ಪಾಠ ಮಾಡಲು ಶಿಕ್ಷಕರೇ ಇಲ್ದಿದ್ರೆ ಛೊಲೋ ರಿಸಲ್ಟ್‌ ಹ್ಯಾಂಗ್ರೀ ಬರ್ತದ..!?

ಕನ್ನಡಪ್ರಭ ವಾರ್ತೆ ಯಾದಗಿರಿ

2024-25ನೇ ಸಾಲಿನ ಎಸ್ಸೆಸ್ಸೆಲ್ಸಿ ಫಲಿತಾಂಶದಲ್ಲಿ ಶೇ.60ಕ್ಕಿಂತ ಕಡಿಮೆ ಫಲಿತಾಂಶ ಪಡೆದಿರುವ ಸರ್ಕಾರಿ ಪ್ರೌಢಶಾಲೆಗಳಿಗೆ ನೋಟೀಸ್‌ ಜಾರಿ ಮಾಡಿ, ಮುಖ್ಯ ಶಿಕ್ಷಕರ ವಿರುದ್ಧ ಶಿಸ್ತುಕ್ರಮಕ್ಕೆ ಸೂಚಿಸಿರುವ ರಾಜ್ಯ ಸರ್ಕಾರದ ಶಿಕ್ಷಣ ಇಲಾಖೆಯ ಆದೇಶ ಎತ್ತಿಗೆ ಜ್ವರ ಬಂದರೆ ಎಮ್ಮೆಗೆ ಬರೆ ನೀಡಿದಂತಿದೆ. ಸಾವಿರಾರು ಶಿಕ್ಷಕರ ಕೊರತೆ, ಶಾಲೆಗಳಲ್ಲಿನ ಅವ್ಯವಸ್ಥೆಗಳ ಮಧ್ಯೆಯೂ ಉತ್ತಮ ಫಲಿತಾಂಶಕ್ಕೆ ಪ್ರಾಮಾಣಿಕವಾಗಿ ದುಡಿದ ಜಿಲ್ಲೆಯ ಶಿಕ್ಷಕರ ವಲಯಕ್ಕೆ ಇದು ಆಘಾತ ಮೂಡಿಸಿದೆ, ಅಸಮಾಧಾನ ಮೂಡಿಸಿದೆ. ಈ ಭಾಗದ ಶಿಕ್ಷಣ ಹದಗೆಡಲು ಶಿಕ್ಷಕರು ಕಾರಣರೇ ? ಅಥವಾ ಸೌಲಭ್ಯಗಳ ನೀಡದ ಸರ್ಕಾರವೇ ಅನ್ನೋ ಪ್ರಶ್ನೆಗಳು ಕೇಳಿ ಬರತೊಡಗಿವೆ. ಸರ್ಕಾರದ ಈ ಆದೇಶ ಅದೆಷ್ಟರ ಮಟ್ಟಿಗೆ ಸರಿ ? ಈ ಬಗ್ಗೆ ಶಿಕ್ಷಣ ತಜ್ಞರು ಏನಂತಾರೆ ? ತಮ್ಮದಲ್ಲದ ತಪ್ಪಿಗೆ ಶಿಕ್ಷೆ ಅನುಭವಿಸುವಂತಾಗಿರುವ ಶಿಕ್ಷಕರ ವಲಯದ ಪ್ರತಿಕ್ರಿಯೆ ಏನು ಎಂಬ ಮುಂತಾದ ಕುರಿತು ಗುರುವಾರ "ಕನ್ನಡಪ್ರಭ " ಕಚೇರಿಯಲ್ಲಿ ಏರ್ಪಡಿಸಿದ್ದ ಫೋನ್‌ ಇನ್‌ ನೇರ ಸಂವಾದ ಕಾರ್ಯಕ್ರಮದಲ್ಲಿ ಈ ಮೇಲಿನಂತೆ ಅಭಿಪ್ರಾಯಗಳು, ಸರ್ಕಾರದ ಆದೇಶದ ಬಗ್ಗೆ ನೋವಿನ ನುಡಿಗಳು ಮೂಡಿಬಂದವು.

