ಅರಸೀಕೆರೆಯಲ್ಲಿ ಕೊಬ್ಬರಿ ನೋಂದಣಿ ಅವ್ಯವಸ್ಥೆ: ರೈತರ ಪ್ರತಿಭಟನೆ

ಅರಸೀಕೆರೆ ಎಪಿಎಂಸಿ ಯಾರ್ಡ್‌ನಲ್ಲಿ ಘಟನೆ । ರಾಜ್ಯ ಸರ್ಕಾರದ ವಿರುದ್ಧ ಆಕ್ರೋಶ । ಸರತಿಯಲ್ಲಿ ನಿಂತ ರೈತ ಮಹಿಳೆಯರು ಹೈರಾಣು

ರೈತ ದೇಶದ ಬೆನ್ನೆಲುಬು, ಅವನೇ ಅನ್ನದಾತ, ಸರ್ಕಾರದ ಕಾರ್ಯಕ್ರಮಗಳಲ್ಲಿ ರೈತ ಗೀತೆ ಹಾಡಲೇಬೇಕು ಎಂದೆಲ್ಲಾ ಹೇಳುವ ಸರ್ಕಾರ ರೈತರನ್ನು ಹೇಗೆ ನಡೆಸಿಕೊಳ್ಳುತ್ತಿದೆ ಎಂಬುದನ್ನು ಅರಸೀಕೆರೆ ಎಪಿಎಂಸಿ ಯಾರ್ಡಿನಲ್ಲಿ ನಮ್ಮ ಜನಪ್ರತಿನಿಧಿಗಳು ರಾಜಕಾರಣಿಗಳು ಬಂದು ನೋಡಲೇಬೇಕು ಎಂದು ರೈತರು ಕಿಡಿಕಾರಿದ್ದಾರೆ.

ರೈತರನ್ನು ಬಹಳ ಕೀಳಾಗಿ ನಡೆಸಿಕೊಳ್ಳಲಾಗುತ್ತಿದೆ. ತಾವು ಬೆಳೆದ ಕೊಬ್ಬರಿಯನ್ನು ಬೆಂಬಲ ಬೆಲೆಗೆ ಮಾರಲು ಕೇವಲ ನೊಂದಣಿಗಾಗಿಯೇ ಹಗಲು ರಾತ್ರಿ ರೈತ, ರೈತ ಮಹಿಳೆ ನಿಲ್ಲಬೇಕೆ? ವ್ಯವಸ್ಥಿತವಾಗಿ ನಾಲ್ಕಾರು ಕೌಂಟರ್‌ಗಳನ್ನು ಮಾಡುವ ಯೋಗ್ಯತೆ ಈ ಸರ್ಕಾರಕ್ಕೆ ಇಲ್ಲವೇ? ಎಂದು ರೈತರು ಆಕ್ರೋಶ ವ್ಯಕ್ತಪಡಿಸಿದರು.

ರೈತರು ತಾವು ಕೊಬ್ಬರಿ ಬೆಳೆಯಲು ಸಹ ಇಷ್ಟು ಕಷ್ಟ ಪಡಲಿಲ್ಲ ಎಂದು ಹೇಳುತ್ತಾರೆ. ಸರ್ಕಾರ ತುಘಲಕ್ ದರ್ಬಾರ್ ಆಗಿದೆ, ವ್ಯವಸ್ಥಿತವಾಗಿ ನೋಂದಣಿ ಮಾಡುವ ನಿಟ್ಟಿನಲ್ಲಿ ಯಾವ ಜನಪ್ರತಿನಿಧಿಗಳು ಇತ್ತ ತಲೆ ಹಾಕುವುದಿಲ್ಲ. ಉತ್ತಮ ಸಾಮರ್ಥ್ಯದ ಸರ್ವರ್ ವ್ಯವಸ್ಥೆಗೊಳಿಸಲು ಆಗದ ಸರ್ಕಾರವೇ ಇದು? ಎಂದು ರೈತರು ದೂರಿದ್ದಾರೆ.

‘ವಾಸ್ತವತೆ ಏನಾಗಿದೆ? ಸಮಸ್ಯೆಗೆ ಏನು ಕಾರಣ ಎಂದಷ್ಟೇ ಅಧಿಕಾರಿಗಳು ಹೇಳಿ ಸಮಾಧಾನಪಡಿಸಬಹುದು. ಆದರೆ ಇಲ್ಲಿ ಅಧಿಕಾರಗಳು ವಿಧಾನಸೌಧದ ಬಾಗಿಲು ತಟ್ಟಲು ಆಗದು. ಅದನ್ನು ಯಾರು ಮಾಡಬೇಕೋ ಅವರೇ ಮಾಡಬೇಕು. ರೈತರ ಸಂಖ್ಯೆಗೆ ಅನುಗುಣವಾಗಿ ಕೌಂಟರ್‌ಗಳನ್ನು ಹೆಚ್ಚಿಸಬೇಕು. ನಿರಂತರವಾಗಿ ಸರ್ವರ್ ಇರಬೇಕು’ ಎಂದು ರೈತರು ಒತ್ತಾಯಿಸಿದ್ದಾರೆ.

ಜನಪ್ರತಿನಿಧಿಗಳು ತುರ್ತಾಗಿ ಕೌಂಟರ್‌ಗಳನ್ನು ಹೆಚ್ಚಿಸಬೇಕು ಬಿಸಿಲಿನ ತಾಪ ಈ ಬಾರಿ ಹೆಚ್ಚಿದೆ. ರೈತರು ಸರದಿಯಲ್ಲಿ ನಿಲ್ಲಲು ನೆರಳನ್ನು ಒದಗಿಸಿ ಕೊಡಬೇಕು. ನೋಂದಣಿ ವೇಳೆ ರೈತರಿಗೆ ಅಗತ್ಯ ಸೌಲಭ್ಯವನ್ನು ಮಾಡಿಕೊಡಿ. ಜನಪ್ರತಿನಿಧಿಗಳು ಪ್ರಾಮಾಣಿಕ ಕಾಳಜಿಯ ಮೂಲಕ ಸಮಸ್ಯೆಗೆ ಪರಿಹಾರ ಒದಗಿಸಿ ಕೊಡಬೇಕಾಗಿದೆ ಎಂದು ರೈತರು ಒತ್ತಾಯಿಸಿದ್ದಾರೆ. ಕೊಬ್ಬರಿ ನೋಂದಣಿಗಾಗಿ ಉಂಟಾದ ಗೊಂದಲದಿಂದ ಅರಸೀಕೆರೆ ಎಪಿಎಂಸಿ ಯಾರ್ಡ್‌ನಲ್ಲಿ ರೈತರು ಆಕ್ರೋಶಗೊಂಡು ಪ್ರತಿಭಟನೆ ನಡೆಸಿದರು.