರ ಹಾಲನ್ನು ಖರೀದಿ ಮಾಡುತ್ತವೆ. ಆದರೆ, ಸರ್ಕಾರಿ ಅಧೀನದ ರಾಬಕೊವಿಯಲ್ಲಿ ಮಾತ್ರ ಈ ರೀತಿಯಾಗಿ ರೈತರ ಶೋಷಣೆ ಮಾಡುವುದು ಯಾವ ನ್ಯಾಯ? ಎಂದು ಕಿಡಿಕಾರಿದ್ದಾರೆ.

ರಾಬಕೊವಿ ಆಡಳಿತ ಮಂಡಳಿಯ ಅಧಿಕಾರಾವಧಿ ಮುಗಿದು ಹೋಗಿದೆ. ಆದರೂ ನಾನಾ ಕಾರಣಗಳಿಗಾಗಿ ಚುನಾವಣೆಯನ್ನು ಪದೇ ಪದೇ ಮುಂದೂಡುತ್ತಲೇ ಬರಲಾಗುತ್ತಿದೆ. ಈಗ ಅವಧಿ ಮುಗಿದಿರುವ ಆಡಳಿತ ಮಂಡಳಿಯ ಸಭೆ ನಡೆಸಿರುವ ಅಧಿಕಾರಿಗಳು, ಅದರ ಮೂಲಕವೇ ಈಗ ದರ ಪರಿಷ್ಕರಣೆ ನಿರ್ಧಾರ ಮಾಡಿ ಕೆಂಗಣ್ಣಿಗೆ ಗುರಿಯಾಗಿದ್ದಾರೆ. ಅವಧಿ ಮುಗಿದಿರುವ ಆಡಳಿತ ಮಂಡಳಿಯ ನಿರ್ಧಾರಕ್ಕೆ ಮಾನ್ಯತೆ ಇದೆಯಾ ಎನ್ನುವುದು ರೈತರ ಪ್ರಶ್ನೆಯಾಗಿದೆ.ದರ ಕಮ್ಮಿ

ನಾಗನಗೌಡ ನಂದಿನಗೌಡ್ರ, ಮಾಜಿ ನಿರ್ದೇಶಕರು ರಾಬಕೊವಿ ನಷ್ಟ

ಪೀರಾನಾಯಕ, ವ್ಯವಸ್ಥಾಪಕರು ರಾಬಕೊವಿ