ಬಹುಪಯೋಗಿ ಯಂತ್ರಕ್ಕೆ ಭಾರಿ ಡಿಮ್ಯಾಂಡ್‌

ಧಾರವಾಡ: ಈ ಬಹುಪಯೋಗಿ ಎಡೆ ಕುಂಟೆಗೆ ಮನಸೋಲದವರಿಲ್ಲ. ಈ ಒಂದೇ ಯಂತ್ರವು ಮೂವರ ಕೆಲಸ ಮಾಡುತ್ತದೆ. ಹಾಗಾಗಿ ಈ ಬಾರಿಯ ಕೃಷಿಮೇಳದಲ್ಲಿ ಈ ಎಡೆಕುಂಟೆಗೆ ಭಾರಿ ಡಿಮ್ಯಾಂಡ್‌ ಬಂದಿದೆ.

ಸಾಮಾನ್ಯವಾಗಿ ರೈತರು ಎತ್ತುಗಳಿಂದ ಒಂದು ದಿನಕ್ಕೆ 2 ರಿಂದ 3 ಎಕರೆ ಹೊಲ ಎಡೆ ಹೊಡೆಯುತ್ತಾರೆ. ಆದರೆ, ಈ ಯಂತ್ರದಿಂದ ಕೇವಲ ಒಂದೇ ಗಂಟೆಯಲ್ಲಿ 6 ಎಕರೆ ಜಮೀನನ್ನು ಎಡೆ ಹೊಡೆಯಬಹುದು. ಅಲ್ಲದೇ ಇದೇ ಅವಧಿಯಲ್ಲಿ ಗೊಬ್ಬರ, ಔಷಧಿ ಸಿಂಪಡಿಸಬಹುದು.

ಹಲವು ಪ್ರಶಸ್ತಿ: ಈ ಸಂಸ್ಥೆಯ ಮಾಲಿಕರಾದ ಡಿ.ಕೆ. ಲಕ್ಕಣ್ಣವರ ಅವರಿಗೆ 2016ರಲ್ಲಿ ಏಷಿಯಾನೆಟ್‌ ಸುವರ್ಣ ನ್ಯೂಸ್‌ ಹಾಗೂ ಕನ್ನಡಪ್ರಭದಿಂದ ಅಸಮಾನ್ಯ ಕನ್ನಡಿಗ ಪ್ರಶಸ್ತಿ, 2019ರಲ್ಲಿ ಸುಕೋ ಬ್ಯಾಂಕ್‌ ವತಿಯಿಂದ ಸುಕೃತ ಕೃಷಿ ತಂತ್ರಜ್ಞ ಪ್ರಶಸ್ತಿ ಪಡೆದಿದೆ. ಧಾರವಾಡದ ಕೃಷಿ ಮೇಳದಲ್ಲಿ 1997ರಲ್ಲಿ ಪ್ರಥಮ, 1998ರಲ್ಲಿ ದ್ವಿತೀಯ, 1999ರಿಂದ 2006ರ ವರೆಗೆ ಕೃಷಿ ಮೇಳದಲ್ಲಿ ಉಪಕರಣಗಳ ವಿಭಾಗದಲ್ಲಿ ಪ್ರಥಮ, 1998ರಲ್ಲಿ ರಾಯಚೂರಿನಲ್ಲಿ ನಡೆದ ಕೃಷಿಮೇಳದಲ್ಲಿ ಪ್ರಥಮ ಸ್ಥಾನ ಪಡೆದಿದೆ.

ನಮ್ಮಲ್ಲಿ ತಯಾರಿಸಲಾದ ಬಹುಪಯೋಗಿ ಎಡೆಕುಂಟೆಗೆ ಹೆಚ್ಚಿನ ಬೇಡಿಕೆಯಿದೆ. ರಾಜ್ಯಾದ್ಯಂತವಿರುವ ಪ್ರತಿ ಹಳ್ಳಿಹಳ್ಳಿಗಳಲ್ಲೂ ನಮ್ಮಲ್ಲಿ ತಯಾರಾದ ಕೃಷಿಯಂತ್ರೋಪಕರಣಗಳು ಕಾಣಸಿಗುತ್ತವೆ. ಮುಂದಿನ ದಿನಗಳಲ್ಲಿ ಇನ್ನೂ ಹೆಚ್ಚಿನ ರೀತಿ ರೈತಸ್ನೇಹಿ ಯಂತ್ರಗಳ ಆವಿಷ್ಕಾರ ಉದ್ದೇಶವಿದೆ ಎಂದು ಅರೇಕುರಹಟ್ಟಿಯ ಶ್ರೀನಿವಾಸ ಜನರಲ್ ಎಂಜಿನಿಯರಿಂಗ್ ವರ್ಕ್ಸ್‌ನ ಮಾಲಿಕ ಡಿ.ಕೆ. ಲಕ್ಕಣ್ಣವರ ಹೇಳಿದರು.