ಚಂದಾವರ ಸೀಮೆ ಹನುಮನ ಮೂಲಮೂರ್ತಿ ಪ್ರತಿಷ್ಠಾಪನೆ

ಕುಮಟಾ: ಸೀಮೆದೇವರು ಚಂದಾವರದ ಹನುಮಂತ ದೇವರ ಪುನಃ ಪ್ರತಿಷ್ಠಾ ಕಾರ್ಯಕ್ರಮ ಮಾ. ೧೬ರಿಂದ ಆರಂಭಗೊಂಡಿದ್ದು, ಭಾನುವಾರ ಹನುಮಂತ ದೇವರ ಮೂಲ ಮೂರ್ತಿ ಪುನರ್ ಪ್ರತಿಷ್ಠೆ ವಿಧ್ಯುಕ್ತವಾಗಿ ನಡೆಯಿತು. ಸಹಸ್ರಾರು ಭಕ್ತಾದಿಗಳು ತಮ್ಮ ಆರಾಧ್ಯ ದೇವ ಹನುಮನ ಸುಂದರ ಮೂರ್ತಿಯನ್ನು ಮಂದಿರದ ಸಾಲಂಕೃತ ಪೀಠದಲ್ಲಿ ವಿರಾಜಮಾನಗೊಳ್ಳುವುದನ್ನು ಕಣ್ತುಂಬಿಕೊಂಡರು.

ಶಾಸಕ ದಿನಕರ ಶೆಟ್ಟಿ ಮಾತನಾಡಿ, ನಾಡಿನ ಸಂಸ್ಕೃತಿಯನ್ನು ಕಾಪಾಡುವ ಅಗತ್ಯವಿದೆ. ಹಾಲಕ್ಕಿ ಸಮಾಜದವರು ಸೇರಿ ಅನೇಕ ಸಮಾಜದವರು ಸೇವೆಯಲ್ಲಿ ಪಾಲ್ಗೊಳ್ಳುವ ಮೂಲಕ ಧರ್ಮವನ್ನು ಕಾಪಾಡಿಕೊಳ್ಳುವ ಕಾರ್ಯ ಮಾಡುತ್ತಿದ್ದಾರೆ. ಚಂದಾವರ ಸೀಮೆ ಹನುಮಂತ ದೇವರ ಟ್ರಸ್ಟ್ ಹಾಗೂ ಎಲ್ಲ ಭಕ್ತರ ಇಂತಹ ಮಹಾನ್ ಕಾರ್ಯಗಳು ಧರ್ಮರಕ್ಷಣೆಗೆ ಕಾರಣ ಎಂದರು.

ಭಾನುವಾರ ಪುನರ್ ಪ್ರತಿಷ್ಠಾಂಗ ಕಾರ್ಯಕ್ರಮಗಳು ಮುಂದುವರಿದು, ವೇ. ಕೃಷ್ಣ ಷಡಕ್ಷರಿಯ ಆಚಾರ್ಯತ್ವದಲ್ಲಿ ವೈದಿಕರು ಹೋಮಹವನಾದಿ ಧಾರ್ಮಿಕ ಕೈಂಕರ್ಯಗಳನ್ನು ನೆರವೇರಿಸಿದರು. ಮಧ್ಯಾಹ್ನ ನಡೆದ ಧರ್ಮಸಭೆಯಲ್ಲಿ ಶ್ರೀರಾಮ ಚರಿತ ಕುರಿತು ನಾರಾಯಣ ಯಾಜಿ ಸಾಲೆಬೈಲು ಪ್ರವಚನ ನೀಡಿದರು. ಕಾರ್ಯಕ್ರಮದುದ್ದಕ್ಕೂ ಪ್ರತಿನಿತ್ಯ ಸಾಂಸ್ಕೃತಿಕ ಕಾರ್ಯಕ್ರಮಗಳು ನಡೆಯುತ್ತಿದ್ದು ಭರತನಾಟ್ಯ, ಜಾನಪದ ನೃತ್ಯ, ಹಾಲಕ್ಕಿ ಜಾನಪದ, ಪಂ. ವೆಂಕಟೇಶ ಕುಮಾರ ಅವರಿಂದ ಸಂಗೀತ ಮತ್ತು ಭಜನೆ, ಹರಿದಾಸ ಡಿ.ಆರ್. ಹೆಗಡೆ ಅವರಿಂದ ಹರಿಕಥೆ, ಪುತ್ತೂರು ನರಸಿಂಹ ನಾಯಕ ತಂಡದಿಂದ ಭಜನೆ, ನಗರೆ ತಂಡದಿಂದ ಕೋಲಾಟ ಹಾಗೂ ಯಕ್ಷಗಾನ ಪ್ರದರ್ಶನಗಳು ನಡೆದವು.