ಬೆಳೆ ಹಾನಿ ಪರಿಹಾರ ವಿತರಣೆ ಅವ್ಯವಹಾರ: 3ನೇ ದಿನವೂ ರೈತರ ಪ್ರತಿಭಟನೆ

ತಾಲೂಕು ಕಚೇರಿ ಬಳಿ ರೈತರ ಧರಣಿ ಸ್ಥಳಕ್ಕೆ ತಹಸೀಲ್ದಾರ್ ಎಂ.ಪಿ.ಕವಿರಾಜ್ ಭೇಟಿ

ಬೆಳೆ ಪರಿಹಾರ ವಿತರಣೆಯಲ್ಲಿ ತಾಲೂಕಿನ ಕಲ್ಕೆರೆ ಗ್ರಾಮ ಪಂಚಾಯಿತಿಯಲ್ಲಿ ನಡೆದಿರುವ ಅವ್ಯವಹಾರದಲ್ಲಿ ಭಾಗಿ ಯಾಗಿರುವವರನ್ನು ಬಂಧಿಸುವವರೆಗೂ ನಾವುಗಳು ಕದಲುವುದಿಲ್ಲ ಎಂದು ರೈತರು ಹಗಲು-ರಾತ್ರಿ ಮುಂದುವರಿಸುತ್ತಿರುವ ರೈತರ ಪ್ರತಿಭಟನೆ ಮೂರನೇ ದಿನಕ್ಕೆ ಕಾಲಿಟ್ಟಿದೆ.

ಜಿಲ್ಲಾ ರೈತ ಸಂಘದ ಅಧ್ಯಕ್ಷ ಬಾಸೂರು ರವಿ, ತಾಲೂಕು ಅಧ್ಯಕ್ಷ ಕೋಡಿಹಳ್ಳಿ ಪ್ರದೀಪ್ ಮತ್ತಿತರ ರೈತ ಮುಖಂಡರು ತಹಸೀಲ್ದಾರ್ ಅವರ ಮನವಿ ತಿರಸ್ಕರಿಸಿ, ರೈತರ ಖಾತೆಗೆ ಹಣ ಪಾವತಿಸಬೇಕು ಮತ್ತು ಆರೋಪಿ ಪಾಲಾಕ್ಷಮೂರ್ತಿ ಅವರ ಜೊತೆ ಶಾಮೀಲಾಗಿರುವ ನಾಲ್ವರ ವಿರುದ್ಧ ಕಾನೂನು ಕ್ರಮ ಕೈಗೊಂಡು ಅವರ ವಿರುದ್ಧ ಎಫ್‍ಐಆರ್ ದಾಖಲಿಸಬೇಕು ಎಂಬ ಬೇಡಿಕೆ ಮುಂದಿಟ್ಟರು. ನಮ್ಮ ಈ ಬೇಡಿಕೆ ಈಡೇರುವ ತನಕ ನಾವು ಪ್ರತಿಭಟನೆಯಿಂದ ಹಿಂದೆ ಸರಿಯುವುದಿಲ್ಲ ಎಂದು ಎಚ್ಚರಿಸಿದರು.

ಪ್ರತಿಭಟನೆ ನಿರತ ರೈತರಿಗೆ 3 ದಿನಗಳಿಂದ ಒಂದು ಲೋಟ ನೀರು ಸಹ ನೀಡದ ಆಡಳಿತದ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ ರೈತರು ಅವರ ನೀರು, ತಿಂಡಿ ಬೇಡವೇ ಬೇಡ ನಮಗೆ ದಾನಿಗಳು ನೀಡುತ್ತಿರುವ ಆಹಾರ ಪದಾರ್ಥಗಳೇ ಸಾಕು ಎಂದರು.ತಾಲೂಕಿನ ಇತರೆ ಹೋಬಳಿಗಳಲ್ಲಿ ಇಂತಹ ಘಟನೆ ನಡೆದಿದ್ದರೆ ರೈತರು ಪ್ರತಿಭಟನಾ ಸ್ಥಳಕ್ಕೆ ಬಂದರೆ ಅವರ ಪರವಾಗಿಯೂ ಹೋರಾಟ ಮಾಡಿ ನ್ಯಾಯ ಕೊಡಿಸುತ್ತೇವೆ ಎಂದರು.

4ಕೆಕೆಡಿಯು1ಎ.ಕಡೂರು ಪಟ್ಟಣದ ತಾಲೂಕು ಕಚೇರಿ ಮುಂಭಾಗದಲ್ಲಿ ಪ್ರ್ರತಿಭಟನಾ ನಿರತ ರೈತರು ಅಡುಗೆ ಮಾಡಿದರು.