ಗಂಗಾವತಿ: ಟಿಎಪಿಸಿಎಂಎಸ್ ಚುನಾವಣೆ ಮತ್ತೆ ಮುಂದಕ್ಕೆ

ಗಂಗಾವತಿ: ಇಲ್ಲಿಯ ತಾಲೂಕು ಒಕ್ಕಲುತನ ಹುಟ್ಟುವಳಿ ಮಾರಾಟ ಸಹಕಾರ ಸಂಘದ (ಟಿಎಪಿಸಿಎಂಎಸ್) ಅಧ್ಯಕ್ಷ, ಉಪಾಧ್ಯಕ್ಷರ ಚುನಾವಣೆ ನಾಲ್ಕನೇ ಬಾರಿಗೆ ಮುಂದಕ್ಕೆ ಹಾಕಲಾಗಿದೆ.

4ನೇ ಬಾರಿ ಮುಂದಕ್ಕೆ: ಮೊದಲನೇ ಬಾರಿಗೆ ಅಧ್ಯಕ್ಷ- ಉಪಾಧ್ಯಕ್ಷರ ಚುನಾವಣೆಯನ್ನು ಕೋರಂ ಇಲ್ಲದ ಕಾರಣ ಮುಂದೂಡಲಾಯಿತು. ಎರಡನೇ ಬಾರಿಗೂ 6 ಸದಸ್ಯರು ಇದ್ದರೂ ಚುನಾವಣೆ ನಡೆಯಲಿಲ್ಲ. ಮೂರನೇ ಬಾರಿಗೆ ತಡೆಯಾಜ್ಞೆ ತರಲಾಗಿತ್ತು. ನಾಲ್ಕನೇ ಬಾರಿ ಅಂದರೆ ಡಿ. 15ರಂದು ನಡೆಯಬೇಕಾಗಿದ್ದ ಚುನಾವಣೆಯಲ್ಲಿ ಕೇವಲ 6 ನಿರ್ದೇಶಕರು ಇದ್ದು, ಇನ್ನು 6 ನಿರ್ದೇಶಕರು ಗೈರುಹಾಜರಾದ ಹಿನ್ನೆಲೆಯಲ್ಲಿ ಮುಂದೂಡಲಾಯಿತು.

ಸೂಪರ್ ಸೀಡ್ ಸಾಧ್ಯತೆ: ಸಹಕಾರಿ ಇಲಾಖೆಯ ಕಾಯ್ದೆ 29 ಸಿ ಪ್ರಕಾರ ನಿರ್ದೇಶಕರು ಸತತ ಮೂರು ಸಭೆಗೆ ಹಾಜರಾಗದೆ ಇರುವುದು ಮತ್ತು ಚುನಾವಣೆಯಲ್ಲಿ ನಿರ್ದೇಶಕರ ಸಂಖ್ಯೆ ಕೋರಂಕ್ಕಿಂತ ಕಡಿಮೆ ಇದ್ದಿದ್ದರಿಂದ ಸೂಪರ್ ಸೀಡ್ ಆಗುವ ಸಾಧ್ಯತೆ ಇದೆ. ಈಗಾಗಲೇ ಬಹುತೇಕವಾಗಿ ನಿರ್ದೇಶಕರು ಗೈರು ಹಾಜರಾಗಿದ್ದಲ್ಲದೆ ಚುನಾವಣೆ ಸತತ ನಾಲ್ಕು ಬಾರಿ ಮೂಂದೂಡಿರುವ ಲೆಕ್ಕಾಚಾರದ ಮೇಲೆ ಸೂಪರ್ ಸೀಡ್ ಆಗುವ ಸಾಧ್ಯತೆ ಇದೆ.

ಚುನಾವಣೆ ಮುಂದೂಡಲು ಕುತಂತ್ರ: ಚೆನ್ನಪ್ಪ ಮಳಗಿ ಆಕ್ರೋಶಗಂಗಾವತಿ ತಾಲೂಕು ಒಕ್ಕಲುತನ ಹುಟ್ಟುವಳಿ ಮಾರಾಟ ಸಹಕಾರ ಸಂಘದ ಚುನಾವಣೆಯಲ್ಲಿ ಬಿಜೆಪಿ ಮುಖಂಡರೊಬ್ಬರು ಬಿಜೆಪಿಯವರನ್ನು ಬೆಂಬಲಿಸದೆ ಬೇರೆಯವರಿಗೆ ಬೆಂಬಲ ನೀಡಿದ್ದಾರೆ ಎಂದು ವಕೀಲ ಹಾಗೂ ಟಿಎಪಿಸಿಎಂಸ್ ಅಧ್ಯಕ್ಷ ಸ್ಥಾನದ ಅಭ್ಯರ್ಥಿ ಚೆನ್ನಪ್ಪ ಮಳಗಿ ಆಕ್ರೋಶ ವ್ಯಕ್ತಪಡಿಸಿದರು.

ಜಿಲ್ಲಾ ಬಿಜೆಪಿ ಮಾಜಿ ಅಧ್ಯಕ್ಷ ವಿರೂಪಾಕ್ಷಪ್ಪ ಸಿಂಗನಾಳ, ಮನೋಹರಗೌಡ ಹೇರೂರು, ತಿಪ್ಪೇರುದ್ರಸ್ವಾಮಿ, ನಗರಸಭೆ ಮಾಜಿ ಅಧ್ಯಕ್ಷ ಜೋಗದ ಹನುಮಂತಪ್ಪನಾಯಕ, ನಗರಸಭೆ ಮಾಜಿ ಸದಸ್ಯ ವೀರಭದ್ರಪ್ಪನಾಯಕ, ಚಂದ್ರಶೇಖರ ಅಕ್ಕಿ, ಕಾಶೀನಾಥ ಚಿತ್ರಗಾರ, ಕನಕಪ್ಪ ಕನಕಗಿರಿ ಇದ್ದರು.