2000 ಜನರ ಮೇಲೆ ಶ್ವಾನ ದಾಳಿ!

ಮಂಜುನಾಥ ಸಾಯೀಮನೆ

ತಾಲೂಕಿನಲ್ಲಿ ಕಳೆದೊಂದು ವರ್ಷದಿಂದ ಬೀದಿ ನಾಯಿಗಳ ಹಾವಳಿ ಹೆಚ್ಚಾಗಿದ್ದು ಬರೋಬ್ಬರಿ ಎರಡು ಸಾವಿರಕ್ಕೂ ಅಧಿಕ ಜನಕ್ಕೆ ಕಚ್ಚಿದೆ. ಪಾಪದ ದಾರಿಹೋಕರು ಹಲ್ಲು ನಾಟಿಸಿಕೊಂಡು ಮನೆ ತಲುಪಿದ್ದಾರೆ!

ನಾಯಿ ಕಚ್ಚುವ ಪ್ರಮಾಣ ನಿಯಂತ್ರಿಸಬೇಕೆಂದರೆ ಬೀದಿ ನಾಯಿಗಳ ನಿಯಂತ್ರಣ ಒಂದೇ ಸೂಕ್ತ ದಾರಿ. ಕೆಲ ವರ್ಷಗಳ ಹಿಂದೆ ನಗರದಲ್ಲಿ ಬೀದಿ ನಾಯಿಗಳ ಸಂಖ್ಯೆ ಜಾಸ್ತಿ ಆದಾಗ ನಗರಸಭೆ ಈ ನಾಯಿಗಳನ್ನು ಹಿಡಿದು ಮಾಯ ಮಾಡಿತ್ತು. ಪ್ರಾಣಿ ದಯಾ ಸಂಘಟನೆಗಳು ನಗರಸಭೆಯ ಈ ಕ್ರಮ ಖಂಡಿಸಿದ್ದರು. ಸಾಕಿರುವ ನಾಯಿಗಳಿಗೆ ಬೆಲ್ಟ್ ಕಟ್ಟಿ. ಉಳಿದ ನಾಯಿಗಳ ಬಗ್ಗೆ ಕ್ರಮ ಕೈಗೊಳ್ಳುತ್ತೇವೆ ಎಂದು ನಗರಸಭೆಯೂ ಸೂಚಿಸಿತ್ತು. ಆದರೆ, ಪ್ರಾಣಿಪ್ರಿಯರು ಬೀದಿ ನಾಯಿಗಳಿಗೂ ಬೆಲ್ಟ್ ಕಟ್ಟಿದ್ದರಿಂದ ಪರಿಸ್ಥಿತಿ ಹಾಗೆಯೇ ಮುಂದುವರಿದಿದೆ.ಕಳೆದ ಮೂರು ವರ್ಷಗಳಿಂದ ಬೀದಿ ನಾಯಿಗಳನ್ನು ಹಿಡಿದು ಸಂತಾನಹರಣ ಚಿಕಿತ್ಸೆ ನಡೆಸುವ ಪ್ರಯತ್ನ ಕೂಡ ನಗರಸಭೆಯಿಂದ ನಡೆದಿತ್ತು. ಒಂದು ಪ್ರದೇಶದಲ್ಲಿ ಹಿಡಿದ ನಾಯಿಯನ್ನು ಚಿಕಿತ್ಸೆ ಬಳಿಕ ಬೇರೆ ಪ್ರದೇಶದಲ್ಲಿ ಬಿಟ್ಟು, ಅಲ್ಲಿಯ ಜನತೆಗೆ ಈ ಹೊಸ ನಾಯಿ ಬಾಯಿ ಹಾಕಿದ ಪ್ರಕರಣಗಳೂ ನಡೆದಿವೆ. ಹೀಗಾಗಿ, ನಗರಸಭೆಯ ಸಾಮಾನ್ಯ ಸಭೆಗಳಲ್ಲಿ ಬೀದಿ ನಾಯಿಗಳ ಬಗ್ಗೆ ಕಾವೇರಿದ ಚರ್ಚೆ ನಡೆದರೂ ನಿಯಂತ್ರಣ ಮಾತ್ರ ಸಾಧ್ಯವಾಗಿಲ್ಲ.

ಗ್ರಾಮೀಣ ಮಟ್ಟದಲ್ಲಿ ನಾಯಿ ನಿಯಂತ್ರಣಕ್ಕೆ ಕ್ರಮಕೈಗೊಳ್ಳಲು ಅನುದಾನವನ್ನೂ ಒದಗಿಸಲಾಗಿದೆ. ಪ್ರತಿ ಗ್ರಾಮ ಪಂಚಾಯಿತಿಗೆ ಜಿಪಂನಿಂದ ಬಿಡುಗಡೆ ಆಗುವ ಅನುದಾನದಲ್ಲಿ ಶೇ. ೨ರಷ್ಟನ್ನು ನಾಯಿಗಳ ನಿಯಂತ್ರಣಕ್ಕೆ ಬಳಸಬೇಕು ಎಂಬ ಸೂಚನೆಯನ್ನು ಜಿಪಂ ನೀಡಿದೆ. ನಾಯಿ ಸಂತಾನಹರಣ, ನಾಯಿ ಕಚ್ಚಿಸಿಕೊಂಡವರಿಗೆ ಚಿಕಿತ್ಸೆಗೆ ಈ ಹಣ ಬಳಕೆ ಮಾಡಲು ಸೂಚಿಸಲಾಗಿದೆ.ನಾಯಿಗಳನ್ನು ಹಿಡಿದರೂ ಸಂತಾನಹರಣ ಮಾಡಿಸುವುದು ಹೇಗೆ? ತಾಲೂಕಿನ ಗ್ರಾಮೀಣ ಪ್ರದೇಶದಲ್ಲಿ ೨೪ ಪಶು ಆಸ್ಪತ್ರೆ, ಕೇಂದ್ರಗಳಿದ್ದರೂ ಇಡೀ ತಾಲೂಕಿಗೆ ಇರುವ ವೈದ್ಯರ ಸಂಖ್ಯೆ ಕೇವಲ ಮೂರು. ಗ್ರಾಮ ಪಂಚಾಯಿತಿಗಳು ಅವರದೇ ಆದ ಕಾರ್ಯದಲ್ಲಿ ಮಗ್ನರಾಗಿದ್ದು, ನಾಯಿಗಳ ನಿಯಂತ್ರಣವಿಲ್ಲದೇ ಸಾರ್ವಜನಿಕರದ್ದು ನಾಯಿಪಾಡಾಗಿದೆ.