ಅಚ್ಚುಕಟ್ಟು ಪ್ರದೇಶಗಳಿಗೆ ಇಂದಿನಿಂದ ವಿವಿ ಸಾಗರ ನೀರು

ವಿವಿ ಸಾಗರ ಜಲಾಶಯದಲ್ಲಿ 126 ಅಡಿ ನೀರಿನ ಸಂಗ್ರಹ । 12,135 ಹೆಕ್ಟೇರ್ ಪ್ರದೇಶಕ್ಕೆ ನೀರು

ಕನ್ನಡಪ್ರಭ ವಾರ್ತೆ ಹಿರಿಯೂರು

ಶುಕ್ರವಾರ ಮದ್ಯರಾತ್ರಿಯಿಂದಲೇ ವಾಣಿ ವಿಲಾಸ ಸಾಗರದ ನೀರು ಕಾಲುವೆಗಳಿಗೆ ಹರಿಯಲು ಪ್ರಾರಂಭಿಸಲಿದೆ. ಇನ್ನು ಒಂದು ತಿಂಗಳ ಕಾಲ ತಾಲೂಕಿನ ಅಚ್ಚುಕಟ್ಟು ಪ್ರದೇಶದ ರೈತರ ಜಮೀನುಗಳಲ್ಲಿ ವಿವಿ ಸಾಗರದ ನೀರಿನ ಕಲರವ ಕೇಳಲಿದೆ. 2025-26ನೇ ಸಾಲಿನ ಮುಂಗಾರು ಹಂಗಾಮಿನಲ್ಲಿ ಅತೀ ಕಡಿಮೆ ಮಳೆಯಾಗಿ ವಿವಿ ಸಾಗರ ಅಚ್ಚುಕಟ್ಟು ವ್ಯಾಪ್ತಿಯಲ್ಲಿನ ತೋಟಗಾರಿಕೆ ಹಾಗೂ ಇತರೆ ಬೆಳೆಗಳಿಗೆ ನೀರು ಅವಶ್ಯಕವಾಗಿದ್ದು ನೀರು ಹರಿಸಿ ಎಂದು ರೈತ ಸಂಘಟನೆಗಳವರು ಮಾಡಿದ ಮನವಿಗೆ ಸ್ಪಂದಿಸಿದ ಅಧಿಕಾರಿಗಳು ಜೂನ್‌ 23 ರಂದು ಸಭೆ ನಡೆಸಿ ನೀರು ಹರಿಸುವ ತೀರ್ಮಾನ ಕೈಗೊಂಡರು. ಪ್ರಸ್ತುತ ವಾಣಿ ವಿಲಾಸ ಸಾಗರ ಜಲಾಶಯದಲ್ಲಿ 126 ಅಡಿಗಳಷ್ಟು ನೀರಿನ ಸಂಗ್ರಹವಿದ್ದು ಅಚ್ಚುಕಟ್ಟು ಪ್ರದೇಶದಲ್ಲಿ ಹಾಲಿ ಇರುವ ತೋಟಗಾರಿಕೆ ಮತ್ತು ಇತರೆ ಕೃಷಿ ಬೆಳೆಗಳಿಗೆ 1ನೇ ಹದ ನೀರು ಹರಿಸಲಾಗುತ್ತಿದೆ.

ಜೂನ್‌ 27 ರಿಂದ ಜುಲೈ27 ರವರೆಗೆ ಅಚ್ಚುಕಟ್ಟು ಪ್ರದೇಶಕ್ಕೆ ನೀರು ಹರಿಯಲಿದ್ದು ಅಚ್ಚುಕಟ್ಟು ವ್ಯಾಪ್ತಿಯ ಹಳ್ಳಿಗಳ ಜನ ಜಾನುವಾರುಗಳ ಬಗ್ಗೆ ಮುಂಜಾಗರೂಕತೆ ವಹಿಸಬೇಕು ಹಾಗೂ ಯಾವುದೇ ಅಹಿತಕರ ಘಟನೆ ನಡೆಯದಂತೆ ಎಚ್ಚರ ವಹಿಸಬೇಕು. ಪ್ರತಿಯೊಂದು ಉಪ ಕಾಲುವೆಯಲ್ಲೂ ನೀರಿನ ಹಂಚಿಕೆಯ ಜವಾಬ್ದಾರಿಯನ್ನು ರೈತ ಸಮಿತಿ ಸದಸ್ಯರು ನಿರ್ವಹಿಸಬೇಕು. ನೀರು ಹರಿಸಿದಾಗ ಕಾಲುವೆಯ ಕೊನೆಗಡಿಯ ಅಚ್ಚುಕಟ್ಟು ಪ್ರದೇಶಗಳಿಗೆ ಮೊದಲು ನೀರು ಹರಿಸಬೇಕು. ಯಾವುದೇ ಕಾರಣಕ್ಕೂ ನೀರು ಪೋಲಾಗದಂತೆ ನೋಡಿಕೊಳ್ಳಬೇಕು ಎಂದು ಜಿಲ್ಲಾಧಿಕಾರಿಗಳು ಆದೇಶಿಸಿದ್ದಾರೆ.

ರೈತರು ನೀರು ಪೋಲು ಮಾಡಬೇಡಿ:

ಹಿರಿಯೂರು ನಗರದ ಟಿಬಿ ವೃತ್ತದಿಂದ ಅಂಬೇಡ್ಕರ್ ಕಾಲೇಜ್ ರಸ್ತೆ ಪಕ್ಕದ ವಿವಿ ಸಾಗರದ ನಾಲೆ ಕಸ ಹಾಗೂ ಕೊಚ್ಛೆಯಿಂದ ನಾರುತ್ತಿದ್ದು ಆಸುಪಾಸಿನ ಮನೆಗಳವರಿಗೆ, ಕಾಲೇಜಿನ ವಿದ್ಯಾರ್ಥಿಗಳ ಓಡಾಟಕ್ಕೆ ತೊಂದರೆಯಾಗಿದೆ. ಸೊಳ್ಳೆಗಳ ತವರು ಮನೆಯಾಗಿರುವ ಈ ನಾಲೆಯನ್ನು ಅಚ್ಚುಕಟ್ಟು ಮಾಡಬೇಕಾದ ಅನಿವಾರ್ಯತೆ ಇದೆ. ವಿಪರ್ಯಾಸವೆಂದರೆ ಇಂದಿನಿಂದ ವಿವಿ ಸಾಗರದ ತೂಬು ತೆರೆದಿದ್ದು ಹಳ್ಳಿಗಳ ರೈತರ ಜಮೀನುಗಳಿಗೆ ಈ ಕಸ ಮತ್ತು ಕೊಚ್ಛೆ ಸರಾಗವಾಗಿ ಹರಿದು ಹೋಗಲಿದೆ. ನಾಲೆಗಳ ಸ್ವಚ್ಛತೆ ಮಾಡಿ ನೀರು ಹರಿಸುತ್ತಿದ್ದೇವೆ ಎಂದ ಅಧಿಕಾರಿಗಳು ಇತ್ತಲೂ ಗಮನಿಸಬೇಕು.