ಅತಿವೃಷ್ಟಿ, ಸಂಕಷ್ಟದಲ್ಲೇ ವರ್ಷ ಸವೆಸಿದ ಹಾವೇರಿ ಅನ್ನದಾತ

ನಾರಾಯಣ ಹೆಗಡೆ

ವರ್ಷಾರಂಭದಲ್ಲಿ ಭೀಕರ ಬರ, ಜೂನ್‌ ಬಳಿಕ ನಿಲ್ಲದ ಮಳೆ, ನೆರೆಯಿಂದ ಬೆಳೆ ಹಾನಿ, ಕೊಚ್ಚಿ ಹೋದ ರೈತರ ಬದುಕು... ಹೀಗೆ ಜಿಲ್ಲೆಯ ಅನ್ನದಾತನ ಪಾಲಿಗೆ ನೆಮ್ಮದಿಯಿಲ್ಲದ ವರ್ಷದ ಸಾಲಿಗೆ 2024ನೇ ಇಸ್ವಿ ಕೂಡ ಸೇರಿತು. ನ್ಯಾಯಯುತವಾಗಿ ಬರಬೇಕಿದ್ದ ಪರಿಹಾರಕ್ಕೂ ರೈತರು ಬೀದಿಗಿಳಿದು ಹೋರಾಟ ನಡೆಸುವ ಪರಿಸ್ಥಿತಿ ಬಂದಿರುವುದು ದುರ್ದೈವದ ಸಂಗತಿ.

ಅಪಾರ ಹಾನಿ: ಪ್ರಸಕ್ತ ವರ್ಷ ಜೂನ್ ತಿಂಗಳಲ್ಲಿ ಆದ ಅತಿವೃಷ್ಟಿಯಿಂದ ಜಿಲ್ಲೆಯ ವರದಾ, ತುಂಗಭದ್ರಾ ನದಿಗಳ ಹರಿವಿನ ಪ್ರಮಾಣ ಹೆಚ್ಚಾಗಿ ನದಿ ತೀರದ ಜಮೀನುಗಳು ಜಲಾವೃತಗೊಂಡು ಅಪಾರ ಪ್ರಮಾಣದಲ್ಲಿ ಬೆಳೆಗಳು ಹಾನಿಗೊಂಡು ರೈತರು ಸಂಕಷ್ಟ ಎದುರಿಸುವಂತಾಯಿತು. ಅತಿವೃಷ್ಟಿಯಿಂದಾಗಿ ಜಿಲ್ಲೆಯಲ್ಲಿ ಅಂದಾಜು ₹೨೮೦.೮೪ ಲಕ್ಷ ಮೊತ್ತದ ೩೮೨೮ ರೈತರ ೩೩೦೪ ಹೆಕ್ಟೇರ್ ಕೃಷಿ ಬೆಳೆ ಹಾಗೂ ₹೪೫೧.೧೬ ಲಕ್ಷ ಮೊತ್ತದ ೧೧೮೯ ರೈತರ ೪೭೪.೯೦ ಹೆಕ್ಟೇರ್ ತೋಟಗಾರಿಕೆ ಬೆಳೆ ಹಾನಿಯಾಗಿದೆ. ಮಳೆಯಿಂದ ಐದು ಮನೆಗಳು ಸಂಪೂರ್ಣ, ೧೧ ಮನೆಗಳಿಗೆ ತೀವ್ರಹಾನಿ, ೧೪೪೪ ಮನೆಗಳಿಗೆ ಭಾಗಶಃ ಹಾನಿ ಸೇರಿ ೧೪೬೦ ಮನೆಗಳಿಗೆ ಹಾನಿಯಾಗಿದೆ. ೧೫ ದನದ ಕೊಟ್ಟಿಗೆಗಳಿಗೆ ಹಾನಿಯಾಗಿದೆ ಹಾಗೂ ೧೩ ರಸ್ತೆ ಸಂಪರ್ಕಗಳು ಕಡಿತಗೊಂಡವು.

