ಬಸವಣ್ಣ ಕಾಲುವೆ ತ್ಯಾಜ್ಯ ಹೊರ ಹಾಕುವ ಸಾಹಸ

ಹೊಸಪೇಟೆ: ನಗರದ ಹೃದಯ ಭಾಗದಲ್ಲಿರುವ ಮೂರಂಗಡಿ ವೃತ್ತದಲ್ಲಿ ಬಸವಣ್ಣ ಕಾಲುವೆ ನೀರಿನ ಹರಿದಾಟ ತಪ್ಪಿಸಲು ನಗರಸಭೆ, ನೀರಾವರಿ ಇಲಾಖೆಯ ಅಧಿಕಾರಿಗಳು ಏದುಸಿರು ಬೀಡುವಂತಾಗಿದೆ.

ಕನ್ನಡಪ್ರಭ ದಿನಪತ್ರಿಕೆ "ಹೊಸಪೇಟೆ ಹೃದಯ ಭಾಗದಲ್ಲೇ ಕಾಲುವೆ ನೀರು " ಎಂಬ ಶೀರ್ಷಿಕೆಯಡಿ ಗುರುವಾರ ವರದಿ ಪ್ರಕಟಿಸಿತ್ತು. ಈ ವರದಿ ಹಿನ್ನೆಲೆ ಶಾಸಕರು ಕೂಡ ಭೇಟಿ ನೀಡಿ ಪರಿಶೀಲಿಸಿ, ಅಧಿಕಾರಿಗಳಿಗೆ ತ್ಯಾಜ್ಯ ತೆರವು ಮಾಡಲು ಸೂಚಿಸಿದರು.

ಬಸವಣ್ಣ ಕಾಲುವೆಯಲ್ಲಿ ಒಂದು ಲಾರಿಯಷ್ಟು ಬಿಯರ್‌ ಬಾಟಲಿಗಳು ದೊರೆತಿವೆ. ಇನ್ನು ದೀಪಾವಳಿ, ದಸರಾ ಹಬ್ಬದ ವೇಳೆ ಮಾರಾಟ ಮಾಡಲಾದ ಬಾಳೆ ಕಂಬಗಳು, ಮಾವಿನ ಎಲೆ, ಕಬ್ಬು ಸೇರಿದಂತೆ ವಿವಿಧ ಹೂವಿನ ತ್ಯಾಜ್ಯ ಕೂಡ ಹೊರ ಬಂದಿದೆ. ಐದು ಮೀಟರ್‌ ಅಳದಲ್ಲಿ ಇನ್ನೂ ಮೂರು ಮೀಟರ್‌ನಷ್ಟು ತ್ಯಾಜ್ಯ ಸೇರಿಕೊಂಡಿದೆ. ಅನ್ಯ ಮಾರ್ಗ ಇಲ್ಲದೇ ಈಗ ನೀರು ನಿಲ್ಲಿಸಿ, ನೀರಾವರಿ ಇಲಾಖೆ ಅಧಿಕಾರಿಗಳು ಕಾರ್ಯಾಚರಣೆ ಮುಂದುವರೆಸಿದ್ದಾರೆ.

ಈ ಕಾಲುವೆಗೆ ಡಿಸೆಂಬರ್‌ ಹಾಗೂ ಜನವರಿ ತಿಂಗಳೊಳಗೆ ಹೊದಿಕೆ ಹಾಕುವ ಆಲೋಚನೆ ಕೂಡ ಹೊಂದಲಾಗಿದೆ. ತ್ಯಾಜ್ಯ ಹಾಗೂ ಕಸ ಕಾಲುವೆಯಲ್ಲಿ ಹಾಕದಂತೆ ನಗರಸಭೆಯಿಂದ ಜಾಗ್ರತೆ ಮೂಡಿಸುವ ಕೆಲಸ ನಡೆಸಲಿ ಎಂದು ನೀರಾವರಿ ಇಲಾಖೆಯ ಅಧಿಕಾರಿ ಜಾನ್ಕರ್‌ ಕೋರಿದ್ದಾರೆ.