ನಿರ್ಲಕ್ಷ್ಯ ಮುಂದುವರಿದ್ರೆ ಪ್ರತ್ಯೇಕ ರಾಜ್ಯದ ಕೂಗು ಅನಿವಾರ್ಯ: ಶ್ರೀಶೈಲ ಶ್ರೀ

ಕನ್ನಡಪ್ರಭ ವಾರ್ತೆ ಬಾಗಲಕೋಟೆ

ನಗರದ ಜಿಲ್ಲಾಡಳಿತ ಭವನದ ಎದುರು ನಡೆದಿರುವ ಕೃಷ್ಣಾ ಮೇಲ್ದಂಡೆ ಯೋಜನೆಯ ರೈತರ ಹೋರಾಟದಲ್ಲಿ ಶ್ರೀಶೈಲ ಶಿವಾಚಾರ್ಯರು ಗುರುವಾರ ಭಾಗಿಯಾಗಿ ಮಾತನಾಡಿ, ಉತ್ತರ ಕರ್ನಾಟಕ ಅಭಿವೃದ್ಧಿ ಬಗ್ಗೆ ನಿರ್ಲಕ್ಷ್ಯ ಮಾಡಿ ವಿಳಂಬ ನೀತಿ ಅನುಸರಿಸಿದರೆ, ಆ ಭಾವನೆ ಸಹಜವಾಗಿ ಎಲ್ಲರ ಮನಸಿನಲ್ಲಿ ಏಳಲಿಕ್ಕೆ ಶುರುವಾಗುತ್ತದೆ ಎಂದರು.

ರಾಜ್ಯದ ಅಥವಾ ದೇಶದ ಯಾವುದೇ ಒಂದು ಯೋಜನೆ ಆದರೆ ಕಾಲಾವಧಿಯೊಳಗೆ ಪೂರ್ಣಗೊಂಡರೆ ಕಡಿಮೆ ವೆಚ್ಚದಲ್ಲಿ ಸಂಪನ್ನಗೊಳಿಸಬಹುದು. ಮುಂದೆ ನೋಡಿದರಾಯ್ತು ಅಂದ್ರೆ ಖರ್ಚು ಹೆಚ್ಚಾಗುತ್ತೆ. ಅದರಿಂದ ಬಾಧಿತರಾದವರ ನೋವು ಹೆಚ್ಚಾಗುತ್ತಾ ಹೋಗುತ್ತೆ ಎಂದರು.

ಹೀಗಾಗಿ ಸರ್ಕಾರಗಳು ದಕ್ಷಿಣ ಕರ್ನಾಟಕದ ಬಗ್ಗೆ ತೋರುವ ಒಲವು, ಉತ್ತರ ಕರ್ನಾಟಕಕ್ಕೂ ಕೊಡಬೇಕು. ದೇಶದ ಬೆನ್ನೆಲುಬು ರೈತ ಅಂತಾ ಬಾಯಿಯಲ್ಲಿ ಹೇಳುತ್ತೇವೆ. ಆದರೆ ರೈತನ ಸಲುವಾಗಿ ನಾವು ಏನು ಮಾಡುತ್ತೇವೆ? ಅಲಕ್ಷ್ಯ ಮಾಡ್ತೀವಿ, ಒಕ್ಕಲುತನ ಹಾಗೂ ರೈತರನ್ನ ನಿರ್ಲಕ್ಷ್ಯ ಮಾಡಿದರೆ ದೇಶ ಸಂಪದ್ಭರಿತವಾಗಲ್ಲ. ರೈತರಿಗೆ ನೋವಾಗುವ ಬಗ್ಗೆ ಸರ್ಕಾರ ಚಿಂತಿಸಿ, ಅವರ ನೋವು ನಿವಾರಿಸುವ ಕೆಲಸವನ್ನು ಸರ್ಕಾರ ಮಾಡಬೇಕು. ಪಕ್ಷಾತೀತವಾಗಿ ಶುರುವಾಗಿರುವ ಈ ಹೋರಾಟ ಸ್ವಾಗತಾರ್ಹ. ಸರ್ಕಾರ ಈ ಕಡೆಗೆ ತಕ್ಷಣ ಗಮನ ಕೊಡಬೇಕು. ವಿಳಂಬವಾದಂತೆ ರೈತರ ಪರಿಸ್ಥಿತಿ ಬಹಳಷ್ಟು ಶೋಚನೀಯ ಆಗುತ್ತೆ. ಕೆಲವರು ಹೊಲ, ಮನೆ ಇನ್ನೂ ಕೆಲವರು ಊರನ್ನೇ ಕಳದುಕೊಂಡಿದ್ದಾರೆ. ಹೀಗೆ ಅತಂತ್ರ ಸ್ಥಿತಿಯಲ್ಲಿ ಈ ಯೋಜನೆಯಡಿ ಸಿಲುಕಿವೆ. ಅತಂತ್ರ ಸ್ಥಿತಿಯಲ್ಲಿರುವ ರೈತನ ಪರಿಸ್ಥಿತಿ ದೇವರೇ ಬಲ್ಲ. ಈ ಎಲ್ಲ ಸಮಸ್ಯೆಗಳಿಗೆ ಪರಿಹಾರ ಸಿಗಬೇಕು ಅಂದ್ರೆ ಈ ಕೃಷ್ಣಾ ಮೇಲ್ದಂಡೆ ಯೋಜನೆಯನ್ನು ಎರಡ್ಮೂರು ವರ್ಷಗಳಲ್ಲಿ ಪೂರ್ಣಗೊಳಿಸಬೇಕು. ಹೀಗಾದ್ರೆ ಮಾತ್ರ ಉತ್ತರ ಕರ್ನಾಟಕದ ಪ್ರತ್ಯೇಕ ಕೂಗು ಕಡಿಮೆಯಾಗುತ್ತೆ ಎಂದರು.

