ಓವರ್‌ಲೋಡ್ ಇರುವೆಡೆ ಹೆಚ್ಚುವರಿ ಟಿಸಿ ಅಳವಡಿಸಲು ಆಗ್ರಹ

ಕನ್ನಡಪ್ರಭ ವಾರ್ತೆ ಕೆ.ಆರ್.ಪೇಟೆ

ತಾಲೂಕು ರೈತ ಸಂಘದ ಅಧ್ಯಕ್ಷ ಕಾರಿಗನಹಳ್ಳಿ ಪುಟ್ಟೇಗೌಡ ನೇತೃತ್ವದಲ್ಲಿ ಪಟ್ಟಣದ ಸೆಸ್ಕಾಂ ವಿಭಾಗೀಯ ಕಚೇರಿಗೆ ಆಗಮಿಸಿದ ರೈತರ ನಿಯೋಗ ಸೆಸ್ಕಾಂ ಕಾರ್ಯಪಾಲಕ ಅಭಿಯಂತರ ಎಚ್.ಕೆ.ರಮೇಶ್ ಅವರನ್ನು ಭೇಟಿ ಮಾಡಿ ತಾಲೂಕಿನ ವಿದ್ಯುತ್ ಬಳಕೆದಾರ ರೈತರ ಹಿತ ಕಾಯುವಂತೆ ಒತ್ತಾಯಿಸಿದರು.

ಒಂದು ಮೋಟಾರ್ ಸುಟ್ಟು ಹೋದರೆ ಅದರ ರಿಪೇರಿಗೆ ರೈತರು ಕನಿಷ್ಠ ೧೦ ಸಾವಿರ ರು. ವ್ಯಯಿಸಬೇಕಾಗಿದೆ. ಆದ ಕಾರಣ ಸೆಸ್ಕಾಂ ಕಾರ್ಯಪಾಲಕ ಅಭಿಯಂತರರು ತಕ್ಷಣವೇ ತಮ್ಮ ಕಾರ್ಯ ವ್ಯಾಪ್ತಿಯ ಎಲ್ಲಾ ಸೆಕ್ಷನ್ ಅಫೀಸರ್‌ಗಳ ಸಭೆ ನಡೆಸಿ ಎಲ್ಲೆಲ್ಲಿ ಟಿಸಿಗಳಿಗೆ ಓವರ್ ಲೋಡ್ ಇದೆ ಎನ್ನುವ ಮಾಹಿತಿ ಪಡೆಯಬೇಕು. ಓವರ್ ಲೋಡ್ ಇರುವ ಕಡೆ ಹೆಚ್ಚುವರಿ ಟಿ.ಸಿ ಗಳನ್ನು ಅಳವಡಿಸಿ ರೈತರ ನೆರವಿಗೆ ನಿಲ್ಲುವಂತೆ ರೈತರು ಆಗ್ರಹಪಡಿಸಿದರು.

ವಿದ್ಯುತ್ ಇಲಾಖೆ ರೈತರಿಗೆ ಕಿರುಕುಳ ನೀಡದೆ ಸೇವೆ ನೀಡಬೇಕು. ತಾಲೂಕಿನಲ್ಲಿ ಹೊಸ ಪಂಪ್ ಸೆಟ್ ರೈತರು ಒಂದು ಟಿಸಿ ಪಡೆದುಕೊಳ್ಳಲು ಗುತ್ತಿಗೆದಾರರಿಗೆ ಲಕ್ಷಾಂತರ ರು. ಲಂಚ ನೀಡಬೇಕಾದ ಪರಿಸ್ಥಿತಿಯಿದೆ. ಹಣಕೊಟ್ಟವರಿಗೆ ತಕ್ಷಣವೇ ಟಿಸಿ ನೀಡುತ್ತಿರುವ ಇಲಾಖೆ ಬಡ ರೈತರಿಗೆ ಒಂದು ಟಿಸಿ ನೀಡಲು ವರ್ಷಾನುಗಟ್ಟಲೆ ಸುತ್ತಿಸುತ್ತಿದೆ. ಸೆಸ್ಕಾಂ ವಿಭಾಗದಲ್ಲಿ ಎರಡು ಲಾರಿಗಳಿವೆ. ಆದರೆ, ಒಂದು ಟಿಸಿ ಸುಟ್ಟುಹೋದರೆ ಸಾಗಣಿಕೆಯಿಂದ ಹಿಡಿದು ಟಿಸಿಯನ್ನು ಎತ್ತಿ ಇಳಿಸುವವರೆಗೂ ರೈತರೇ ಹಣ ವ್ಯಯಿಸಬೇಕಿದೆ. ಎಲ್ಲವನ್ನೂ ರೈತರೇ ಮಾಡುವುದಾದರೆ ಸುಖಾಸುಮ್ಮನೆ ಏತಕ್ಕಾದರೂ ಲಾರಿಗಳನ್ನು ಇಟ್ಟುಕೊಂಡು ಅದಕ್ಕೆ ಮಾಸಿಕ ಬಾಡಿಗೆ ನೀಡುತ್ತೀರಿ. ರೈತರ ಸುಲಿಗೆಯನ್ನು ತಕ್ಷಣವೇ ನಿಲ್ಲಿಸಿ ಎಂದು ಆಗ್ರಹಿಸಿದರು.

ಸೆಸ್ಕಾಂ ಸಹಾಯಕ ಕಾರ್ಯಪಾಲಕ ಅಭಿಯಂತರ ಪ್ರದೀಪ್, ರೈತ ಮುಖಂಡರಾದ ಕರೋಟಿ ತಮ್ಮಯ್ಯ, ಕೃಷ್ಣಾಪುರ ರಾಜಣ್ಣ, ಕೃಷ್ಣೇಗೌಡ, ಲಕ್ಷ್ಮೀಪುರ ನಾಗಣ್ಣ, ಅಕ್ಕಿಮಂಚನಹಳ್ಳಿ ಹೊನ್ನೇಗೌಡ, ಕಾಗೇಪುರ ಮಹೇಶ್, ಚೌಡೇನಹಳ್ಳಿ ಕೃಷ್ನೇಗೌಡ ಸೇರಿದಂತೆ ಹಲವರಿದ್ದರು.