ಬೆಳೆವಿಮೆ ಪರಿಹಾರಕ್ಕಾಗಿ ಗುತ್ತಲದಲ್ಲಿ ಧರಣಿ ಕುಳಿತ ರೈತರು

ಗುತ್ತಲ: ಅವೈಜ್ಞಾನಿಕ ಬೆಳೆವಿಮೆ ಸರ್ವೆ ಹಾಗೂ ಬೆಳೆ ಹಾನಿಯಾಗಿದ್ದರೂ ಬೆಳೆವಿಮೆ ಪರಿಹಾರ ಬಂದಿಲ್ಲ ಎಂದು ಆಕ್ರೋಶಗೊಂಡ ರೈತರು ಪಟ್ಟಣದ ನಾಡಕಚೇರಿಯ ಮುಂದೆ ಬುಧವಾರ ಧರಣಿ ನಡೆಸಿದರು.

ಬೆಳೆವಿಮೆ ಸರ್ವೆ ಬಗ್ಗೆ ಅನುಮಾನಗಳಿದ್ದು, ರೈತರಿಲ್ಲದೆ ಸರ್ವೆ ಮಾಡುವುದು ಸರಿಯೇ? ಹಾನಿಯಾದ ಬೆಳೆಗಳನ್ನು ಸರ್ವೆ ಮಾಡದೇ ಉತ್ತಮ ಬೆಳೆ ಸರ್ವೆ ಮಾಡುವುದು ನ್ಯಾಯವೇ? ಬೆಳೆವಿಮೆ ಸರ್ವೆಯ ಮಾನದಂಡಗಳೇನು? ಇವೆಲ್ಲದರ ಬಗ್ಗೆ ನಮಗೆ ಮಾಹಿತಿಯನ್ನು ನೀಡಬೇಕು. ನಮಗೆ ಬೆಳೆಹಾನಿ ಆಗಿದ್ದರೂ ವಿಮೆಯ ಪರಿಹಾರ ಏಕೆ ದೊರೆತಿಲ್ಲ? ಈ ಎಲ್ಲದರ ಬಗ್ಗೆ ನಮಗೆ ಉತ್ತರ ಬೇಕು. ಬೆಳೆ ವಿಮೆ ಸರ್ವೆಯಲ್ಲಿ ವಿಮಾ ಕಂಪನಿಯೊವರೊಂದಿಗೆ ಅಧಿಕಾರಿಗಳು ಕೈಜೋಡಿಸಿದ್ದರ ಬಗ್ಗೆ ನಮಗೆ ಅನುಮಾನ ಇದೆ ಎಂದು ಆರೋಪಿಸಿದರು.

ಸ್ಥಳಕ್ಕೆ ಆಗಮಿಸಿದ ಗ್ರಾಮ ಲೆಕ್ಕಿಗ ಪ್ರಕಾಶ ಉಜ್ಜನಿ ಅವರಿಗೆ ರೈತರು ತರಾಟೆಗೆ ತೆಗೆದುಕೊಂಡರು. ರೈತರೊಂದಿಗೆ ಸರಿಯಾಗಿ ವರ್ತಿಸಬೇಕು. ಸರ್ವೆ ಸ್ಥಳಕ್ಕೆ ರೈತರನ್ನು ಕರೆದುಕೊಂಡು ಹೋಗಬೇಕೆಂದು ಆಗ್ರಹಿಸಿದರು.

ಆನಂತರ ರೈತರ ಜಮೀನುಗಳಲ್ಲಿನ ಸರ್ವೆ ಕಾರ್ಯಕ್ಕೆ ಧರಣಿ ನಿರತ ರೈತರು ಅಧಿಕಾರಿಗಳೊಂದಿಗೆ ಜಮೀನುಗಳಿಗೆ ತೆರಳಿದರು.