ಬ್ಯಾಡಗಿ ಮಂದಿಗೆ ಅಗ್ಗದ ಬೆಲೆಯ ಮಕಮಲ್‌ ಟೋಪಿ!

ಬ್ಯಾಡಗಿ: ಕಡಿಮೆ ಬೆಲೆಗೆ ಗೃಹೋಪಯೋಗಿ ವಸ್ತುಗಳನ್ನು ನೀಡುವುದಾಗಿ ನಂಬಿಸಿ ಇದೀಗ ಸಾರ್ವಜನಿಕರ ಲಕ್ಷಾಂತರ ರು. ಲಪಟಾಯಿಸಿದ 5 ಜನರ ತಂಡವೊಂದು ಪರಾರಿಯಾದ ಘಟನೆ ಪಟ್ಟಣದಲ್ಲಿ ಬೆಳಕಿಗೆ ಬಂದಿದೆ.

ತಮಿಳುನಾಡು ಮೂಲದ ನಾಲ್ಕೈದು ವ್ಯಕ್ತಿಗಳ ತಂಡವೊಂದು ಇಲ್ಲಿನ ವಿನಯ ವಾಲಿಶೆಟ್ಟರ ಎಂಬುವರಿಗೆ ಸೇರಿದ ಕಟ್ಟಡವೊಂದನ್ನು ಬಾಡಿಗೆ ಪಡೆದುಕೊಂಡು, ಕಳೆದೊಂದು ತಿಂಗಳ ಹಿಂದಷ್ಟೇ ಬೋಗಸ್ ಜಿಎಸ್‌ಟಿ ನಂಬರ್‌ ಹೊಂದಿರುವ ಟಿ.ಆರ್.ಟ್ರೇಡರ್ಸ ಎಂಬ ಹೆಸರಿನ ಮೇಲೆ ಪುರಸಭೆಯಿಂದ ವ್ಯಾಪಾರಕ್ಕೆ ಅನುಮತಿ ಪಡೆದಿದ್ದರು.

ಮುಗಿಬಿದ್ದ ಜನರು: ಹಣದೊಂದಿಗೆ ನಾಪತ್ತೆಯಾದ ವದಂತಿ ಪಟ್ಟಣದಲ್ಲಿ ಹರಡುತ್ತಿದ್ದಂತೆ ಟಿ.ಆರ್.ಟ್ರೇಡರ‍್ಸ ಅಂಗಡಿ ಎದುರು ನೂರಾರು ಜನರು ಜಮಾಯಿಸಿದರು. ಏಕಾಏಕಿ ಅಂಗಡಿ ಬಾಗಿಲು ಹಾಕಿದ್ದನ್ನು ಕಂಡು ಆಕ್ರೋಶ ಹೊರಹಾಕಿದರು. ಇನ್ನೂ ಕೆಲವರು ಮುಂದೇನು..? ಎಂಬ ಚಿಂತೆಯಲ್ಲಿದ್ದು ಸದರಿ ವಿಷಯವನ್ನು ಪೋಲಿಸರಿಗೆ ತಿಳಿಸಿದರು. ಬಳಿಕ ಪೋಲಿಸರು ಸದರಿ ಅಂಗಡಿಗೆ ವಿಶೇಷ ಕಾವಲು ನೇಮಕ ಮಾಡಿದರು.

ಹಣ ಸಂಗ್ರಹಿಸಿ ಪರಾರಿಯಾದ ಆರೋಪಿ ಪತ್ತೆ ಮಾಡಲು ಪೋಲಿಸರು ಪುರಸಭೆಗೆ ಆತ ಪರವಾನಗಿ ಪಡೆಯಲು ಸಲ್ಲಿಸಿದ ದಾಖಲೆಗಳನ್ನು ಸಂಗ್ರಹಿಸಿದ್ದು, ಪಾನ್ ಕಾರ್ಡ್‌ ಲಭ್ಯವಾಗಿದೆ. ಅಲ್ಲದೆ ಅಂಗಡಿಯ ನಾಮಫಲಕ ಹಾಗೂ ಈ ಎಲ್ಲ ದಾಖಲೆಗಳು ಅಸಲಿಯೋ ನಕಲಿಯೋ ಎಂಬುದು ಸಮಗ್ರ ತನಿಖೆ ನಂತರ ಹೊರಬರಲಿದೆ.

ಅರ್ಧಬೆಲೆಗೆ ಗೃಹ ಬಳಕೆ ವಸ್ತುಗಳ ಆಸೆಗೆ ಬಿದ್ದು ಹಣ ಕಳೆದುಕೊಂಡ ಸುಮಾರು 200 ಕ್ಕೂ ಅಧಿಕ ಗ್ರಾಹಕರು ತಮಗೆ ತಮಿಳುನಾಡಿನ ವ್ಯಕ್ತಿಯಿಂದ ಮೋಸವಾಗಿದೆ ಎಂದು ದೂರು ಸಲ್ಲಿಸಿದ್ದಾರೆ. ಈ ಕುರಿತಂತೆ ಸಮಗ್ರ ತನಿಖೆ ನಡೆಸಿದ ನಂತರ ಎಷ್ಟು ಹಣ ಮೋಸವಾಗಿದೆ ಎಂಬ ಸತ್ಯಾಸತ್ಯತೆ ಹೊರ ಬರಲಿದೆ ಎಂದು ಸಿಪಿಐ ಮಾಲತೇಶ ಲಂಬಿ ಹೇಳಿದರು.