ಮಲೆನಾಡ ಅಪರಾಧ ಜಗತ್ತಲ್ಲಿ ಮತ್ತೆ ಗಾಂಜಾ ಘಾಟು

ಗೋಪಾಲ್ ಯಡಗೆರೆ

ಮಲೆನಾಡಿನ ಅಪರಾಧ ಜಗತ್ತಿನಲ್ಲಿ ಮತ್ತೊಮ್ಮೆ ಗಾಂಜಾ ಸದ್ದು ಮಾಡಿದೆ. ಇದುವರೆಗೆ ವಯಸ್ಕರು ಮಾಡುತ್ತಿದ್ದ ಕೊಲೆ, ಹಲ್ಲೆ, ದರೋಡೆ ಪ್ರಕರಣಗಳಲ್ಲಿ ಕೇಳಿ ಬರುತ್ತಿದ್ದ ಗಾಂಜಾ ಸದ್ದು ಇದೀಗ ಅಪ್ರಾಪ್ತರ ಅಪರಾಧ ಪ್ರಕರಣಗಳಲ್ಲಿ ಕೂಡ ಸದ್ದು ಮಾಡಲಾರಂಭಿಸಿದೆ.

ಇತ್ತೀಚೆಗೆ ಅನೇಕ ಅಪರಾಧ ಪ್ರಕರಣದಲ್ಲಿ ಆರೋಪಿಗಳು ಗಾಂಜಾ ಸೇವಿಸಿರುವುದು ಪತ್ತೆಯಾಗಿತ್ತು. ಗಾಂಜಾ ಅಮಲಿನಲ್ಲಿ ಹಲ್ಲೆ, ದರೋಡೆ, ಹೊಡೆದಾಟ ಮಾತ್ರವಲ್ಲದೆ, ಕೊಲೆಯಂತಹ ಪ್ರಕರಣಗಳಲ್ಲಿ ಕೂಡ ಗಾಂಜಾ ಸೇವನೆಯೇ ಕಾರಣವಾಗಿದೆ.

ವಿದ್ಯಾರ್ಥಿಗಳೂ ಗಾಂಜಾ ವ್ಯಸನಿಗಳಾಗುತ್ತಿರುವುದು, ಇದೊಂದು ವ್ಯವಸ್ಥಿತ ದಂಧೆಯಾಗಿ ರೂಪುಗೊಳ್ಳುತ್ತಿರುವ ಬಗ್ಗೆ ಕನ್ನಡಪ್ರಭ ಹಲವು ಲೇಖನಗಳ ಮೂಲಕ ಎಚ್ಚರಿಸಿದೆ. ಇದೇ ರೀತಿ ಜನಪ್ರತಿನಿಧಿಗಳು ಕೂಡ ಗಾಂಜಾ ಹೆಚ್ಚುತ್ತಿರುವ ಕುರಿತು ತೀವ್ರ ಆತಂಕ ವ್ಯಕ್ತಪಡಿಸುತ್ತಿದ್ದಾರೆ. ಹಲವು ಕಾಲೇಜು ಆವರಣ, ಸಮೀಪದ ಮೈದಾನಗಳು ಗಾಂಜಾ ಮಾರಾಟದ ಕೇಂದ್ರವಾಗುತ್ತಿದೆ.

ಶಿವಮೊಗ್ಗ ದಿನದಿಂದ ದಿನಕ್ಕೆ ಗಾಂಜಾ ನಗರವಾಗಿ ಬದಲಾಗುತ್ತಿದೆ. ಸಾಂಸ್ಕೃತಿಕ ನಗರಿ ಎಂದೇ ಖ್ಯಾತವಾದ ಶಿವಮೊಗ್ಗ ಗಾಂಜಾ ನಗರವಾಗುತ್ತಿದೆ. ಹೋರಾಟದ ನೆಲೆವೀಡು ಹೊಡೆದಾಟದ ಕೇಂದ್ರವಾಗುತ್ತಿದೆ. ಪೊಲೀಸರು ಕಠಿಣ ಕ್ರಮ ಜರುಗಿಸದಿದ್ದಲ್ಲಿ ಮುಂದಿನ ದಿನಗಳು ಇನ್ನಷ್ಟು ಭೀಕರವಾಗಲಿದೆ. ಸಾಮಾನ್ಯ ಜನರನ್ನು ಹೆದರಿಸುವ ಬದಲಿಗೆ ಕ್ರಿಮಿನಲ್‌, ಗಾಂಜಾ ಪೆಡ್ಲರ್‌ಗಳ ಮೇಲೆ ಕಠಿಣ ಕ್ರಮ ಜರುಗಿಸಬೇಕಿದೆ.