ಮೀನುಗಾರರಿಗೆ ಪರಿಹಾರ ಮೊತ್ತ ಹೆಚ್ಚಳ ಬಿಟ್ಟರೆ ಉಳಿದ ಯೋಜನೆ ಪ್ರಗತಿಗೆ ಸೀಮಿತ

ಕನ್ನಡಪ್ರಭ ವಾರ್ತೆ ಮಂಗಳೂರು

ಮೀನುಗಾರಿಕೆ ನಿಷೇಧದ ಅವಧಿಯಲ್ಲಿ ಮೀನುಗಾರರಿಗೆ ನೀಡುತ್ತಿರುವ ಪರಿಹಾರ ಮೊತ್ತವನ್ನು 1,500 ರು.ನಿಂದ 2 ಸಾವಿರ ರು.ಗೆ ಏರಿಕೆ ಮಾಡುವುದಾಗಿ ಬಜೆಟ್‌ನಲ್ಲಿ ಪ್ರಕಟಿಸಲಾಗಿತ್ತು. ಮೀನುಗಾರಿಕೆ ನಿಷೇಧ ಅವಧಿ ಈ ಹಿಂದೆ ಮೂರು ತಿಂಗಳು ಇದ್ದರೆ, ಈಗ ಎರಡೇ ತಿಂಗಳಿಗೆ ಕಡಿತಗೊಳಿಸಲಾಗಿದೆ. ಹಾಗಾಗಿ ಮೀನುಗಾರರಿಗೆ ಎರಡೇ ತಿಂಗಳು ಈ ಮೊತ್ತದ ಪ್ರಯೋಜನ ಸಿಗುತ್ತದೆ. ಇದಕ್ಕಾಗಿ ಮೀನುಗಾರ ಫಲಾನುಭವಿಗಳು ಪ್ರತಿ ತಿಂಗಳು 165 ರು. ನಂತೆ ಒಂಭತ್ತು ಪಾವತಿಸಬೇಕು. ಫಲಾನುಭವಿಗಳ ಮೊತ್ತ 1,500 ರು, ರಾಜ್ಯ ಹಾಗೂ ಕೇಂದ್ರ ಸರ್ಕಾರದ ಪಾಲು ತಲಾ 1,500 ರು. ಸೇರಿ ಒಟ್ಟು 4,500 ರು. ಪಾವತಿಯಾಗುತ್ತಿತ್ತು. ಈ ಬಾರಿಯಿಂದ ಈ ಮೊತ್ತ ಹೆಚ್ಚುವರಿಯಾಗಿ 1,500 ರು. ಪಾವತಿಯಾಗುತ್ತಿದ್ದು, ಒಟ್ಟು 6 ಸಾವಿರ ರು. ಮೊತ್ತ ಫಲಾನುಭವಿಗಳ ಖಾತೆಗೆ ಜಮೆಯಾಗುತ್ತಿದೆ ಎಂದು ಮೀನುಗಾರಿಕಾ ಇಲಾಖೆ ಅಧಿಕಾರಿಗಳು ತಿಳಿಸುತ್ತಾರೆ.

ಪುತ್ತೂರಿನ ಕೊಯ್ಲ ಪಶು ಸಂಗೋಪನಾ ಕ್ಷೇತ್ರದಲ್ಲಿ ಪಶು ವೈದ್ಯಕೀಯ ಕಾಲೇಜು ಆರಂಭದ ಕುರಿತು ಬಜೆಟ್‌ನಲ್ಲಿ ಪ್ರಸ್ತಾಪಿಸಲಾಗಿತ್ತು. ಇದೀಗ ಮೊದಲ ಹಂತದ ಕಾಮಗಾರಿ ಮುಕ್ತಾಗೊಂಡಿದ್ದು, ಆಗಸ್ಟ್‌ ವೇಳೆಗೆ ಕಾಲೇಜು ಆರಂಭಿಸಲು ಭರದ ಸಿದ್ಧತೆ ನಡೆಯುತ್ತಿದೆ.

