ಗದಗ ಜಿಲ್ಲೆಗೆ ಕೆ.ಎಚ್. ಪಾಟೀಲರ ಕೊಡುಗೆ ಅಪಾರ: ಮಲ್ಲಿಕಾರ್ಜುನ ಖರ್ಗೆ

ಗದಗ: ಕರ್ನಾಟಕದಲ್ಲಿ ಗದಗ ವಿಶೇಷವಾದ ಜಿಲ್ಲೆಯಾಗಿ ಬೆಳೆಯುತ್ತಿದೆ. ಇದಕ್ಕೆ ಕೆ.ಎಚ್. ಪಾಟೀಲ ಕೊಡುಗೆ ಅಪಾರವಾಗಿದೆ. ತಂದೆ ಹಾಕಿಕೊಟ್ಟ ಮಾರ್ಗದರ್ಶನದಲ್ಲಿ ಸಚಿವ ಎಚ್.ಕೆ. ಪಾಟೀಲ ಮತ್ತು ಮಾಜಿ ಶಾಸಕ ಡಿ.ಆರ್. ಪಾಟೀಲ ಸಾಗುತ್ತಿದ್ದಾರೆ ಎಂದು ಎಐಸಿಸಿ ಅಧ್ಯಕ್ಷ, ರಾಜ್ಯಸಭೆ ವಿರೋಧ ಪಕ್ಷದ ನಾಯಕ ಮಲ್ಲಿಕಾರ್ಜುನ ಖರ್ಗೆ ಶ್ಲಾಘಿಸಿದರು.

ಶಿಕ್ಷಣ ಕ್ಷೇತ್ರ, ಕೃಷಿ ಕ್ಷೇತ್ರದಲ್ಲಿ ಕೆ.ಎಚ್. ಪಾಟೀಲ ಅವರು ವಿಶೇಷ ಆಸಕ್ತಿ ಹೊಂದಿದ್ದರು. ತಾತ್ವಿಕ ವಿಚಾರಗಳನ್ನು ಹೆಚ್ಚು ಅಳವಡಿಸಿಕೊಂಡಿದ್ದ ಅವರು, ಸಾಮಾಜಿಕ ನ್ಯಾಯಕ್ಕೂ ಬೆಂಬಲ ನೀಡುತ್ತಿದ್ದರು. ಅವರೊಬ್ಬ ನಿಷ್ಠುರವಾದಿಯಾಗಿದ್ದರು ಎಂದರು.

ರಾಜ್ಯದಲ್ಲಿ ಇಂದಿಗೂ ಅಲ್ಪ ಪ್ರಮಾಣದಲ್ಲಾದರೂ ಅರಣ್ಯ ಸಂಪತ್ತು ಉಳಿದಿದೆ ಎಂದರೆ ಅದಕ್ಕೆ ಅಂದು ಅರಣ್ಯ ಸಚಿವರಾಗಿದ್ದ ಕೆ.ಎಚ್. ಪಾಟೀಲ ತೆಗೆದುಕೊಂಡಿದ್ದ ದಿಟ್ಟ ಕ್ರಮಗಳ ಕಾರಣವಾಗಿದೆ. ಅರಣ್ಯದ ಒಳಗೆ ಎತ್ತಿನ ಬಂಡಿಗಳ ಓಡಾಟ ನಿಷೇಧ ಮಾಡುತ್ತಾರೆ. ಇದರಿಂದ ವಿರೋಧ ಪಕ್ಷದ ನಾಯಕರು ಹಾಗೂ ಸ್ವಪಕ್ಷದವರು ವಿರೋಧ ವ್ಯಕ್ತವಾದರೂ ಅವರನ್ನೆಲ್ಲಾ ಸಮಾಧಾನಪಡಿಸಿ ಕಾನೂನು ಜಾರಿಗೆ ತಂದ ಹಿನ್ನೆಲೆಯಲ್ಲಿ ರಾಜ್ಯದ ಅರಣ್ಯ ರಕ್ಷಣೆಯಾಗಿ ಉಳಿದಿದೆ ಎಂದು ಅರಣ್ಯ ಸಚಿವ ಈಶ್ವರ ಖಂಡ್ರೆ ಹೇಳಿದರು.

ಸಹಕಾರಿ ಕ್ಷೇತ್ರವೆಂದರೆ ತಟ್ಟನೆ ನೆನಪಾಗುವುದು ಕೆ.ಎಚ್. ಪಾಟೀಲರು. ಅವರ ಹಲವಾರು ದಶಕಗಳ ಹಿಂದೆಯೇ ಕಂಡ ಕನಸುಗಳನ್ನು ಇಂದಿಗೂ ನಾವೆಲ್ಲ ಸಾಕಾರ ಮಾಡಲು ಆಗುತ್ತಿಲ್ಲ, ಅಷ್ಟೊಂದು ದೂರ ದೃಷ್ಟಿಯುಳ್ಳ ನಾಯಕರಾಗಿದ್ದರು. ಅವರು ಬಿಟ್ಟು ಹೋಗಿರುವ ಕೆಲಸ ಕಾರ್ಯಗಳನ್ನು ಅವರ ಮಗ ಎಚ್.ಕೆ. ಪಾಟೀಲ ಹಾಗೂ ಅವರ ಕುಟುಂಬದವರು ನಡೆಸಿಕೊಂಡು ಹೋಗಿ ಗದಗ ಮಾದರಿ ಜಿಲ್ಲೆಯಾಗಿ ರೂಪಿಸಿದ್ದು ಇತಿಹಾಸ ಎಂದು ಜೆಡಿಎಸ್‌ ನಾಯಕ ಜೆ.ಟಿ. ದೇವೇಗೌಡರ ಹೇಳಿದರು.

ಕೆ.ಎಚ್. ಪಾಟೀಲ ಅವರು ತಮ್ಮ ಕೆಲಸ ಕಾರ್ಯಗಳ ಮೂಲಕ ದೇಶವೇ ಗದಗ ಜಿಲ್ಲೆಯತ್ತ ನೋಡುವಂತೆ ಮಾಡಿದ್ದಾರೆ. ಅವರು ಹುಟ್ಟುಹಾಕಿದ ನೂರಾರು ಸಹಕಾರಿ ಸಂಸ್ಥೆಗಳು ಇಂದಿಗೂ ಎಂದಿಗೂ ಮಾದರಿಯಾಗಿವೆ. ಅವರೊಬ್ಬ ದೂರದೃಷ್ಟಿಯುಳ್ಳ, ಬಡವರ, ರೈತರ ಪರವಾಗಿ ಗಟ್ಟಿಯಾದ ಧ್ವನಿ ಎತ್ತುವ ಛಾತಿ ಹೊಂದಿದ್ದರು ಎಂದು ನರಗುಂದ ಶಾಸಕ ಸಿ.ಸಿ. ಪಾಟೀಲ ಹೇಳಿದರು.