ಗೋವಾ- ಬೆಳಗಾವಿ ಅಂತಾರಾಜ್ಯ ರಸ್ತೆ ತುಂಬ ದೊಡ್ಡ ದೊಡ್ಡ ಹೊಂಡ!

ಜೋಯಿಡಾ: ಅಬ್ಬಾ ಇದೇನ್ರಿ, ರಸ್ತೆನಾ ಅಥವಾ ಹೊಂಡನಾ?, ಯಾಕಾದರೂ ಈ ರಸ್ತೆಯಲ್ಲಿ ವಾಹನ ತೆಗೆದುಕೊಂಡು ಬಂದೆವಪ್ಪಾ?...

ಬೆಳಗಾವಿಯಿಂದ ಬಂದ ಈ ರಸ್ತೆ ರಾಮನಗರ ಸಮೀಪಿಸುವಂತೆ ಕೆಸರುಗದ್ದೆಯಂತಾಗಿದೆ. ಅಸ್ತೋಲಿ ಸೇತುವೆ ಪೂರ್ಣಗೊಳ್ಳದ ಕಾರಣ ತಾತ್ಕಾಲಿಕ ರಸ್ತೆ ನೀರಿನ ಹಳ್ಳದಂತಾಗಿದ್ದು, ಯಾವ ಕಡೆ ಹೋಗಬೇಕೆಂಬುದೇ ತಿಳಿಯುವುದಿಲ್ಲ. ಇಲ್ಲಿ ಸಿಕ್ಕಿಕೊಂಡ ವಾಹನಗಳು ಹಿಂದೆ ಮುಂದೆ ಹೋಗಲಾರದೆ ದಿನವಿಡಿ ರಸ್ತೆ ಬಂದಾಗುತ್ತದೆ. ಕ್ರೇನ್ ತಂದು ದಾರಿ ಮಾಡಿಕೊಡಬೇಕಾಗುತ್ತದೆ. ಈ ವೇಳೆಗೆ ಎರಡು ಕಡೆ ಸಾವಿರ ಸಾವಿರ ವಾಹನಗಳು ಸೇರಿರುತ್ತವೆ. ಇಂಥ ಸ್ಥಿತಿಯ ಅಂತಾರಾಜ್ಯ ರಸ್ತೆ ಇದಾಗಿದೆ.

ಹೊಂಡಮಯ ರಸ್ತೆಯಿಂದಾಗಿ ಅಂತಾರಾಜ್ಯ ರಸ್ತೆ ಆದರೂ ಯಾರಿಗೂ ಬೇಡವಾದ ರಸ್ತೆ ಆಗಿದೆ. ತಾಲೂಕು ಆಡಳಿತದ ಹಿಡಿತವಿಲ್ಲ, ಉಸ್ತುವಾರಿ ಸಚಿವರು ಇತ್ತ ಲಕ್ಷ್ಯ ಹಾಕುತ್ತಿಲ್ಲ. ಸ್ಥಳೀಯರು ಕೂಗಿ ಕರೆದು ಧ್ವನಿ ಕಳೆದುಕೊಂಡಿದ್ದಾರೆ. ಜಿಲ್ಲಾಡಳಿತವಾದರೂ ಈ ರಸ್ತೆಯ ಬಗ್ಗೆ ಅಗತ್ಯ ಕ್ರಮ ಕೈಗೊಳ್ಳಬೇಕಾಗಿದೆ ಎನ್ನುವುದು ಜನಸಾಮಾನ್ಯರ ಆಗ್ರಹವಾಗಿದೆ.