ಗದಗ ತಹಸೀಲ್ದಾರ್‌ ಕಚೇರಿ ಕೆಸರುಮಯ..!

ಮಹೇಶ ಛಬ್ಬಿ ಗದಗ

ಈ ಕಚೇರಿಗೆ ನಗರ ಹಾಗೂ ಗ್ರಾಮೀಣ ಭಾಗಗಳಿಂದ ನಿತ್ಯ ನೂರಾರು ಜನರು ತಮ್ಮ ಕೆಲಸ ಕಾರ್ಯಗಳಿಗಾಗಿ ಅರ್ಜಿ ಹಿಡಿದು ಬರುತ್ತಾರೆ. ಸಾರ್ವಜನಿಕರು ಕಚೇರಿ ಒಳಗೆ ಹೋಗಲು ಕೆಸರಿನ ರಾಡಿಯಲ್ಲಿ ನಡೆದುಕೊಂಡು ಹೋಗಬೇಕಿದೆ. ಇಲ್ಲಿ ಕೆಲಸ ಮಾಡುವ ಅಧಿಕಾರಿ, ಸಾರ್ವಜನಿಕರಿಗೆ ಕಿರಿಕಿರಿ ಉಂಟಾಗಿದೆ.

ದಿನನಿತ್ಯ ಹತ್ತಾರು ಬಿಡಾಡಿ ದನಗಳು ಆವರಣದಲ್ಲಿ ಅಲೆದಾಡಿ ಇಲ್ಲಿಯೇ ವಾಸಸ್ಥಳವನ್ನಾಗಿ ಮಾಡಿಕೊಂಡಿವೆ. ಒಮ್ಮೊಮ್ಮೆ ಈ ದನಗಳ ಕಾದಾಟ ಸಾರ್ವಜನಿಕರಲ್ಲಿ ಭಯ ಹುಟ್ಟಿಸುತ್ತದೆ. ಕಚೇರಿ ಆವರಣದಲ್ಲಿ ಪಾರ್ಕಿಂಗ್‌ ಮಾಡಿದ ಬೈಕ್ ಗಳ ಸೈಡ್‌ ಬ್ಯಾಗಗಳಲ್ಲಿ ಏನಾದರೂ ಆಹಾರ ಪದಾರ್ಥವಿದ್ದರೆ ಅವುಗಳನ್ನು ತಿನ್ನುವ ಭರದಲ್ಲಿ ಕಾದಾಟ ನಡೆದು ಬೈಕ್‌, ಕಾರುಗಳು ಜಖಂಗೊಂಡಿರುವ ಪ್ರಸಂಗ ನಡೆದಿವೆ. ಅಷ್ಟೇ ಅಲ್ಲದೆ ಬೀದಿ ನಾಯಿಗಳ ಹಾವಳಿ ಹೆಚ್ಚಾಗಿದೆ.

ಇನ್ನು ತಹಸೀಲ್ದಾರ ಕಚೇರಿಗೆ ಬರುವ ಸಾರ್ವಜನಿಕರಿಗೆ ಶುದ್ಧ ಕುಡಿಯುವ ನೀರು, ಶೌಚಾಲಯದ ವ್ಯವಸ್ಥೆ ಸೇರಿದಂತೆ ಮೂಲಭೂತ ಸೌಲಭ್ಯಗಳು ಇಲ್ಲ. ಸಾರ್ವಜನಿಕರು ಕುಡಿಯುವ ನೀರಿಗೆ ಪಕ್ಕದ ಹೋಟೆಲ್ಲಗಳನ್ನೇ ಅವಲಂಭಿಸುವಂತಾಗಿದೆ.

ತಹಸೀಲ್ದಾರ್‌ ಕಚೇರಿಗೆ ನಗರ ಸೇರಿದಂತೆ ಗ್ರಾಮೀಣ ಭಾಗಗಳಿಂದ ನಿತ್ಯ ನೂರಾರು ಜನರು, ಮಹಿಳೆಯರು, ವಯೋವೃದ್ಧರು ಬರುತ್ತಾರೆ. ಆದರೆ ಕಚೇರಿ ಒಳಗೆ ಹೋಗಬೇಕೆಂದರೆ ಕೆಸರಿನ ರಾಡಿಯಲ್ಲಿ ನಡೆದುಕೊಂಡು ಹೋಗಬೇಕಾದಂತಹ ಸ್ಥಿತಿ ನಿರ್ಮಾಣವಾಗಿದೆ. ಅಧಿಕಾರಿಗಳು ಈ ಬಗ್ಗೆ ಗಮನ ಹರಿಸಿ, ಆವರಣದಲ್ಲಿ ಮಳೆ ನೀರು ನಿಲ್ಲದಂತೆ ಪೇವರ್ಸ ಅಳವಡಿಸಲು ಕ್ರಮ ಕೈಗೊಳ್ಳಬೇಕು ಎಂದು ಮುಳಗುಂದ ನಿವಾಸಿ ದತ್ತಣ್ಣ ಯಳವತ್ತಿ ತಿಳಿಸಿದ್ದಾರೆ.