ಜೋಡೆತ್ತಿನ ಗಾಡಿ ಓಟ ಸ್ಪರ್ಧೆ: ಬಹುಮಾನ ವಿತರಣೆ

- ಬಿ.ಕೆ.ಹಳ್ಳಿಯ ಶ್ರೀ ಗ್ರಾಮ ದೇವತೆ ಪ್ರಸನ್ನ ಬಂಡಿ ಪ್ರಥಮ - ಹಳೆ ಹುಬ್ಬಳ್ಳಿ ಈಚಲ ಎಲ್ಲಾಪುರ ಸಿದ್ದಾರೂಢ ಪ್ರಸನ್ನ ಬಂಡಿ ದ್ವಿತೀಯ

- - -

ಬಸವ ಜಯಂತಿ ನಿಮಿತ್ತ ನಗರದ ಶ್ರೀ ಕುಂಬಳೇಶ್ವರ 108 ಲಿಂಗೇಶ್ವರ ಸೇವಾ ಸಮಿತಿಯಿಂದ ಭಾನುವಾರ ನಗರದ ಅಮರಾವತಿ ಹತ್ತಿರದ ಸೆಂಟ್ ಅಲೋಷಿಯಸ್ ಕಾಲೇಜು ಸಮೀಪದ ವಿಶಾಲ ಪ್ರದೇಶದಲ್ಲಿ ಜೋಡೆತ್ತಿನ ಖಾಲಿ ಗಾಡಿ ಓಡಿಸುವ ಸ್ಪರ್ಧೆ ನಡೆಯಿತು.

ಹಾವೇರಿ, ಧಾರವಾಡ, ಗದಗ, ಬಾಗಲಕೋಟೆ, ರಾಯಚೂರು ಸೇರಿದಂತೆ ಹರಿಹರ ತಾಲೂಕು ಮತ್ತು ರಾಜ್ಯದ ನಾನಾ ಭಾಗಗಳಿಂದ 36ಕೂ ಹೆಚ್ಚು ಜತೆ ಹೋರಿ-ಗಾಡಿಗಳನ್ನು ರೈತರು ಸ್ಪರ್ಧೆಗಾಗಿ ಕರೆತಂದಿದ್ದರು. ಬಂಡಿಯ ನೊಗಕ್ಕೆ ಸಿಂಗರಿಸಿದ ಜೋಡೆತ್ತು ಕಟ್ಟಿ ಒಂದು ಕೈಯಲ್ಲಿ ಎತ್ತುಗಳಿಗೆ ಕಟ್ಟಿದ ಮೂಗುದಾರದ ಹಗ್ಗಗಳ ಹಿಡಿದು, ಅವು ದಾರಿ ತಪ್ಪಿ ಹೋಗದಂತೆ ಬಾರಕೋಲು ಹಿಡಿದು ಬೆದರಿಸುತ್ತಿದ್ದ ಸಾಹಸಿಗಳ ಸಾಹಸಕ್ಕೆ ಜನರು ಹುಬ್ಬೇರಿಸಿದರು. ಅತ್ಯಂತ ಕಡಿಮೆ ಸಮಯದಲ್ಲಿ ನಿಗದಿತ ಗುರಿ ತಲುಪಿ, ಪ್ರಥಮ ಬಹುಮಾನ ಗಿಟ್ಟಿಸಲು ಬಂಡಿ ಮಾಲೀಕರ ಪ್ರಯತ್ನ ಜನರನ್ನು ರಂಜಿಸಿತು.

ಪ್ರಥಮ: ಸ್ಪರ್ಧೆಯಲ್ಲಿ ಭಾಗವಹಿಸಿದ ಕರಡಿಕೊಪ್ಪ ಬಿ.ಕೆ.ಹಳ್ಳಿಯ ಶ್ರೀ ಗ್ರಾಮ ದೇವತೆ ಪ್ರಸನ್ನ ಹೆಸರಿನ ಬಂಡಿ ಪ್ರಥಮ ಸ್ಥಾನ ಗಳಿಸಿ, ₹65 ಸಾವಿರ ನಗದು ಸ್ವೀಕರಿಸಿತು. ಹಳೇ ಹುಬ್ಬಳ್ಳಿಯ ಈಚಲ ಎಲ್ಲಾಪುರ ಸಿದ್ದಾರೂಢ ಪ್ರಸನ್ನ ಹೆಸರಿನ ಬಂಡಿ ₹45 ಸಾವಿರ ಮೊತ್ತವನ್ನು ದ್ವಿತೀಯ ಬಹುಮಾನವಾಗಿ ಗಳಿಸಿತು. ಹರಿಹರ ತಾಲೂಕಿನ ಗಂಗನರಸಿ ಆಂಜನೇಯ ಪ್ರಸನ್ನ ಬಂಡಿಯು ತೃತೀಯ ಬಹುಮಾನವಾದ ₹30 ಸಾವಿರ ನಗದು ಗಳಿಸಿತು. ಸ್ಪರ್ಧೆಯಲ್ಲಿ ಭಾಗವಹಿಸಿದ ಇತರ 25 ಎತ್ತು ಹಾಗೂ ಹೋರಿಗಳ ಮಾಲೀಕರಿಗೂ ಪ್ರೋತ್ಸಾಹಕವಾಗಿ ನಗದು ಬಹುಮಾನಗಳನ್ನು ವಿತರಿಸಲಾಯಿತು.

- - -

ಹರಿಹರದ ಶ್ರೀ ಕುಂಭಳೇಶ್ವರ 108 ಲಿಂಗೇಶ್ವರ ಸೇವಾ ಸಮಿತಿಯಿಂದ ನಗರದ ಅಮರಾವತಿ ಹತ್ತಿರದ ಸೆಂಟ್ ಅಲೋಷಿಯಸ್ ಕಾಲೇಜು ಸಮೀಪದ ವಿಶಾಲ ಪ್ರದೇಶದಲ್ಲಿ ಜೋಡೆತ್ತಿನ ಖಾಲಿ ಗಾಡಿ ಓಡಿಸುವ ಸ್ಪರ್ಧೆ ಜನರನ್ನು ರಂಜಿಸಿತು.