ಅರಸಿ ಉದ್ಯಾನ ನಿರ್ವಹಣೆ ಮರೆತ ನಗರಸಭೆ: ನಾಗರಿಕರ ಹಿಡಿಶಾಪ

ಎರಡು ಕಿಲೋ ಮೀಟರ್ ಉದ್ದನೆಯ ವಾಕಿಂಗ್ ರಸ್ತೆ । ಬೆಳಿಗ್ಗೆ, ಸಂಜೆ ನಾಗರಿಕರ ವಿಹಾರ

ನಗರಕ್ಕೆ ಹೊಂದಿಕೊಂಡಿರುವ ಕಂತೆನಹಳ್ಳಿ ಕೆರೆಗೂ ನಗರದಲ್ಲಿ ಉದ್ಯಾನಕ್ಕೆ ಜನರು ಹೊಂದಿಕೊಂಡಿದ್ದಾರೆ. ಶಾಸಕ ಶಿವಲಿಂಗೇಗೌಡ ಹಾಗೂ ಸಣ್ಣ ನೀರಾವರಿ ಇಲಾಖೆ ಕೆರೆಯ ಅಂಗಳದಲ್ಲಿ ‘ಅರಸಿ ಉದ್ಯಾನ’ ನಿರ್ಮಾಣದ ಜತೆಗೆ ಸುಮಾರು ಎರಡು ಕಿಲೋ ಮೀಟರ್ ಉದ್ದನೆಯ ವಾಕಿಂಗ್ ರಸ್ತೆಯನ್ನು ನಿರ್ಮಿಸಿ ಕೊಟ್ಟಿದೆ. ಇದರ ನಿರ್ವಹಣೆಯ ಜವಾಬ್ದಾರಿಯನ್ನು ನಗರಸಭೆ ಹೊತ್ತಿದೆ. ಆದರೆ ಈಗ ಅರಸಿ ಉದ್ಯಾನ ನಿರ್ವಹಣೆಯಿಲ್ಲದೆ ಸೊರಗುತ್ತಿದೆ.

ಉದ್ಯಾನದಲ್ಲಿ ಬೀದಿ ನಾಯಿಗಳ ದರ್ಬಾರು ಅಡೆತಡೆ ಇಲ್ಲದೆ ಬೆಳೆದಿರುವ ಮರಗಿಡಗಳು ಸಮತಟ್ಟು ಕಳೆದುಕೊಂಡಿರುವ ವಾಕಿಂಗ್ ರಸ್ತೆ ಕೆರೆಯ ಅಂಗಳದಲ್ಲೇ ಉದ್ಯಾನ ಇದ್ದರೂ ಕುಡಿಯುವ ನೀರಿಗೆ ವ್ಯವಸ್ಥೆ ಹಾಗೂ ಶೌಚಾಲಯ ವ್ಯವಸ್ಥೆ ಕಲ್ಪಿಸಲು ನಗರಸಭೆ ಮರೆತಿದೆ. ಅರಸಿ ಉದ್ಯಾನದಲ್ಲಿ ಹಲವು ಸಮಸ್ಯೆಗಳು ಜೀವಂತವಾಗಿವೆ.

ಅರಸಿ ಉದ್ಯಾನದ ಪರಿಸ್ಥಿತಿ ಹೇಗಿದ್ದರೂ ಉದ್ಯಾನದ ನಿರ್ವಹಣೆ ನಗರಸಭೆಯದ್ದು ಎಂದು ಸಣ್ಣ ನೀರಾವರಿ ಇಲಾಖೆ ಅಧಿಕಾರಿಗಳು ಕೈ ತೊಳೆದುಕೊಂಡಿದ್ದಾರೆ. ನಗರದ ಗಡಿಯಲ್ಲಿರುವ ಉದ್ಯಾನದತ್ತ ನಗರಸಭೆ ಆಡಳಿತದವರು ಸಹ ತಿರುಗಿ ನೋಡುತ್ತಿಲ್ಲ. ಇದು ಸಹಜವಾಗಿಯೇ ನಗರದ ಜನತೆಯ ಆಕ್ರೋಶಕ್ಕೆ ಕಾರಣವಾಗಿದೆ.