ಪ್ರಸಕ್ತ ಆಡಳಿತ ಸಿಬ್ಬಂದಿ, ಉಪನ್ಯಾಸಕರ ನೇಮಕಾತಿಗೆ 23 ಕೋಟಿ ರು.ಗಳ ಪ್ರತ್ಯೇಕ ಪ್ರಸ್ತಾವನೆ ಕಳುಹಿಸಿದ್ದು, ಒಪ್ಪಿಗೆ ಹಂತದಲ್ಲಿದೆ. ಇದರಲ್ಲಿ ಪ್ರಯೋಗಾಲಯ, ಒಳಚರಂಡಿ ವ್ಯವಸ್ಥೆ ಇತ್ಯಾದಿ ಮೂಲಸೌಕರ್ಯಗಳಿಗೆ ವಿನಿಯೋಗವಾಗಲಿದೆ. ಈ ಮೊತ್ತ ಬಿಡುಗಡೆಯಾದರೆ ಐದೂವರೆ ವರ್ಷದ ಬಿವಿಎಸ್‌ಸಿ ಮತ್ತು ಎಎಚ್‌ ಕೋರ್ಸ್‌ ಆರಂಭವಾಗಲಿದೆ.

ಮಂಗಳೂರಿನ ನೆಲ್ಲಿಕಾಯಿ ರಸ್ತೆಯ ಮಾರ್ಕೆಟ್‌ನಲ್ಲಿ ಅತ್ಯಾಧುನಿಕ ಕೃಷಿ ಸಂಕೀರ್ಣ ನಿರ್ಮಾಣವಾಗಿಲ್ಲ. ಕೃಷ್ಯುತ್ಪನ್ನ ಮಾರುಕಟ್ಟೆ ಸಮಿತಿಯು ಕೃಷಿ ಸಂಕೀರ್ಣ ನಿರ್ಮಿಸಲು 35 ಕೋಟಿ ರು.ಗಳ ಪ್ರಸ್ತಾವನೆ ಸಿದ್ಧಪಡಿಸಿ ಸರ್ಕಾರಕ್ಕೆ ಕಳುಹಿಸಿದೆ. ಅಲ್ಲಿಂದ ಆರ್ಥಿಕ ಅನುಮತಿ ಇನ್ನೂ ಬಂದಿಲ್ಲ.

ಮಂಗಳೂರಿನಲ್ಲಿ ಬಹುಕಾಲದ ಉದ್ದೇಶಿತ ಹಜ್‌ ಭವನ ಜಾಗದ ಕೊರತೆಯಿಂದ ಕಾರ್ಯಗತಗೊಂಡಿರಲಿಲ್ಲ. ಇದಕ್ಕಾಗಿ ಪ್ರತಿ ವರ್ಷ 10 ಕೋಟಿ ರು.ಗಳನ್ನು ಸರ್ಕಾರ ಕಾದಿರಿಸುತ್ತಿದ್ದು, ಈ ಬಾರಿ ಬಜಪೆಯಲ್ಲಿ ಒಂದೂವರೆ ಎಕರೆ ಜಾಗವನ್ನು ಗುರುತಿಸಲಾಗಿದೆ. ಈ ಜಾಗ ಹಜ್‌ ಸಮಿತಿಗೆ ಹಸ್ತಾಂತರಗೊಳ್ಳಲು ಬಾಕಿ ಇದೆ. ಬಳಿಕವೇ ಹಜ್‌ ಭವನ ನಿರ್ಮಾಣಕ್ಕೆ ಚಾಲನೆ ಸಿಗಲಿದೆ. ಹಲವು ಬಜೆಟ್‌ಗಳಲ್ಲಿ ಪ್ರತಿ ಬಾರಿಯೂ ಹಜ್‌ ಭವನ ನಿರ್ಮಾಣ ಪ್ರಸ್ತಾಪವಾಗುತ್ತಲೇ ಇದೆಯೇ ವಿನಃ ಕಾರ್ಯಗತಗೊಳ್ಳುತ್ತಿರಲಿಲ್ಲ.

