ಕೈ ಬೀಸಿ ಕರೆಯುತ್ತಿದೆ ಧಾರವಾಡದ ಕೃಷಿ ಮೇಳ!

ಧಾರವಾಡ: ಅಂದ ಚಂದದ ಫಲ-ಪುಷ್ಪಗಳು, ತರಹೇವಾರಿ ತಳಿಗಳು, ಬಣ್ಣ ಬಣ್ಣದ ಕೀಟಗಳ ಪ್ರಪಂಚ ಒಂದೆಡೆಯಾದರೆ, ಮತ್ತೊಂದೆಡೆ ಕಣ್ಣು ಹಾಯಿಸಿದಷ್ಟು ರೈತರು, ನೂರಾರು ಮಳಿಗೆಗಳಲ್ಲಿ ಅವರಿಗೆ ಬೇಕಾದ ಬೆಳೆಗಳ ತಾಂತ್ರಿಕತೆಗಳು, ಸಣ್ಣ-ದೊಡ್ಡ ಯಂತ್ರೋಪಕರಣಗಳು, ಕೃಷಿ ಪರಿಕರಗಳು, ಪ್ರಾತ್ಯಕ್ಷಿಕೆಗಳು, ತಜ್ಞರೊಂದಿಗೆ ಸಮಾಲೋಚನೆ, ಸಂವಾದ, ಜಾನುವಾರು ಪ್ರದರ್ಶನ ಹೀಗೆ ಅನೇಕ...!

ಮೇಳದ ಮುನ್ನಾ ದಿನ ಶುಕ್ರವಾರ ಸಂಜೆ ಸಾಕಷ್ಟು ಮಳೆಯಾಗಿದ್ದು, ಕೃಷಿ ಮೇಳಕ್ಕೆ ಮಳೆ ಅಡ್ಡಿ ಗ್ಯಾರಂಟಿ, ಜನರ ಸಂಖ್ಯೆ ಕಡಿಮೆ ಆಗಬಹುದು ಎಂದುಕೊಂಡಿದ್ದು ಸುಳ್ಳಾಯಿತು. ನಿರೀಕ್ಷೆ ಮೀರಿ ಮೊದಲ ದಿನವೇ ಲಕ್ಷಾಂತರ ಜನರು ಮೇಳಕ್ಕೆ ಆಗಮಿಸಿದ್ದು ಸಂತಸದ ಸಂಗತಿ. ಆದರೆ, ಮೊದಲ ದಿನದ ಆರಂಭದಲ್ಲಿಯೇ ಪ್ರದರ್ಶನಕ್ಕೆ ಟ್ರ್ಯಾಕ್ಟರ್‌ ಇಳಿಸುವಾಗ ಆಯತಪ್ಪಿ ಬಿದ್ದು ತುಮಕೂರು ಮೂಲದ ಪರಶುರಾಮ ಎಂ. ಎಂಬ ಕಾರ್ಮಿಕ ಸಾವಿಗೀಡಾಗಿದ್ದು ಬೇಸರ ಸಂಗತಿ.

ಮೊದಲ ದಿನ ಮುಖ್ಯ ವೇದಿಕೆಯಲ್ಲಿ ಸಾಂಪ್ರದಾಯಿಕ ತಳಿಗಳ ಪ್ರಾಮುಖ್ಯತೆ ಹಾಗೂ ಸಂರಕ್ಷಣೆ ವಿಚಾರಗೋಷ್ಠಿ ನಡೆಯಿತು. ಸಂಶೋಧನಾ ನಿರ್ದೆಶಕ ಡಾ. ಬಿ.ಡಿ.ಬಿರಾದಾರ, ಸಾಂಪ್ರದಾಯಿಕ ತಳಿಗಳ ಮಹತ್ವ ಮತ್ತು ಸಂರಕ್ಷಣೆ ಬಗ್ಗೆ ಮಾತನಾಡಿದರು.

260ಕ್ಕೂ ಹೆಚ್ಚು ದೇಸಿ ಭತ್ತದ ತಳಿಗಳ ಸಂರಕ್ಷಕ ಡಾ. ಶಂಕರ ಲಂಗಟಿ ತಮ್ಮ ಮೂವತ್ತು ವರ್ಷಗಳ ಸಾಂಪ್ರದಾಯಿಕ ತಳಿಗಳ ಸಂಗ್ರಹ ಮತ್ತು ಸಂರಕ್ಷಣೆಯ ಸುದೀರ್ಘ ಅನುಭವ ಹಂಚಿಕೊಂಡರು. ಉದ್ಘಾಟನೆ ನೇರವೇರಿಸಿ ಸನ್ಮಾನ ಸ್ವೀಕರಿಸಿದ ಹಾವೇರಿಯ ಅಕ್ಕಿಮಠದ ಡಾ.ಗುರುಲಿಂಗ ಸ್ವಾಮೀಜಿ ಮಾತನಾಡಿದರು. ನಂತರ ಕೃಷಿ ಉತ್ಪನ್ನಗಳ ಮೌಲ್ಯವರ್ಧನೆ ಹಾಗೂ ಪೌಷ್ಠಿಕ ಆಹಾರ ಭದ್ರತೆ ಕುರಿತು ವಿಚಾರಗೋಷ್ಠಿ ನಡೆಯಿತು. ಡಾ. ಉಷಾ ಮಳಗಿ, ಡಾ. ಸುನಂದಾ ಇಟಗಿ, ಡಾ. ವಿ.ಆರ್.ಕಿರೇಸೂರ ಇದ್ದರು.