ಬನಶಂಕರಿದೇವಿ ಭಾವೈಕ್ಯತಾ ಜಾತ್ರಾ ಮಹೋತ್ಸವ

ಕನ್ನಡಪ್ರಭ ವಾರ್ತೆ ಅಮೀನಗಡ

ಗ್ರಾಮದ ಮುಸ್ಲಿಂ ಸಮಾಜ ಬಾಂಧವರಿಂದ ಗರುಡಪಠ ಕಟ್ಟುವ ಮೂಲಕ ಜಾತ್ರೆಗೆ ಚಾಲನೆ ದೊರೆತು, ದಲಿತ ಸಮಾಜ ಬಾಂಧವರಿಂದ ಶ್ರೀದೇವಿಗೆ ಅಭಿಷೇಕ, ಸರ್ವಸಮಾಜ ಭಾಂಧವರೂ ಬಾಬುಗಳ ಮೂಲಕ ಶ್ರೀದೇವಿಯಸೇವೆ ಸಲ್ಲಿಸುವ ಮೂಲಕ ಭಾವೈಕ್ಯತಾ ಜಾತ್ರಾ ಆಚರಿಸಲಾಗುತ್ತಿದೆ. ಜಾತ್ರಾ ಸುವರ್ಣ ಮಹೋತ್ಸವದ ಯಶಸ್ವಿಗಾಗಿ ಜಾತ್ರಾ ಸಮಿತಿ ಗ್ರಾಮಸ್ಥರ ಅಭಿಪ್ರಾಯ, ಸಲಹೆ, ಸೂಚನೆಗಳಿಗಾಗಿ ಪೂರ್ವಭಾವಿ ಸಭೆ ಕರೆದಿತ್ತು. ಜಾತ್ರಾ ಸಮಿತಿ ಸುವರ್ಣ ಮಹೋತ್ಸವ ವೈವಿದ್ಯತೆಯಿಂದ ಆಚರಿಸಲು ನಿರ್ಧರಿಸಿತು.

ಮಾಜಿ ಶಾಸಕ, ಬನಶಂಕರೀದೇವಿ ಭಾವೈಕ್ಯತಾ ಜಾತ್ರಾ ಮನರಂಜನಾ ಸಮಿತಿ ಅಧ್ಯಕ್ಷ ಎಸ್.ಜಿ.ನಂಜಯ್ಯನಮಠ ಮಾತನಾಡಿ, ಇದು ಜಾತ್ಯಾತೀತ, ಪಕ್ಷಾತೀತ ಸುವರ್ಣ ಮಹೋತ್ಸವವಾಗಿದ್ದು. ಯಶಸ್ವಿಗೊಳಿಸುವ ನಿಟ್ಟಿನಲ್ಲಿ, ಐದು ಅರ್ಥಪೂರ್ಣ ಕಾರ್ಯಕ್ರಮ ಜರಗುವುದು, ಸ್ಮರಣೆ ಸಂಚಿಕೆ ಬಿಡುಗಡೆ, ಜಾತ್ಯಾತೀತ ಅಡಿಗಲ್ಲು ಹಾಕಿದ ಹಿಂದಿನ ಹಿರಿಯರ ಪುಣ್ಯಸ್ಮರಣೆ, ನಾಟಕೋತ್ಸವ, ಕ್ರೀಡೋತ್ಸವ, ಸಾಮೂಹಿಕ ವಿವಾಹ, ಮನರಂಜನಾ ಕಾರ್ಯಕ್ರಮ, ರೈತಗೋಷ್ಠಿ, ಗ್ರಾಮದಲ್ಲಿ ಸಾಧನೆಗೈದವರಿಗೆ ಗೌರವ ಸನ್ಮಾನ, ವಿವಿಧ ಧಾರ್ಮಿಕ ಗುರುಗಳಿಗೆ, ವಿವಿಧ ಪಕ್ಷಗಳ ಮುಖಂಡರಿಗೆ,ನಾಡಿನ ಶ್ರೇಷ್ಠ ಚಿಂತಕರು, ಅನುಭಾವಿಗಳಿಗೆ ಆಹ್ವಾನ ಮಾಡಲಾಗುವುದು. ಪ್ರತಿದಿನ ಒಂದು ಹೊತ್ತು ದಾಸೋಹ ಏರ್ಪಡಿಸಲಾಗುವುದು, ಕಾರ್ಯಕ್ರಮದ ಸಂಪೂರ್ಣ ಯಶಸ್ಸಿಗೆ 31 ವಿವಿಧ ಸಮಿತಿಗಳ ರಚನೆ ಮಾಡಲಾಗುವುದು ಎಂದರು. ಗ್ರಾಮಸ್ಥರು ಚಪ್ಪಾಳೆ ತಟ್ಟುವ ಮೂಲಕ ಒಪ್ಪಿಗೆ ಸೂಚಿಸಿದರು.