ಸ್ಮಶಾನ ಭೂಮಿಗಾಗಿ ಹೇರೂರ್(ಬಿ) ಗ್ರಾಮಸ್ಥರ ಹೋರಾಟ

ಕನ್ನಡಪ್ರಭ ವಾರ್ತೆ ಕಲಬುರಗಿ

ಪ್ರತಿಭಟನೆಕಾರರು ಜಿಲ್ಲಾಧಿಕಾರಿಗಳ ಮೂಲಕ ಮುಖ್ಯಮಂತ್ರಿಗಳಿಗೆ ಮನವಿ ಪತ್ರ ಸಲ್ಲಿಸಿ, ಭೂಮಾಪನಾ ಇಲಾಖೆ ಹಾಗೂ ಕಂದಾಯ ಇಲಾಖೆಯ ಕೆಲವು ಅಧಿಕಾರಿಗಳಿಗೆ ಲಂಚ ಕೊಟ್ಟು ಅನಧಿಕೃತ ಹಿಸ್ಸಾ ಬದಲಾವಣೆಯ ದಾಖಲಾತಿಗಳನ್ನು ಸೃಷ್ಟಿಸಿ ಸುಮಾರು 9000ಕ್ಕಿಂತ ಹೆಚ್ಚು ಜನಸಂಖ್ಯೆಯುಳ್ಳ ಹೇರೂರ್(ಬಿ) ಗ್ರಾಮಸ್ಥರಿಗೆ ಶವ ಸಂಸ್ಕಾರ ಮಾಡಲು ಜಾಗ ಇಲ್ಲದಂತೆ ಮಾಡಿರುವ ರಾಜಶೇಖರ್ ತಂದೆ ಮಲ್ಲಿಕಾರ್ಜುನ್, ಪ್ರಕಾಶ್ ತಂದೆ ಮಲ್ಲಿಕಾರ್ಜುನ್, ಸತೀಶ್ ತಂದೆ ಮಲ್ಲಿಕಾರ್ಜುನ್ ಅವರ ವಿರುದ್ಧ ಕಾನೂನು ಕ್ರಮ ಜರುಗಿಸಬೇಕು ಎಂದು ಒತ್ತಾಯಿಸಿದರು.

ಅವರಿಗೆ ತಮ್ಮ ಬಳಕೆಗಾಗಿ ಖುಲ್ಲಾ ಜಮೀನು ಇಲ್ಲದಂತಾಗಿ ಪಕ್ಕದಲ್ಲಿಯೇ ಇರುವ ಒಂದು ಎಕರೆ 30 ಗುಂಟೆ ಜಮೀನು ಕಬಳಿಸುವ ಹುನ್ನಾರದಿಂದ ಸ್ಮಶಾನಭೂಮಿ ನಕಾಶೆಯನ್ನು ಬದಲಾಯಿಸಿ, ರಸ್ತೆ ಹಾಗೂ ನೀರಿನ ಟ್ಯಾಂಕ್ ಮತ್ತು ಗ್ರಾಮ ಲೆಕ್ಕಾಧಿಕಾರಿ ಕಚೇರಿ ಇರುವ ಸ್ಥಳದಲ್ಲಿ ತೋರಿಸಿ ಹಿಸ್ಸಾ ಬದಲಾವಣೆ ಮಾಡಿ 238/2 ಎಂದು ನಕಾಶೆ ತಯಾರಿಸಿ ತಮ್ಮ ಹೆಸರಿಗೆ ನಕಾಶೆ ಸ್ಮಶಾನಭೂಮಿ ಬರುವಂತೆ ಅನ್ಯಾಯ ಮಾಡಿದ್ದಾರೆ ಎಂದು ಅವರು ಆರೋಪಿಸಿದರು.

ತಹಸಿಲ್ದಾರರು ನಂತರ ಭೂಮಾಪನಾ ಇಲಾಖೆಯಿಂದ ಸರ್ವೆ ಮಾಡಿಸಿ ವರದಿ ಪಡೆದಿದ್ದಾರೆ. ಸದರಿ ವರದಿಯಲ್ಲಿ 238/1ರಲ್ಲಿ ಸ್ಮಶಾನಭೂಮಿ ಇದೆ ಎಂದು ತಾಲೂಕು ಭೂಮಾಪಕರು ನಕಾಶೆಯೊಂದಿಗೆ ವರದಿ ಕೊಟ್ಟಿದ್ದರೂ ಭೂಕಬಳಕೆದಾರರು ಶವ ಸಂಸಕಾರಕ್ಕೆ ಅವಕಾಶ ನೀಡುತ್ತಿಲ್ಲವೆಂದು ದೂರಿದ್ದಾರೆ.