ಚಾಟ್‌ ಸೆಂಟರ್‌ಗೆ ಗ್ರಾಹಕರ ದಾಂಗುಡಿ

ಅಜೀಜಅಹ್ಮದ ಬಳಗಾನೂರ ಹುಬ್ಬಳ್ಳಿ

ಶಾಹ ಬಜಾ‌ರ್, ದುರ್ಗದ ಬೈಲ್‌ ನಗರದ ಪ್ರಮುಖ ಮಾರುಕಟ್ಟೆ ಪ್ರದೇಶ. ಇಲ್ಲಿಗೆ ತೆರಳಿದರೆ ಬಗೆಬಗೆಯ ಬಟ್ಟೆಗಳ ಮಳಿಗೆ, ಡ್ರೈಫ್ರೂಟ್ಸ್‌, ಸ್ಟೇಷನರಿ, ಚಪ್ಪಲಿಗಳ ಮಳಿಗೆ ಹೀಗೆ ಮಾರಾಟ ಮಳಿಗೆಗಳು ಕಾಣಸಿಗುತ್ತವೆ. ಈಗ ಇದಕ್ಕೆ ಮತ್ತೊಂದು ಸೇರ್ಪಡೆಯಾಗುತ್ತಿರುವುದು ವಿವಿಧ ಚಾಟ್‌ ಸೆಂಟರ್‌ಗಳು.

ಗೋಬಿ, ನೂಡಲ್ಸ್, ಸೇವ್‌ ಪುರಿ, ಪಾನಿಪುರಿ, ಭೇಲ್‌ ಪುರಿ, ದಹಿ ಪುರಿ, ಮಸಾಲಾ ಪುರಿ, ಸುಕ್ಕಾ ಪುರಿ, ಮಸಾಲೆ ದೋಸೆ, ಬೆಣ್ಣೆ ಮಸಾಲೆ ದೋಸೆ, ಖಾಲಿ ದೋಸೆ, ಸೆಟ್‌ ದೋಸೆ, ಉತ್ತಪ್ಪ, ಇಡ್ಲಿ, ತಟ್ಟೆ ಇಡ್ಲಿ, ವಡಾ, ಟೊಮ್ಯಾಟೋ ಆಮ್ಲೇಟ್ ₹40 ರಿಂದ ₹60 ಕ್ಕೆ ದೊರೆಯುತ್ತವೆ.

ಸಂಜೆ ಚಿತ್ರಣವೇ ಬದಲು: ರಂಜಾನ್‌ ಉಪವಾಸ ವೃತಾಚರಣೆ ಆರಂಭವಾಗಿರುವುದರಿಂದಾಗಿ ಸಂಜೆಯ ವೇಳೆ ದುರ್ಗದ ಬೈಲ್‌, ಶಾಹ ಬಜಾರ್‌ನ ಚಿತ್ರಣವೇ ಬದಲಾಗುತ್ತದೆ. ಮುಸಲ್ಮಾನ್‌ ಬಾಂಧವರು ಸಂಜೆ ಉಪವಾಸ ವೃತಾಚರಣೆ (ಇಫ್ತಾರ್) ಕೈ ಬಿಡುತ್ತಾರೆ. ಬಳಿಕ ಶಾಹ ಬಜಾರ್‌ನ ಈ ಮಾರುಕಟ್ಟೆಗೆ ಸಾವಿರಾರು ಸಂಖ್ಯೆಯಲ್ಲಿ ಜನರು ಲಗ್ಗೆಯಿಟ್ಟು ತಮ್ಮಿಷ್ಟದ ತಿಂಡಿ-ತಿನಿಸು ತಿನ್ನುತ್ತಾರೆ.

ನಿತ್ಯ 10 ಸಾವಿರಕ್ಕೂ ಅಧಿಕ ಗ್ರಾಹಕರು: ರಂಜಾನ್‌ ತಿಂಗಳಲ್ಲಿ ಬಟ್ಟೆ ವ್ಯಾಪಾರಕ್ಕೆಂದು ಹುಬ್ಬಳ್ಳಿ, ಧಾರವಾಡ ಸೇರಿದಂತೆ ಬೆಳಗಾವಿ, ಗದಗ, ಹಾವೇರಿ, ಕೊಪ್ಪಳ ಸೇರಿದಂತೆ ಸುತ್ತಮುತ್ತಲಿನ ಜಿಲ್ಲೆಗಳಿಂದ ಸಾವಿರಾರು ಸಂಖ್ಯೆಯಲ್ಲಿ ಇಲ್ಲಿನ ಶಾಹ ಬಜಾರ್‌, ದುರ್ಗದಬೈಲ್‌ಗೆ ಆಗಮಿಸುತ್ತಾರೆ. ಇವರಲ್ಲಿನ ಭಾಗಶಃ ಜನರು ಇಲ್ಲಿನ ಚಾಟ್‌ ಸೆಂಟರ್‌ಗಳಿಗೆ ಆಗಮಿಸುತ್ತಾರೆ. ಉಳಿದ ದಿನಗಳಲ್ಲಿ 3-4 ಸಾವಿರ ಗ್ರಾಹಕರು ಭೇಟಿ ನೀಡುತ್ತಾರೆ. ಆದರೆ, ರಂಜಾನ್‌ ತಿಂಗಳಲ್ಲಿ ನಿತ್ಯವೂ 10 ಸಾವಿರಕ್ಕೂ ಅಧಿಕ ಗ್ರಾಹಕರು ಭೇಟಿ ನೀಡುತ್ತಿದ್ದು, ನಮಗಿಷ್ಟದ ಖಾದ್ಯದ ರುಚಿ ಸವಿದು ಹೋಗುತ್ತಿದ್ದಾರೆ ಎಂದು ಐಸ್‌ಕ್ರೀಂ ಮಾರಾಟಗಾರ ಜಬ್ಬಾರಅಲಿ ಮೊರಬ "ಕನ್ನಡಪ್ರಭಕ್ಕೆ " ತಿಳಿಸಿದರು.