ನೀರಿಗಾಗಿ ಜಲಮೂಲಗಳ ಸಂರಕ್ಷಣೆ ಅಗತ್ಯ

ಕನ್ನಡಪ್ರಭ ವಾರ್ತೆ ಕೆಜಿಎಫ್ ಕುಡಿಯುವ ನೀರಿನ ಸಮಸ್ಯೆ ದಿನೇದಿನೇ ಹೆಚ್ಚಾಗುತ್ತಿದ್ದು, ಜಾಗತಿಕ ಮಟ್ಟದಲ್ಲಿ ಗಂಭೀರ ಸಮಸ್ಯೆಯಾಗಿ ಪರಿವರ್ತನೆಗೊಳ್ಳುತ್ತಿದೆ, ಖಾಸಗಿ ಮತು ಸಾರ್ವಜನಿಕ ನೀರಿನ ಬಳಕೆ ಹೆಚ್ಚಾಗುತ್ತಿರುವುದರಿಂದ ಜಲಮೂಲಗಳ ಸಂರಕ್ಷಣೆಗೆ ಆದ್ಯತೆ ನೀಡಬೇಕು ಎಂದು ಕೆಜಿಎಫ್‌ನ ಜೆಎಂಎಫ್‌ಸಿ ನ್ಯಾಯಾಲಯದ ಹಿರಿಯ ನ್ಯಾಯಾಧೀಶರಾದ ಮುಜಫರ್ ಎ ಮಾಂಜರಿ ತಿಳಿಸಿದರು.

ಪ್ರಧಾನ ಸಿವಿಲ್ ನ್ಯಾಯಾಧೀಶರಾದ ವಿನೋದ್‌ಕುಮಾರ್ ಮಾತನಾಡಿ, ವಿಶ್ವ ಸಂಪನ್ಮೂಲ ಸಂಸ್ಥೆಯ ವರದಿ ಪ್ರಕಾರ, ನೀರಿನ ತೀವ್ರ ಕೊರತೆಯನ್ನು ಎದುರಿಸುತ್ತಿರುವ ೧೭ ದೇಶಗಳಲ್ಲಿ ಭಾರತ ೧೩ ನೇ ಸ್ಥಾನದಲ್ಲಿದೆ, ೨೦೫೦ ರ ವೇಳೆಗೆ ನೀರಿನ ಬೇಡಿಕೆ ಶೇ೨೦-೨೫ರಷ್ಟು ಹೆಚ್ಚಾಗುವ ನಿರೀಕ್ಷೆಯಿದೆ ಎಂದರು,

ವಕೀಲದ ಸಂಘದ ಅಧ್ಯಕ್ಷರಾದ ರಾಜಗೋಪಾಲಗೌಡ ಮಾತನಾಡಿ, ೧೨೨ ವರ್ಷಗಳಷ್ಟು ಹಳೆಯದಾದ ಬೇತಮಂಗಲದ ಕೆರೆಯ ಕುಡಿವ ನೀರಿನ ಶುದ್ಧೀಕರಣ ಘಟಕವನ್ನು ಉನ್ನತೀಕರಿಸಿ ನಗರದ ೩೫ ವಾರ್ಡ್‌ಗಳ ಜನರಿಗೆ ಸಹಿ ನೀರನ್ನು ಸರಬರಾಜು ಮಾಡಲು ಕ್ಷೇತ್ರದ ಶಾಸಕರಲ್ಲಿ ಮನವಿ ಮಾಡಿದರು, ನಗರದ ಜನರು ಫ್ಲೋರೈಡ್ ನೀರು ಉಪಯೋಗಿಸುವುದರಿಂದ ಆಗುವ ದುಷ್ಪರಿಣಾಮಗಳ ಕುರಿತು ಕಳವಳ ವ್ಯಕ್ತಪಡಿಸಿದರು.

ಸಹಾಯಕ ಕಾರ್ಯ ಪಾಲಕ ಅಭಿಯಂತರರಾದ ಎ.ಆರ್. ಶಿವಕುಮಾರ್ ಮಾತನಾಡಿ, ೨೦೨೫-೨೬ ನೇ ಸಾಲಿನ ವಿಶ್ವ ಜಲ ದಿನಾಚರಣೆ ಥೀಮ್ ಬಗ್ಗೆ ಮಾತನಾಡಿ, ೧೯೦೩ ರಲ್ಲಿ ಪ್ರಾರಂಭವಾಗಿರುವ ಬೇತಮಂಗಲ ಶುದ್ಧ ಕುಡಿವ ನೀರಿನ ಘಟಕ ಪ್ರಾರಂಭವಾಗಿ ೧೨೨ ವರ್ಷಗಳು ಕಳೆದಿದ್ದು, ಅಂದಿನ ಜನಸಂಖ್ಯೆ ಅನುಗುಣವಾಗಿ ಶುದ್ಧ ನೀರಿನ ಘಟಕವನ್ನು ಪ್ರಾರಂಭಿಸಲಾಗಿತ್ತು ಎಂದರು.

ಆದರೆ ಈಗ ನಗರದ ಜನಸಂಖ್ಯೆ ೨ ಲಕ್ಷ ಮೀರಿದೆ, ನಮ್ಮ ವ್ಯಾಪ್ತಿಯಲ್ಲಿ ಆಗುವಂತಹ ಕೆಲಸವನ್ನು ಮಾಡಬಹುದು, ಶುದ್ಧೀಕರಣದ ಘಟವನ್ನು ಮೇಲ್ದರ್ಜೆಗೆ ಏರಿಸಲು ಅನುದಾನದ ಅವಶ್ಯವಿದ್ದು, ಕ್ಷೇತ್ರದ ಶಾಸಕರಿಗೆ ಮನವಿ ಮಾಡಿದ್ದೇವೆ, ಅಗತ್ಯವಿರುವ ಅನುದಾನ ಜೊತೆಗೆ ಬೇತಮಂಗಲ ಕೆರೆಯು ನೀರಿನ ಸಾಮರ್ಥ್ಯವನ್ನು ಹೆಚ್ಚಿಸಲು ಶಾಸಕರ ಗಮನಕ್ಕೆ ತಂದಿರುವುದಾಗಿ ತಿಳಿಸಿದರು.