ಸತತ ಮಳೆಗೆ 1200 ಎಕರೆ ಅಡಕೆ ತೋಟದಲ್ಲಿ ಕೊಳೆ ರೋಗ

- 115 ಇಂಚು ಮಳೆ । ಸಂಕಷ್ಟದಲ್ಲಿ ಅಡಕೆ ಬೆಳೆಗಾರರು । ಪರಿಹಾರ ನೀಡುವಂತೆ ಸರ್ಕಾರಕ್ಕೆ ಆಗ್ರಹ

ಕನ್ನಡಪ್ರಭ ವಾರ್ತೆ, ನರಸಿಂಹರಾಜಪುರ

ನರಸಿಂಹರಾಜಪುರ ತಾಲೂಕಿನ ಕಸಬಾ ಹೋಬಳಿ ಮುತ್ತಿನಕೊಪ್ಪ, ಕಡಹಿನಬೈಲು, ಮೆಣಸೂರು, ನಾಗಲಾಪುರ ಗ್ರಾಮ ಪಂಚಾಯಿತಿಗಳಲ್ಲಿ ಸಾಮಾನ್ಯವಾಗಿ ಪ್ರತಿ ವರ್ಷ 60 ರಿಂದ 65 ಇಂಚು ಮಳೆಯಾಗುತ್ತಿತ್ತು. ಇದರಿಂದ ಈ ಬಾಗದ ಗ್ರಾಮಗಳ ಅಡಕೆ ತೋಟಗಳಲ್ಲಿ ಹೆಚ್ಚಾಗಿ ಕೊಳೆ ರೋಗ ಕಾಣಿಸುತ್ತಿರಲಿಲ್ಲ. ಈ ವರ್ಷ 115 ಇಂಚು ಮಳೆ ಸುರಿದಿದ್ದು ಕಳೆದ ವರ್ಷಕ್ಕಿಂತ ಎರಡು ಪಟ್ಟು ಮಳೆಯಾಗಿದೆ. ಕಸಬಾ ಹೋಬಳಿ ಸೂಸಲವಾನಿ, ಮೂಡಬಾಗಿಲು, ಆಲಂದೂರು, ಶೆಟ್ಟಿಕೊಪ್ಪ, ನಾಗಲಾಪುರ,ದ್ವಾರಮಕ್ಕಿ, ಬಣಗಿ, ನೇರ್ಲೆಕೊಪ್ಪ, ಅರಸಿನಗೆರೆ, ಮಂಜಿನಕೊಪ್ಪ ಸೇರಿದಂತೆ ಹಲವಾರು ಗ್ರಾಮಗಳ ಅಡಕೆ ತೋಟಗಳಲ್ಲಿ ಕೊಳೆ ರೋಗ ಕಾಣಿಸಿಕೊಂಡಿದೆ.

ಸಾಮಾನ್ಯವಾಗಿ ಕಸಬಾ ಹೋಬಳಿಯಲ್ಲಿ ಮಳೆ ಕಡಿಮೆ ಬೀಳುತ್ತಿರುವುದರಿಂದ ಅಡಕೆ ಬೆಳೆಗಾರರು ಜುಲೈ ಪ್ರಾರಂಭದಿಂದ ಕೊಳೆ ರೋಗ ಬಾರದಂತೆ ಬೋರ್ಡೋ ಮಿಶ್ರಣ ಸಿಂಪಡಣೆ ಮಾಡುತ್ತಿದ್ದರು. ಆದರೆ, ಈ ವರ್ಷ ಜುಲೈನಲ್ಲಿ ಪ್ರಾರಂಭವಾದ ಮಳೆ ಎಡೆ ಬಿಡದೆ ಒಂದು ತಿಂಗಳು ಸುರಿದಿದೆ. ಬೆಳೆಗಾರರಿಗೆ ಬೋರ್ಡೋ ಮಿಶ್ರಣ ಸಿಂಪಡಣೆ ಮಾಡಲು ಸಮಯವೇ ಸಿಗಲಿಲ್ಲ. ಕೆಲವು ಅಡಕೆ ಬಳೆಗಾರರು ಮಳೆಯಲ್ಲೇ ಬೋರ್ಡೋ ಸ್ಪ್ರೇ ಮಾಡಿದ್ದರೂ ಮಳೆಯಿಂದ ಬೋರ್ಡೋ ಮಿಶ್ರಣ ತೊಳೆದುಹೋಗಿದೆ. ಇನ್ನು ಕೆಲವು ಅಡಿಕೆ ಬೆಳೆಗಾರರು ಆಗಸ್ಟ್ ನಲ್ಲಿ ಮೊದಲನೇ ಬೋರ್ಡೋ ಮಿಶ್ರಣ ಸಿಂಪಡಣೆ ಮಾಡಿದ್ದಾರೆ. ಆದರೆ, ಮೊದಲೇ ಕೊಳೆ ರೋಗ ಬಂದಾಗಿತ್ತು. ಅಡಕೆ ಬೆಳೆಗಾರರು 2 ರಿಂದ 3 ಬಾರಿ ಬೋರ್ಡೋ ಮಿಶ್ರಣ ಸಿಂಪಡಿಸಿದರೂ ಕೊಳೆ ರೋಗ ತಡೆಗಟ್ಟಲು ಸಾಧ್ಯವಾಗಿಲ್ಲ.

ಸರ್ಕಾರ ಕೊಳೆ ರೋಗದಿಂದ ನಷ್ಟ ಉಂಟಾಗಿರುವ ಅಡಕೆ ಬೆಳೆಗಾರರಿಗೆ ಸೂಕ್ತ ಪರಿಹಾರ ನೀಡಬೇಕು ಎಂದು ಆಗ್ರಹಿಸಿದ್ದಾರೆ.

ಕಸಬಾ ಹೋಬಳಿಯ ಬಹುತೇಕ ಅಡಕೆ ತೋಟಗಳಲ್ಲಿ ಕೊಳೆ ರೋಗ ಕಾಣಿಸಿಕೊಂಡಿದೆ. ಶೇ.40 ರಿಂದ 50 ರಷ್ಟು ಅಡಕೆ ಫಸಲು ನಷ್ಟ ಉಂಟಾಗಿದೆ. ಈ ಭಾಗದ ರೈತರಿಗೆ ಅಡಕೆ ಜೀವನಾಡಿ ಬೆಳೆಯಾಗಿದೆ. ಅಡಕೆಯನ್ನೇ ನಂಬಿಕೊಂಡು ಬದುಕುತ್ತಿದ್ದಾರೆ. ಕಳೆದ 50 ವರ್ಷ ಇತಿಹಾಸದಲ್ಲೇ ಇಷ್ಟು ದೊಡ್ಡ ಮಟ್ಟದಲ್ಲಿ ಈ ಭಾಗದಲ್ಲಿ ಕೊಳೆ ರೋಗ ಬಂದಿರಲಿಲ್ಲ. ಪ್ರತಿ ಅಡಕೆ ಮರದಲ್ಲಿ ಕೆಳಗೆ ಇರುವ ಅಡಕೆ ಕೊನೆ ಚೆನ್ನಾಗಿದ್ದು ಮೇಲೆ ಇರುವ ಅಡಕೆ ಕೊನೆಗೆ ಕೊಳೆ ರೋಗ ಬಂದಿದೆ.

-- ಕೋಟ್ --

-- ಗಾಂಧಿ ಗ್ರಾಮ ನಾಗರಾಜ,

-- ಕೋಟ್‌ ---

-- ಅಂಬರೀಶ್‌ ಆಲಂದೂರು