ರೈತರ ಹೋರಾಟ: ಜಿಲ್ಲೆಯಲ್ಲಿ ಬರ, ನಿರಂತರ ಅತಿವೃಷ್ಟಿಗೆ ಸಿಲುಕಿದ ಅನ್ನದಾತರ ಸಂಕಷ್ಟಕ್ಕೆ ತಕ್ಷಣ ಸ್ಪಂದನೆ ದೊರೆಯಬೇಕಿತ್ತು. ಸರ್ಕಾರ ರೈತರಿಗೆ ನೆರವು ನೀಡಬೇಕಿತ್ತು. ಆದರೆ, ಹೋರಾಟ ಮಾಡದೇ ಏನೂ ಸಿಗುವುದಿಲ್ಲ ಎಂಬ ಪರಿಸ್ಥಿತಿ ನಿರ್ಮಾಣವಾಗಿರುವುದರಿಂದ ಮೊದಲೇ ಸಂಕಷ್ಟದಲ್ಲಿರುವ ರೈತರು ಪರಿಹಾರಕ್ಕೂ ಬೀದಿಗಿಳಿಯುವ ಪರಿಸ್ಥಿತಿ ಬಂದಿರುವುದು ಖೇದಕರ ಸಂಗತಿ. ತಮ್ಮ ಬೇಡಿಕೆಗಳ ಈಡೇರಿಕೆಗಾಗಿ ರೈತರು ಈ ವರ್ಷ ಎರಡು ಬಾರಿ ಜಿಲ್ಲಾಡಳಿತ ಭವನದ ಎದುರು ಅಹೋರಾತ್ರಿ ಧರಣಿ ಸತ್ಯಾಗ್ರಹ ನಡೆಸಿದರು. ಜನವರಿ ತಿಂಗಳಲ್ಲಿ ೬ ದಿನ ಹೋರಾಟ ನಡೆಸಿದ ರೈತರು ಗಣರಾಜ್ಯೋತ್ಸವದ ಧ್ವಜಾರೋಹಣ ನಮ್ಮಿಂದಲೇ ಎಂದು ಗುಡುಗಿದ್ದರು. ಇದರ ಬೆನ್ನಲ್ಲೇ ಜಿಲ್ಲಾ ಉಸ್ತುವಾರಿ ಸಚಿವರು, ಶಾಸಕರು ರೈತ ನಾಯಕರನ್ನು ಕರೆಸಿ ಬೇಡಿಕೆ ಈಡೇರಿಸುವ ಭರವಸೆ ಮೇರೆಗೆ ಧರಣಿ ಹಿಂಪಡೆದಿದ್ದರು. ಅದರ ಮುಂದುವರಿದ ಭಾಗ ಡಿ. ೭ರಿಂದ ೧೨ ದಿನಗಳ ಕಾಲ ಮತ್ತೆ ಧರಣಿ ನಡೆಸಿದ್ದರು. ಇದರ ಪರಿಣಾಮ ಸರ್ಕಾರದ ಭಾಗವಾದ ಸಚಿವರು ರೈತ ನಾಯಕರನ್ನು ಬೆಳಗಾವಿ ಅಧಿವೇಶನ ಸ್ಥಳಕ್ಕೆ ಕರೆಸಿಕೊಂಡು ಸೌಹಾರ್ದ ಮಾತುಕತೆ ನಡೆಸಿ ಬೇಡಿಕೆ ಈಡೇರಿಸುವ ಭರವಸೆ ನೀಡಿದರು. ಆದರೆ ವರ್ಷ ಪೂರ್ಣಗೊಂಡರೂ ರೈತರ ಬೇಡಿಕೆ ಇನ್ನೂ ಬೇಡಿಕೆಯಾಗಿಯೇ ಉಳಿದಿರುವುದು ದೌರ್ಭಾಗ್ಯವೇ ಸರಿ. ಈ ವರ್ಷದ ಕಹಿ ಘಟನೆಗಳನ್ನು ಮರೆತು 2025ನೇ ಇಸ್ವಿ ಸುಖಮಯವಾಗಿರಲಿ ಎಂಬ ಆಶಯದೊಂದಿಗೆ ರೈತರು ಹೊಸ ವರ್ಷದ ಸ್ವಾಗತಕ್ಕೆ ಅಣಿಯಾಗಿದ್ದಾರೆ.