ಋಣಭಾರದಿಂದ ಇ-ಆಸ್ತಿಗೆ ಮತ್ತಷ್ಟು ಸಂಕಷ್ಟ

ಶಿವಾನಂದ ಪಿ. ಮಹಾಬಲಶೆಟ್ಟಿ

ರಾಜ್ಯ ಸರ್ಕಾರದ ಮಹತ್ವದ ಯೋಜನೆಯಾಗಿರುವ ಇ-ಆಸ್ತಿ ನೋಂದಣಿಗೆ ಹಲವಾರು ಸಮಸ್ಯೆಗಳು ಎದುರಾಗಿ ನೋಂದಣಿ ಪ್ರಕ್ರಿಯೆಗೆ ತೊಡಕಾಗಿತ್ತು. ಇದನ್ನರಿತ ಇಲಾಖೆ ಎ ಮತ್ತು ಬಿ ಯೋಜನೆಯೆಂದು ರೂಪಿಸಿ ಬಿ ಖಾತೆಯಲ್ಲಿರುವವರಿಗೆ ಆಸ್ತಿ ಉತಾರ ಸೃಷ್ಟಿಯಾದಾಗಿನಿಂದ ಋಣಭಾರ (ಇಸಿ) ಕಡ್ಡಾಯವೆಂದು ಹೇಳಿರುವುದು ಮತ್ತಷ್ಟು ಸಮಸ್ಯೆ ಸೃಷ್ಟಿಸಿದೆ.

ರಬಕವಿ-ಬನಹಟ್ಟಿ ತಾಲೂಕು ಕೇಂದ್ರವಾಗಿ ೨೦೧೪ರಂದು ನಿರ್ವಹಣೆ ಆರಂಭಿಸಿದಾಗಿನಿಂದ ಸುಲಭವಾಗಿ ಇಸಿ ದೊರೆಯುತ್ತದೆ. ಈ ಮೊದಲು ಜಮಖಂಡಿ ತಾಲೂಕು ಕೇಂದ್ರವಾಗಿದ್ದರಿಂದ ೨೦೦೦ ರಿಂದ ೨೦೧೩ರವರೆಗೂ ಆನ್‌ಲೈನ್ ಇಸಿ ದೊರೆಯುವುದು ಸುಲಭ. ೨೦೦೦ ಇಸ್ವಿಗೂ ಮುಂಚೆ ಕೈಬರಹ ದಾಖಲೆಗಳೇ ದೊರಕುತ್ತಿಲ್ಲ. ಇದಕ್ಕಾಗಿ ಎರಡು ತಿಂಗಳು ಅಲೆದರೂ ಮಾಹಿತಿ ದೊರಕದ ಕಾರಣ ನಿರಾಸೆಯಿಂದ ಮರಳುತ್ತಿದ್ದಾರೆ.

ರಬಕವಿ-ಬನಹಟ್ಟಿ ನಗರಸಭೆ ವ್ಯಾಪ್ತಿಯಲ್ಲಿನ ಸುಮಾರು ೨೦ ಸಾವಿರ ಆಸ್ತಿಗಳ ಪೈಕಿ ಕೇವಲ ೪೦೦೦ದಷ್ಟು ಮಾತ್ರ ಇ-ಆಸ್ತಿಗೆ ಪರಿವರ್ತನೆ ಹೊಂದಿವೆ. ಅದರಲ್ಲಿ ಇತ್ತೀಚಿನ ೨೦ ವರ್ಷಗಳ ಹೊಸ ಕಟ್ಟಡಗಳ ಆಸ್ತಿದಾರರು ಸೂಕ್ತ ದಾಖಲೆ ಒದಗಿಸುತ್ತಿದ್ದು, ಅವರು ಇ-ಆಸ್ತಿ ದಾಖಲೀಕರಣಗೊಳಿಸಿದ್ದಾರೆ. ಅನಿವಾರ್ಯತೆ ಇರುವ ಕಾರಣ ಕೇವಲ ೫೦೦ ಆಸ್ತಿದಾರರು ಒಲ್ಲದ ಮನಸ್ಸಿನಿಂದ ಬಿ-ಖಾತೆ ನಿಯಮಕ್ಕೆ ಒಪ್ಪಿ ಉತಾರ ಮಾಡಿಕೊಂಡಿದ್ದಾಗಿದೆ. ಇನ್ನುಳಿದ ಶೇ.೮೦ರಷ್ಟು ಇ-ಆಸ್ತಿದಾರರು ನಗರದ ಹೃದಯ ಭಾಗದಲ್ಲಿದ್ದು, ಬಹಳಷ್ಟು ಹಳೆಯ ಆಸ್ತಿ ಆಗಿರುವುದರಿಂದ ಅವುಗಳಿಗೆ ಸಮರ್ಪಕ ದಾಖಲೆಗಳಿಲ್ಲದೆ ಪರದಾಡುತ್ತಿದ್ದಾರೆ.

ಅಧಿಕಾರಿಗಳ ನಿರ್ಲಕ್ಷ್ಯ:

ಇ-ಆಸ್ತಿಗಾಗಿ ಜನರಲ್ಲಿ ಗೊಂದಲ ಬೇಡ. ಎ ಮತ್ತು ಬಿ ಎಂದು ಯೋಜನೆ ರೂಪಿಸಿದೆ. ಸಮರ್ಪಕ ದಾಖಲೆಗಳನ್ನು ನಗರಸಭೆಗೆ ಒದಗಿಸಿದಲ್ಲಿ ಆನ್‌ಲೈನ್ ಉತಾರ ಸಿಗಲಿದೆ ಎಂದು ಪೌರಾಯುಕ್ತರಾದ ಜಗದೀಶ ಈಟಿ ತೀಳಿಸಿದ್ದಾರೆ.ಪೂರ್ವಜರ ಆಸ್ತಿಗಳಲ್ಲಿ ಡ-ಉತಾರ ಹೊರತುಪಡಿಸಿ ಮತ್ತ್ಯಾವ ದಾಖಲಾತಿಗಳು ದೊರಕದು. ಸರ್ಕಾರ ಮಾಡಿರುವ ಇ-ಆಸ್ತಿ ದಾಖಲೆಗಳು ಸರಳೀಕರಣವಾಗಲೇಬೇಕು ಎಂದು ಹೋರಾಟಗಾರ ಬಸವರಾಜ ಬೆಳಗಲಿ ಆಗ್ರಹಿಸಿದ್ದಾರೆ.