ಪಕ್ಕದ ರಾಜ್ಯ ತೆಲಂಗಾಣ ನೀರಾವರಿ ಯೋಜನೆ ಬದ್ಧತೆಯ ಆದರ್ಶಗಳನ್ನು ನಾವು ಸ್ವಾಗತಿಸಬೇಕು. ನಮ್ಮ ಬಜೆಟ್ ಆ ರಾಜ್ಯದ ಬಜೆಟ್‌ಗಿಂತಲೂ ಹೆಚ್ಚಿದ್ದರೂ, ಈ ಯೋಜನೆ ಪೂರ್ಣಗೊಳ್ಳುತ್ತಿಲ್ಲ ಅಂದರೆ ಇಚ್ಛಾಶಕ್ತಿ ಕೊರತೆ ಕಾಣುತ್ತಿದೆ. ಈ ಭಾಗದ ಎಲ್ಲ ರೈತರು, ರಾಜಕೀಯ ಮುಖಂಡರು ಪಕ್ಷಾತೀತವಾಗಿ ಈ ಹೋರಾಟ ಮಾಡುತ್ತಿರುವುದು ಸ್ವಾಗತಾರ್ಹ. ಪಂಚಪೀಠಗಳ ಪರವಾಗಿ, ಶ್ರೀಶೈಲ ಜಗದ್ಗುರುಗಳು ಈ ಹೋರಾಟಕ್ಕೆ ಬಂದಿದ್ದೇವೆ. ಬರೀ ಬಾಹ್ಯ ಬೆಂಬಲ ಅಲ್ಲ, ನೀವು ಎಲ್ಲೇ ಕರೆದ್ರೂ ನಾವು ಬಂದು ಹೋರಾಟಕ್ಕೆ ಬೆಂಬಲ ಕೊಡುತ್ತೇವೆ. ಎಲ್ಲ ಪಂಚಪೀಠಗಳ ಜಗದ್ಗುರುಗಳು ನಿಮ್ಮ ಹೋರಾಟಕ್ಕೆ ಬೆಂಬಲ ಕೊಡುತ್ತೇವೆ. ಈ ಹೋರಾಟ ಯಶಸ್ವಿಯಾಗಲಿ ಎಂದು ಹಾರೈಸಿದ ಶ್ರೀಶೈಲ ಜಗದ್ಗುರುಗಳು ರೈತಪರವಾದ ಹೋರಾಟಕ್ಕೆ ನಮ್ಮ ಸಂಪೂರ್ಣ ಬೆಂಬಲವಿದೆ ಎಂದು ತಿಳಿಸಿದರು.