ಬಗರ್‌ ಹುಕುಂ ಸಾಗುವಳಿ ಸಕ್ರಮ ನಿರೀಕ್ಷೆಯಲ್ಲಿದ್ದ ಫಲಾನುಭವಿಗಳಿಗೆ ನಿರಾಸೆ

ಎಸ್.ಎಂ. ಸೈಯದ್ಗಜೇಂದ್ರಗಡ: ತಾಲೂಕಿನಲ್ಲಿ ಬಗರ್ ಹುಕುಂ ಸಾಗುವಳಿಯಲ್ಲಿ ತೊಡಗಿರುವ ನೈಜ ಅರ್ಜಿದಾರರಿಗೆ ಹಕ್ಕು ಪತ್ರಗಳನ್ನು ಒದಗಿಸಬೇಕು ಎಂದು ಸರ್ಕಾರ ತಾಲೂಕು ಬಗರ್ ಹುಕುಂ ಸಾಗುವಳಿ ಸಕ್ರಮೀಕರಣ ಸಮಿತಿ ರಚಿಸಿ ಅಂದಾಜು ೨ ವರ್ಷ ಸಮೀಪಿಸುತ್ತಿದ್ದರೂ ಸಹ ಸಮಿತಿ ಒಂದೇ ಸಭೆ ನಡೆಸಿ, ವರದಿಗೆ ಸೂಚಿಸಿ ಸುಮ್ಮನಾಗಿದ್ದು, ಸಕ್ರಮದ ನಿರೀಕ್ಷೆಯಲ್ಲಿದ್ದ ಫಲಾನುಭವಿಗಳ ನಿದ್ದೆ ಹಾರಿಸಿದೆ.

ತಾಲೂಕಿನಲ್ಲಿ ಕರಾಬ್ ಹಾಗೂ ಗೋಮಾಳ ಜಮೀನು ಎನ್ನುವ ಕಾರಣಕ್ಕೆ ಬಗರ್ ಹುಕುಂ ಸಾಗುವಳಿದಾರರು ಸಲ್ಲಿಸಿದ್ದ ೫೧೧ ಅರ್ಜಿಗಳು ತಿರಸ್ಕಾರವಾಗಿದ್ದವು. ಆದರೆ ಬಗರ್ ಹುಕುಂ ಸಮಿತಿ ಸಭೆಯಲ್ಲಿ ಶಾಸಕ ಜಿ.ಎಸ್.ಪಾಟೀಲ ಅವರು ತಿರಸ್ಕೃತಗೊಂಡ ಅರ್ಜಿಗಳ ಮರುಪರಿಶೀಲನೆ ಜತೆಗೆ ಸಮಗ್ರ ಮರು ಸರ್ವೇಗೆ ಸೂಚಿಸಿದ್ದರು. ಹೀಗಾಗಿ ಪುನರ್ ಸರ್ವೇ ನಡೆಸಿದ ವರದಿಯನ್ನು ಜಿಲ್ಲಾಡಳಿತಕ್ಕೆ ಈಗಾಗಲೇ ರವಾನಿಸಲಾಗಿದೆ ಎಂದು ಗಜೇಂದ್ರಗಡ ತಹಸೀಲ್ದಾರ್‌ ಕಿರಣಕುಮಾರ ಕುಲಕರ್ಣಿ ಹೇಳಿದರು.ತಾಲೂಕಿನಲ್ಲಿನ ಬಗರ್ ಹುಕುಂ ಸಾಗುವಳಿ ಮಾಡಿಕೊಂಡಿರುವ ರೈತರಿಗೆ ಹಕ್ಕುಪತ್ರಗಳನ್ನು ನೀಡಿ ಎಂದರೆ ಹತ್ತಾರು ನಿಯಮಗಳನ್ನು ಆಡಳಿತ ಹೇಳುತ್ತದೆ. ಆದರೆ ಖಾಸಗಿ ಕ್ಷೇತ್ರಕ್ಕೆ ಮಾತ್ರ ಗೋಮಾಳ, ಪಶುಸಂಗೋಪನೆ ಸೇರಿ ಇತರ ನಿಯಮಗಳು ಕಾರಣಗಳು ಕಾಣುವದಿಲ್ಲ. ಪರಿಣಾಮ ಗುಡ್ಡದಲ್ಲಿ ಗಾಳಿ ವಿದ್ಯುತ್ ಯಂತ್ರಗಳನ್ನು ಅಳವಡಿಸಲಾಗುತ್ತದೆ. ಏಕೆಂದರೆ ರೈತರಿಗೆ ಭೂಮಿ ಕೊಟ್ಟರೆ ಏನು ಸಿಗುತ್ತದೆ ಎನ್ನುವ ಮನಸ್ಥಿತಿಗೆ ಆಡಳಿತ ಒಗ್ಗಿಕೊಂಡಂತಿದೆ ಎಂದು ಕರ್ನಾಟಕ ಪ್ರಾಂತ ರೈತಸಂಘದ ತಾಲೂಕಾಧ್ಯಕ್ಷ ಎಂ.ಎಸ್. ಹಡಪದ ಹೇಳಿದರು. "ಗಜೇಂದ್ರಗಡ ತಾಲೂಕಿನ ಬಗರ್ ಹುಕುಂ ಸಾಗುವಳಿದಾರರ ಅರ್ಜಿಗಳು ತಿರಸ್ಕಾರಗೊಂಡ ಹಿನ್ನೆಲೆಯಲ್ಲಿ ಶಾಸಕ ಜಿ.ಎಸ್. ಪಾಟೀಲ ಅವರು ಸಭೆಯಲ್ಲಿ ತಹಸೀಲ್ದಾರ್ ಅವರಿಗೆ ಗೋಮಾಳ ಜಾಗದ ಮರು ಸರ್ವೇ ಹಾಗೂ ಜಾನುವಾರುಗಳ ಗಣತಿ ನಡೆಸಿ ವರದಿ ನೀಡಲು ಹಾಗೂ ತಿರಸ್ಕಾರಗೊಂಡ ಅರ್ಜಿಗಳ ಮರುಪರಿಶೀಲನೆಗೆ ಸೂಚಿಸಿದ್ದರು. ಹೀಗಾಗಿ ತಹಸೀಲ್ದಾರ್ ಅವರು ಜಿಲ್ಲಾಡಳಿತ ಹಾಗೂ ಸಂಬಂಧಪಟ್ಟ ಸಚಿವರಿಗೆ ವರದಿ ಕಳುಹಿಸಿದ್ದಾರೆ ಎಂದು ತಾಲೂಕು ಬಗರ ಹುಕುಂ ಸಮಿತಿ ತಾಲೂಕು ಸದಸ್ಯ ಶಶಿಧರ ಹೂಗಾರ, ಸಂಜಯ್ ಆರ್.ದೊಡ್ಡಮನಿ ಹೇಳಿದರು.