ಕುಡಿವ ನೀರಿನ ಸಮಸ್ಯೆ ಉದ್ಭವಿಸದಂತೆ ಎಚ್ಚರ ವಹಿಸಿ

ಬ್ಯಾಡಗಿ: ಗ್ರಾಪಂ ವಂತಿಕೆ ಹಣದಿಂದ ಬರ ನಿರ್ವಹಣೆ ಮಾಡಬೇಕು. ನೀರಿನ ಸಮಸ್ಯೆ ಉದ್ಭವಿಸದಂತೆ ಅಧಿಕಾರಿಗಳು ಎಚ್ಚರವಹಿಸಬೇಕು, ನಿರ್ಲಕ್ಷ್ಯ ಮಾಡಬಾರದು ಎಂದು ಶಾಸಕ ಬಸವರಾಜ ಶಿವಣ್ಣನವರ ಸೂಚಿಸಿದರು.

ಕೇವಲ ಸರ್ಕಾರದ ಹಾಗೂ ಶಾಸಕರ ಕೆಲಸ ಮಾತ್ರವಲ್ಲ, ಸರ್ಕಾರದ ಕಡೆಗೆ ಬೊಟ್ಟು ಮಾಡಿ ತೋರಿಸದೇ ಸರ್ವ ಸದಸ್ಯರು, ಅಧ್ಯಕ್ಷರು, ಉಪಾಧ್ಯಕ್ಷರು ಪಿಡಿಒಗಳು ಹಾಗೂ ತಾಲೂಕು ಮಟ್ಟದ ಅಧಿಕಾರಿಗಳು ಒಟ್ಟಾಗಿ ಅನ್ಯೋನ್ಯತೆಯಿಂದ ಕೂಡಿಕೊಂಡು ಎಲ್ಲರೂ ಕೈಜೋಡಿಸಿ ಮಳೆಗಾಲ ಬರುವ ವರೆಗೆ ನೀರಿನ ಸಮಸ್ಯೆ ಬಾರದಂತೆ ಬರಗಾಲವನ್ನು ಎದುರಿಸೋಣ. ಜನರಿಗೆ ಅನೂಕೂಲವಾಗುವಂತ ಕೆಲಸಗಳಿದ್ದಲ್ಲಿ ೨೪ ಗಂಟೆಗಳ ಕಾಲ ನಾವು ನೀವು ಕೂಡಿಕೊಂಡು ಸೇವಾಮನೋಭಾವ ಇಟ್ಟುಕೊಂಡು ನಮ್ಮ ಮನೆಯ ಕೆಲಸವೆಂದು ಜನಸೇವೆ ಮಾಡುವಂತೆ ಸೂಚಿಸಿದರು.

ಜೆಜೆಎಂನಿಂದ ಸರಿಯಾಗಿ ನೀರು ಬರುತ್ತಿಲ್ಲ, ಅರ್ಧ ಗಂಟೆಗೊಂದು ಕೊಡ ತುಂಬುತ್ತದೆ. ಆಮೆಗತಿಯಲ್ಲಿ ಕೆಲಸ ನಡೆಯುತ್ತಿದೆ. ಎಲ್ಲೆಂದರಲ್ಲಿ ರಸ್ತೆ ಒಡೆದಿರುವುದರಿಂದ ಜನರಿಗೆ ಒಡಾಡುವುದು ತೀವ್ರ ತೊಂದರೆಯಾಗಿದೆ ಎಂದು ಗ್ರಾಪಂ ಅಧ್ಯಕ್ಷರು ಶಾಸಕರೆದುರು ತಮ್ಮ ಅಳಲು ತೋಡಿಕೊಂಡರು.

ಸಭೆಗೆ ಗೈರಾದ ಪಿಡಿಒಗಳಿಗೆ ನೊಟೀಸ್ ನೀಡುವಂತೆ ತಾಪಂ ಇಒ ಅವರಿಗೆ ಆದೇಶಿಸಿದರು.

ತಾಪಂ ಇಒ ಎಂ. ಮಲ್ಲಿಕಾರ್ಜುನ, ಸುಮಲತಾ, ತಹಸೀಲ್ದಾರ್ ಫಿರೋಜ್‌ಶಾ ಸೋಮನಕಟ್ಟಿ, ಜಿಪಂ ಎಇಇ ಸುರೇಶ ಬೇಡರ, ಬ್ಯಾಡಗಿ ವಿಧಾನಸಭಾ ಕ್ಷೇತ್ರದ ಪಿಡಿಒಗಳು, ತಾಲೂಕುಮಟ್ಟದ ಅಧಿಕಾರಿಗಳು, ಶಾಸಕರ ಆಪ್ತ ಸಹಾಯಕ ಪೀರ್‌ಸಾಬ್‌ ನದಾಫ್‌, ಬಸವರಾಜ ಇನ್ನಿತರರು ಇದ್ದರು.ಎಚ್೯-ಬ್ಯಾಡಗಿ೧-ಬ್ಯಾಡಗಿ ಪಟ್ಟಣದ ತಾಲೂಕು ಪಂಚಾಯಿತಿ ಸುವರ್ಣ ಸೌಧದಲ್ಲಿ ಶನಿವಾರ ಜರುಗಿದ ಬರಗಾಲದ ವಿಶೇಷ ಸಭೆಯಲ್ಲಿ ಶಾಸಕ ಬಸವರಾಜ ಶಿವಣ್ಣನವರ ಮಾತನಾಡಿದರು.