ಮಂಗಳೂರು ಬಂದರಿನಿಂದ ಬೆಂಗಳೂರಿಗೆ ಆರ್ಥಿಕ ಕಾರಿಡಾರ್‌ ನಿರ್ಮಾಣ ಬಗ್ಗೆ ಬಜೆಟ್‌ನಲ್ಲಿ ಪ್ರಸ್ತಾಪಿಸಲಾಗಿತ್ತು. ಆದರೆ ಅದರ ಪ್ರಾಥಮಿಕ ಸಂಗತಿಗಳೇ ಶುರುವಾಗಿಲ್ಲ. ಆರ್ಥಿಕ ಕಾರಿಡಾರ್‌ ರೂಪುಗೊಳ್ಳಬೇಕಾದರೆ ಮೊದಲು ರಾಷ್ಟ್ರೀಯ ಹೆದ್ದಾರಿ ಅಭಿವೃದ್ಧಿಯಾಗಬೇಕು. ಆದರೆ ಹಳೆ ಯೋಜನೆಗಳೇ ಮುಂದುವರಿಯುತ್ತಿದೆಯೇ ವಿನಃ ಹೊಸದಾಗಿ ಕಾರಿಡಾರ್‌ಗೆ ಹಣಕಾಸು ವಿನಿಯೋಗ ನಡೆದಿಲ್ಲ. ಈ ಬಾರಿಯಾದರೂ ಹಣಕಾಸು ನೆರವು ಒದಗಿಸುವಂತೆ ಸಂಸದರು ಮುಖ್ಯಮಂತ್ರಿಗೆ ಪತ್ರ ಬರೆದಿದ್ದಾರೆ.

ಇದಲ್ಲದೆ ಮಹಾತ್ಮಾಗಾಂಧಿ ನಗರ ವಿಕಾಸ್‌ ಯೋಜನೆಯಡಿ ಮಂಗಳೂರು ಮಹಾನಗರ ಪಾಲಿಕೆಗೆ 200 ಕೋಟಿ ರು. ಘೋಷಣೆಯಾಗಿತ್ತು. ಇದರ ಪ್ರಸ್ತಾವನೆ ಸರ್ಕಾರಕ್ಕೆ ಸಲ್ಲಿಕೆಯಾದರೂ ಹಣಕಾಸು ಬಿಡುಗಡೆ ಆಗಲಿಲ್ಲ.

-ಸಮುದ್ರ ಆ್ಯಂಬುಲೆನ್ಸ್‌ ಬಗ್ಗೆ ಘೋಷಣೆಯಾಗಿದ್ದರೂ ಕಾರ್ಯಗತವಾಗಿಲ್ಲ. ಸಮುದ್ರದಲ್ಲಿ ಅನಾರೋಗ್ಯ ಪೀಡಿತರ ನೆರವಿಗೆ ಧಾವಿಸುವ ಆ್ಯಂಬುಲೆನ್ಸ್‌ ಇದು. ಇದಕ್ಕಾಗಿ 3 ಕೋಟಿ ರು. ಘೋಷಿಸಿದರೂ ಅದೀಗ 1 ಕೋಟಿ ರು. ಮರು ನಿಗದಿಯಾಗುತ್ತಿದೆ.

ಈ ವರ್ಷದ ಬಜೆಟ್‌ ನಿರೀಕ್ಷೆ(2025-26)

-ದ.ಕ.ಜಿಲ್ಲೆಗೆ ಸರ್ಕಾರಿ ಮೆಡಿಕಲ್‌ ಕಾಲೇಜು ಕೆಲವು ವರ್ಷಗಳ ಬೇಡಿಕೆ. ಈ ಬಾರಿ ಅದನ್ನು ಬಜೆಟ್‌ನಲ್ಲಿ ಸರ್ಕಾರ ಘೋಷಣೆ ಮಾಡುತ್ತದೆ, ಅದು ಕೂಡ ಪುತ್ತೂರಿಗೆ ಮಂಜೂರುಗೊಳ್ಳಬೇಕು ಎಂಬ ಪ್ರಬಲ ಒತ್ತಾಯ ಪುತ್ತೂರಿನ ಶಾಸಕರದ್ದು.

-ಕರಾವಳಿಯಲ್ಲಿ ಅಡಕೆ ಬೆಳೆಗೆ ತಗಲಿರುವ ಎಲೆಚುಕ್ಕಿ ರೋಗ, ಹಳದಿ ಎಲೆರೋಗ ಹತೋಟಿಗೆ ಕ್ರಮ ಹಾಗೂ ಬೆಳೆಗಾರರಿಗೆ ಆರ್ಥಿಕ ಪರಿಹಾರ.

-ಬಹುವರ್ಷದ ಬೇಡಿಕೆಯಾದ ಜಿಲ್ಲಾ ರಂಗಮಂದಿರಕ್ಕೆ ನೆರವು, ಕ್ರಿಕೆಟ್‌ ಸ್ಟೇಡಿಯಂ ನಿರ್ಮಾಣ.