ಜಿಲ್ಲೆಯಲ್ಲಿ ಅಕಾಲಿಕ ಮಳೆಗೆ ಬೆಳೆ ಹಾನಿ: ರೈತರಲ್ಲಿ ಆಂತಕ

ಕನ್ನಡಪ್ರಭ ವಾರ್ತೆ ಶಿವಮೊಗ್ಗ

ಜಿಲ್ಲಾ ವ್ಯಾಪ್ತಿಯಲ್ಲಿ ಮೆಕ್ಕೆಜೋಳ ಮತ್ತು ಭತ್ತದ ಕೊಯ್ಲು ಮುಗಿಯುತ್ತಾ ಬಂದಿದ್ದು, ಮಳೆಯಿಂದ ಬಿಡುಗಡೆಯಾಗದೆ ಫಸಲನ್ನು ಉಳಿಸಿಕೊಳ್ಳಲು ರೈತರು ಕಷ್ಟಪಡುವಂತಾಗಿದೆ.

ಮುಂಗಾರು ಮಳೆ ಸಂದರ್ಭ ಸುರಿದ ಧಾರಾಕಾರ ಮಳೆ ಹಾಗೂ ನಂತರ ಸುರಿದ ಅಕಾಲಿಕಾ ಮಳೆಯಿಂದ ಮೆಕ್ಕೆಜೋಳ ಹಾಗೂ ಭತ್ತ ಫಸಲು ಹಾನಿಯಾಗಿತ್ತು.

ಬಿಸಿಲಿನಲ್ಲಿ ಮೆಕ್ಕೆಜೋಳ ಬೀಜ ಒಣಗಿದರೆ ಮಾತ್ರ ಗುಣಮಟ್ಟವನ್ನು ಕಾಯ್ದುಕೊಳ್ಳಬಹುದು. ಇಲ್ಲದಿದ್ದರೆ ಮೆಕ್ಕೆಜೋಳವನ್ನು ಕೊಳ್ಳುವವರೆ ಇಲ್ಲದಂತಾಗುತ್ತದೆ ಎಂದು ಬೆಳೆಗಾರರು ಆತಂಕ ವ್ಯಕ್ತಪಡಿಸುತ್ತಿದ್ದಾರೆ.

ಮೋಡದ ಮುನ್ಸೂಚನೆ ಸಿಕ್ಕಿದ ತಕ್ಷಣ ಕೆಲ ರೈತರಂತೂ ಸಿಕ್ಕಿದಷ್ಟು ಭತ್ತ ಸಿಗಲಿ ಎಂದು ಕೊಯ್ಲು ಮಾಡಿದ ಒಂದೇ ದಿನಕ್ಕೆ ಗದ್ದೆಯಲ್ಲೇ ಟಾರ್ಪಲ್ ಹಾಕಿ ಬಡಿದು ಭತ್ತವನ್ನು ಸಂಗ್ರಹಿಸಿದ್ದಾರೆ.

ತಾಳಗುಪ್ಪ ಹೋಬಳಿಯಾದ್ಯಂತ ಅಕಾಲಿಕವಾಗಿ ಮಳೆ ಸುರಿಯುತ್ತಿದ್ದು. ಭತ್ತ ಹಾಗೂ ಅಡಕೆ ಬೆಳೆಗಾರರು ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಹೋಬಳಿಯ ಎಂಟು ಗ್ರಾಮ ಪಂಚಾಯತಿ ವ್ಯಾಪ್ತಿಯಲ್ಲಿ ಸುಮಾರು 9 ಸಾವಿರ ಎಕರೆ ಭತ್ತದ ಬೇಸಾಯ ಮಾಡಲಾಗಿದ್ದು ಇಂಟಾನ್, ಅಭಿಲಾಷ್‌, ಸಾವಿರದೊಂದ, ಐಇಟಿ ತಳಿಯ ಭತ್ತದ ತೆನೆಗಳು ಹಂಪಾಗಿ ಕೊರಳು ಬಾಗಿದೆ. ಅದರಲ್ಲಿ ಬಿತ್ತನೆ ಮಾಡಲಾದ ಸುಮಾರು 3.5 ಸಾವಿರ ಎಕರೆ ಬಿತ್ತನೆ ಗದ್ದೆಯನ್ನು ಕೊಯ್ಲು ಮಾಡಲಾಗಿದೆ. ಕೊಯ್ದ ಬತ್ತದ ಮೆದೆಗಳು ಸುರಿಯುತ್ತಿರುವ ಮಳೆಯಲ್ಲಿ ಕೆಲವಡೆ ತೇಲಿಹೋಗಿದೆ. ಗದ್ದೆಯಲ್ಲಿ ಚೆಲ್ಲಾಪಿಲ್ಲಿಯಾಗಿದೆ. ಹೆಚ್ಚಿವರು ಸಾಂಪ್ರದಾಯಿಕವಾಗಿ ಕತ್ತಿಯಿಂದ ಕೊಯ್ಯುವುದರ ಬದಲು ಕೋಯ್ಲು ಯಂತ್ರದಿಂದ ಕೊಯ್ಲು ಮಾಡಿದ್ದರಿಂದ ಭತ್ತ ಕೈಸೇರಿದ್ದರೂ ಹುಲ್ಲು ಸಂಪೂರ್ಣ ಹಾಳಾಗಿದೆ.