ಸಂಡೂರಿನ ಅಸ್ಪೃಶ್ಯತಾ ನಿವಾರಣೆ ಮೆಚ್ಚಿದ ಗಾಂಧೀಜಿ

ವಿ.ಎಂ. ನಾಗಭೂಷಣ

ಮಹಾತ್ಮ ಗಾಂಧೀಜಿಯವರ ಅಭಿಪ್ರಾಯದಲ್ಲಿ ವ್ಯಕ್ತವಾದ ದಕ್ಷಿಣ ಭಾರತದ ಪುಟ್ಟ ಸಂಸ್ಥಾನ ಅದು ಸಂಡೂರು ಸಂಸ್ಥಾನ. 1934ರಲ್ಲಿ ಮಹಾತ್ಮ ಗಾಂಧೀಜಿಯವರು ಸಂಡೂರಿಗೆ ಭೇಟಿ ಕೊಟ್ಟಿದ್ದರು. ಅಷ್ಟೊತ್ತಿಗೆ ಆಗಲೇ ಸಂಡೂರು ಸಂಸ್ಥಾನದಲ್ಲಿ ಆಳ್ವಿಕೆ ನಡೆಸುತ್ತಿದ್ದ ಘೋರ್ಪಡೆ ರಾಜ ವಂಶದವರು ಇಲ್ಲಿನ ದೇವಸ್ಥಾನಗಳಲ್ಲಿ ಹರಿಜನರಿಗೆ ಮುಕ್ತ ಪ್ರವೇಶಕ್ಕೆ ಅವಕಾಶ ಕಲ್ಪಿಸಿದ್ದರು. ತಮ್ಮ ಸಂಡೂರು ಭೇಟಿಯ ಸಂದರ್ಭದಲ್ಲಿ ಈ ಅಂಶವನ್ನು ತಿಳಿದ ಮಹಾತ್ಮ ಗಾಂಧೀಜಿಯವರು ಸಂಡೂರು ಘೋರ್ಪಡೆ ರಾಜ ಸಂಸ್ಥಾನ ಕುರಿತು ತಮ್ಮ ಅಭಿಪ್ರಾಯವನ್ನು ಉಲ್ಲೇಖಿಸಿದ್ದಾರೆ.

ಮಹಾತ್ಮ ಗಾಂಧೀಜಿಯವರ ಪ್ರತಿಮೆ ಇರುವ ಸ್ಥಳದಲ್ಲಿನ ಆದರ್ಶ ಕಲ್ಯಾಣ ಮಂಟಪದ ಭಿತ್ತಿಯ ಮೇಲೆ ವಿವಿಧ ಧರ್ಮ ಗ್ರಂಥಗಳ ಉಕ್ತಿಗಳನ್ನು ಬರೆಯಿಸಲಾಗಿದೆ. ಮಹಾತ್ಮ ಗಾಂಧೀಜಿಯವರ ಗ್ರಾಮ ಸ್ವರಾಜ್ಯ ಕಲ್ಪನೆಯನ್ನು ಸಾಕಾರಗೊಳಿಸಲು, ಎಂ.ವೈ. ಘೋರ್ಪಡೆಯವರು ಆದರ್ಶ ಕಲ್ಯಾಣ ಮಂಟಪದ ಪಕ್ಕದಲ್ಲಿ ಕರ ಕುಶಲ ಕೇಂದ್ರವನ್ನು ಆರಂಭಿಸಿದ್ದಾರೆ. ಇಲ್ಲಿ ಖಾದಿ ಬಟ್ಟೆ ಉತ್ಪಾದನೆ, ಶಿಲಾಮೂರ್ತಿ ಕೆತ್ತನೆ, ಲಂಬಾಣಿ ಕಸೂತಿ ಮುಂತಾದ ಕರಕುಶಲ ವಸ್ತುಗಳನ್ನು ತಯಾರಿಸಲಾಗುತ್ತಿದೆ. ಇಲ್ಲಿನ ಉತ್ಪನ್ನಗಳು ದೇಶ ವಿದೇಶಗಳಲ್ಲಿ ಹೆಸರನ್ನು ಗಳಿಸಿವೆ.

ಓಯಸಿಸ್:

ಮಹಾತ್ಮ ಗಾಂಧೀಜಿಯವರು ಸ್ವಾತಂತ್ರ್ಯದ ಪೂರ್ವದಲ್ಲಿ ಸಂಡೂರಿಗೆ ಆಗಮಿಸಿದ್ದರು. ಅವರನ್ನು ಇಲ್ಲಿನ ಸಂಸ್ಕೃತಿ ಹಾಗೂ ನಿಸರ್ಗ ಸೌಂದರ್ಯ ಆಕರ್ಷಿಸಿತ್ತು ಎಂಬುದು ಅವರ ಮಾತುಗಳಿಂದ ತಿಳಿದು ಬರುತ್ತಿದೆ. ಮಹಾತ್ಮ ಗಾಂಧೀಜಿಯವರು ಸಂಡೂರಿಗೆ ಆಗಮಿಸಿ, ಉಳಿದುಕೊಂಡಿದ್ದರು ಎಂಬ ವಿಷಯ ಇಲ್ಲಿನ ಯುವ ಜನತೆಯನ್ನು ಹಾಗೂ ಮಕ್ಕಳನ್ನು ಪುಳಕಿತರನ್ನಾಗಿಸುತ್ತದೆ. ಮಹಾತ್ಮ ಗಾಂಧೀಜಿಯವರ ಸ್ವರಾಜ್ಯ ಹಾಗೂ ಸ್ವಾವಲಂಬನೆಯ ಮೌಲ್ಯಗಳು ಎಲ್ಲರಲ್ಲೂ ನೆಲೆಗೊಳ್ಳಲಿ.