ದಾನಮ್ಮ ಸಾಮಾಜಿಕ, ವೈಚಾರಿಕ ಕ್ರಾಂತಿ ಮಾಡಿದ ಶರಣೆ: ಡಾ. ತೋಂಟದ ಸಿದ್ಧರಾಮ ಸ್ವಾಮಿಗಳು

ಗದಗ: 12ನೇ ಶತಮಾನದಲ್ಲಿ ಜನಸೇವೆ, ಧರ್ಮಜಾಗೃತಿ ಮತ್ತು ಕಾಯಕ- ದಾಸೋಹಗೈದ ಗುಡ್ಡಾಪುರದ ಶರಣೆ ದಾನಮ್ಮ ಶರಣೆಯಾಗಿ ನಂಬಿದ ಭಕ್ತಸಮೂಹಕ್ಕೆ ವರ ನೀಡುವವಳು ದಾನೇಶ್ವರಿ ದೇವಿಯಾಗಿದ್ದಾಳೆ ಎಂದು ಡಾ. ತೋಂಟದ ಸಿದ್ಧರಾಮ ಸ್ವಾಮಿಗಳು ತಿಳಿಸಿದರು.

ಸಂಸಾರದಲ್ಲಿದ್ದುಕೊಂಡು ಸದ್ಗತಿ ಹೊಂದಿ ಧರ್ಮ, ಸಂಸ್ಕಾರ, ಸಂಸ್ಕೃತಿ ಕುರಿತು ಜಾಗೃತಿ ಮೂಡಿಸಿದ ದಾನಮ್ಮ ಕೇವಲ ಶರಣೆ ಅಲ್ಲ, ನಂಬಿದ ಭಕ್ತರಿಗೆ ವರ ನೀಡುವ ವರದಾನೇಶ್ವರಿಯೂ ಹೌದು. 12ನೇ ಶತಮಾನದಲ್ಲಿ ಸಾಮಾಜಿಕ, ವೈಚಾರಿಕ ಕ್ರಾಂತಿ ಮಾಡಿದ ದಿಟ್ಟ ಶರಣೆ ಎಂದರು.

ಸ್ವಚ್ಛ ಮನಸ್ಸು ಇದ್ದಲ್ಲಿ ದೇವರು ನೆಲೆಸಿರುತ್ತಾನೆ ಎಂಬುದನ್ನು ಗುರುವಿನಿಂದ ತಿಳಿಯಬಹುದು. ಗುರುವಿನ ಸನ್ಮಾರ್ಗದಲ್ಲಿ ಮುನ್ನಡೆಯುವ ಮೂಲಕ ಜೀವನ್ಮುಕ್ತಿ ಹೊಂದಬೇಕು. ಮಕ್ಕಳಿಗೆ ಸದ್ವಿನಿಯ, ಸದಾಚಾರಗಳನ್ನು, ಸಂಸ್ಕಾರ ಮತ್ತು ಸಂಸ್ಕೃತಿಯನ್ನು ರೂಢಿಸಬೇಕು. ಇದಕ್ಕೆಲ್ಲ ಪ್ರವಚನ ಮಾಲಿಕೆ ದಾರಿದೀಪವಾಗಲಿ ಎಂದರು.

ಡಾ. ಪಂ. ಪುಟ್ಟರಾಜ ಕವಿ ಗವಾಯಿಗಳು ರಚಿಸಿದ ದಾನಮ್ಮದೇವಿ ಪುರಾಣವನ್ನು ನಂದಿಕೇಶ್ವರದ ವೀರೇಶ್ವರ ಶಾಸ್ತ್ರಿಗಳಿಂದ ಮೊದಲ ದಿನ ಆರಂಭಗೊಂಡ ಪುರಾಣ ಪ್ರವಚನಕ್ಕೆ ಮೃತ್ಯುಂಜಯ ಹಿರೇಮಠ, ಹೇಮಂತಕುಮಾರ ಹಿರೇಮಠ ಸಂಗೀತ ಸಾಥ್ ನೀಡಿದರು.