ಗವಿಸಿದ್ಧೇಶ್ವರ ಜಾತ್ರೆ ಕೊನೆಯಲ್ಲಿ ಮೇಳೈಸಿದ ಸಂಕ್ರಮಣ, ವೀಕೆಂಡ್ ಸವಾಲು

ಸೋಮರಡ್ಡಿ ಅಳವಂಡಿ ಕೊಪ್ಪಳ

ಗವಿಸಿದ್ಧೇಶ್ವರ ಜಾತ್ರಾ ಮಹೋತ್ಸವ ಅಮಾವಾಸ್ಯೆಯಂದು ಕೊನೆಗೊಳ್ಳಲಿದ್ದು, ಅಂದು ಸಹಜವಾಗಿಯೇ ಲಕ್ಷಾಂತರ ಭಕ್ತರು ಸೇರುತ್ತಾರೆ. ಅದರ ಜತೆಗೆ ಜ.15 ರಂದು ಸಂಕ್ರಮಣ ಇರುವುದರಿಂದಲೂ ಲಕ್ಷಾಂತರ ಸಂಖ್ಯೆಯ ಭಕ್ತರು ಮಠಕ್ಕೆ ಆಗಮಿಸುವ ನಿರೀಕ್ಷೆ ಇದೆ.

ಶುಕ್ರವಾರ ಒಂದೇ ದಿನ ಬಿಡುವು, ಮತ್ತೆ ವಾರದ ಕೊನೆಯ ದಿನವಾದ ಶನಿವಾರ ಹಾಗೂ ಭಾನುವಾರ, ಅದರಲ್ಲೂ ಭಾನುವಾರ ಅಮಾವಾಸ್ಯೆ ಮತ್ತು ಗವಿಸಿದ್ಧೇಶ್ವರ ಜಾತ್ರಾಮಹೋತ್ಸವದ ಕೊನೆಯ ದಿನವಾಗಿರುವುದರಿಂದ ಸೇರುವ ಜನಸ್ತೋಮ ಊಹಿಸಲು ಸಾಧ್ಯವಿಲ್ಲ ಎನ್ನಲಾಗುತ್ತಿದೆ.

ಈ ಕುರಿತು ಪೊಲೀಸ್ ಇಲಾಖೆ ಈಗಾಗಲೇ ಪ್ರತ್ಯೇಕ ಸಭೆ ನಡೆಸಿದೆ. ಅಷ್ಟೇ ಅಲ್ಲ ಮಾರ್ಗ ಬದಲಾವಣೆ ಮಾಡಿ ಟ್ರಾಫಿಕ್ ನಿಯಂತ್ರಣ ಮಾಡಲು ಮುನ್ನೆಚ್ಚರಿಕೆ ಕ್ರಮ ವಹಿಸಿದೆ.

ಶ್ರೀಗಳೇ ಮಹಾದಾಸೋಹದಲ್ಲಿ ಸುತ್ತಾಡಿ ವಿಶೇಷ ದಿನಗಳ ಮತ್ತು ಜಾತ್ರೆಯ ಕೊನೆಯಲ್ಲಿ ಸೇರುವ ಭಾರಿ ಭಕ್ತ ಸಮೂಹಕ್ಕೆ ಪ್ರಸಾದ ವ್ಯವಸ್ಥೆ ಅಚ್ಚುಕಟ್ಟಾಗಿ ಆಗಬೇಕು ಎಂದು ಸಿದ್ಧತೆ ಪರಿಶೀಲಿಸಿದ್ದಾರೆ.