ದೇವೇಗೌಡರು ಕೋಮುವಾದಿಗಳ ಜೊತೆ ಸೇರಲು ಮಕ್ಕಳೇ ಕಾರಣ

ಕೋಮುವಾದಿಗಳ ಬೆಂಬಲ ಪಡೆಯದೆ ಪ್ರಧಾನಿ ಪಟ್ಟ ಬಿಟ್ಟಿದ್ದರು: ಶಿವಲಿಂಗೇಗೌಡ

ಜಾತ್ಯಾತೀತ ಸಿದ್ಧಾಂತದ ದೇವೇಗೌಡರು ಈಗ ಕೋಮುವಾದಿಗಳ ಜೊತೆ ಸೇರುವಂತಹ ಪರಿಸ್ಥಿತಿಗೆ ಬರಲು ಅವರ ಮಕ್ಕಳೇ ಕಾರಣ ಎಂದು ರಾಜ್ಯ ಆಹಾರ ಮತ್ತು ನಾಗರಿಕ ಸರಬರಾಜು ನಿಗಮದ ಅಧ್ಯಕ್ಷ ಕೆ.ಎನ್.ಶಿವಲಿಂಗೇಗೌಡ ಹೇಳಿದರು.ಕಡೂರಿನ ಸುರುಚಿ ಸಭಾಂಗಣದಲ್ಲಿ ನಡೆದ ಸುದ್ದಿಗೋಷ್ಟಿಯಲ್ಲಿ ಮಾತನಾಡಿದರು. ಕೋಮುವಾದಿಗಳ ಬೆಂಬಲ ಪಡೆಯುವುದಿಲ್ಲ ಎಂದು ಪ್ರಧಾನಿ ಪಟ್ಟ ಬಿಟ್ಟಿದ್ದ ದೇವೇಗೌಡರನ್ನು ಕೇವಲ ಮೂರು ಸ್ಥಾನಕ್ಕಾಗಿ ಅದೇ ಕೋಮುವಾದಿ ಪಕ್ಷದ ಜೊತೆ ಹೋಗುವಂತೆ ಮಾಡಿ ಪಕ್ಷವನ್ನು ದೈನೇಸಿ ಸ್ಥಿತಿಗೆ ತಂದವರು ಯಾರೆಂದು ಜನತೆಗೆ ತಿಳಿದಿದೆ. ರಾಜ್ಯಕ್ಕೆ ಬರ ಪರಿಹಾರ ನೀಡಲು ಕೇಂದ್ರ ಮೀನಾ ಮೇಷ ಎಣಿಸಿತು. ರಾಜ್ಯಕ್ಕೆ ನ್ಯಾಯವಾಗಿ ಕೊಡಬೇಕಾದ ಹಣ ಕೊಡಿಸ ಬೇಕೆಂದು ರಾಜ್ಯಸರ್ಕಾರ ಸುಪ್ರೀಂ ಕೋರ್ಟಿಗೆ ಹೋಗಿದೆ. ಒಕ್ಕೂಟ ವ್ಯವಸ್ಥೆ ಯಲ್ಲಿ ಯಾವುದೇ ರಾಜ್ಯ ತೊಂದರೆ ಗೊಳಗಾದರೆ ಕೇಂದ್ರ ಸಹಾಯಕ್ಕೆ ಧಾವಿಸಬೇಕು ಎಂದು ಸಂವಿಧಾನದಲ್ಲೆ ಉಲ್ಲೇಖವಾಗಿದೆ. ಇಷ್ಟು ಭಂಡ ಸರಕಾರವನ್ನು ನಾವು ನೋಡಿಲ್ಲ ಎಂದರು.

25ಕೆಕೆಡಿಯು3.