ಯಾದಗಿರಿ ಜಿಲ್ಲೆಯ ಈ ಬಾರಿ ಫಲಿತಾಂಶದ ಕುರಿತು ಅಳೆದು ತೂಗಿ ನೋಡಿದರೆ ಸುಧಾರಣೆ ಕಂಡಿರುವುದರಲ್ಲಿ ಎರಡು ಮಾತಿಲ್ಲ. ಕಳೆದ ಬಾರಿಗಿಂತ (2023-24) ಸುಮಾರು ಶೇ.3 ರಷ್ಟು ಕಡಿಮೆ ಬಂದಿದೆ ಅನ್ನೋದು ದೊಡ್ಡದಲ್ಲ, ಈಗ ವಿವಿಧ ಗ್ರೇಡ್‌ಗಳಲ್ಲಿ ಉತ್ತೀರ್ಣರಾದವರ ಸಂಖ್ಯೆ ಹೆಚ್ಚಿರುವುದು ಮುಖ್ಯ ಎಂದು ಅಭಿಪ್ರಾಯ ತಿಳಿಸಿದ ಶಾಂತಗೌಡ ಪಾಟೀಲರು, ಸಾವಿರಾರು ಶಿಕ್ಷಕರ ಕೊರತೆಗಳ ಮಧ್ಯೆ ಇಂತಹ ಫಲಿತಾಂಶ ಶ್ಲಾಘನೀಯ ಎಂದರು.

ದ್ವಿತೀಯ ಪಿಯುಸಿ ಫಲಿತಾಂಶದ ಕುರಿತು ತಮ್ಮ ಅನುಭವ ಹಾಗೂ ಅಭಿಪ್ರಾಯವನ್ನು ಹಂಚಿಕೊಂಡ ನಿವೃತ್ತ ಉಪನಿರ್ದೇಶಕ (ಪದವಿ ಪೂರ್ವ ಶಿಕ್ಷಣ) ಚೆನ್ನಬಸಪ್ಪ ಕುಳಗೇರಿ ಅವರು, ಜಿಲ್ಲೆಯಲ್ಲಿ 23 ಸರ್ಕಾರಿ ಕಾಲೇಜುಗಳ ಪೈಕಿ 21 ರಲ್ಲಿ ಖಾಯಂ ಪ್ರಾಂಶುಪಾಲರು, 110ಕ್ಕೂ ಹೆಚ್ಚು ಉಪನ್ಯಾಸಕ ಹುದ್ದೆಗಳು ಖಾಲಿಯಿವೆ ಎಂದರು. ಸರ್ಕಾರ ಖಾಲಿ ಹುದ್ದೆಗಳನ್ನು ಭರ್ತಿ ಮಾಡುವ ತುರ್ತು ನಿರ್ಧಾರ ಕೈಗೊಳ್ಳಲಿ, ಹಾಗೆಯೇ, ಪಾಲಕರೂ ಕೂಡ ತಮ್ಮ ತಮ್ಮ ಮಕ್ಕಳ ಕಲಿಕೆಯ ಬಗ್ಗೆಯೂ ಕಾಲೇಜುಗಳಿಗೆ ಭೇಟಿ ನೀಡಿ ಪರಿಶೀಲಿಸುತ್ತಿರಬೇಕು ಎಂದ ಕುಳಗೇರಿ ಅವರು, ಶಾಲಾ-ಕಾಲೇಜುಗಳಲ್ಲಿನ ಇಂತಹ ಕೊರತೆ, ಅವ್ಯವಸ್ಥೆಗಳ ಕಾರಣಗಳಿಂದ ಇಲ್ಲಿನ ಪ್ರತಿಭೆಗಳು ಹೆಚ್ಚಿನ ವಿದ್ಯಾಭ್ಯಾಸಕ್ಕಾಗಿ ದಕ್ಷಿಣ ಕನ್ನಡ, ಬೆಂಗಳೂರು, ಮೈಸೂರು, ದಾವಣೆಗೆರೆ ಮುಂತಾದೆಡೆ ವಲಸೆ ಹೋಗುತ್ತಿದ್ದಾರೆ. ಇದು ನಮ್ಮ ಜಿಲ್ಲೆಗೆ ಬಹುದೊಡ್ಡ ಶಾಪವಾಗಿ ಪರಿಣಮಿಸಿದೆ ಎಂದು ನೋವು ವ್ಯಕ್ತಪಡಿಸಿದರು.

ಯಾದಗಿರಿ ಜಿಲ್ಲೆಯಲ್ಲಿ ಶಿಕ್ಷಣ ಕುಂಠಿತಕ್ಕೆ ಶಿಕ್ಷಕರ ಕೊರತೆ ಜೊತೆಗೆ, ನೂರೆಂಟು ಕೆಲಸಕ್ಕೆ ಶಿಕ್ಷಕರನ್ನು ಬಳಸಿಕೊಳ್ಳುತ್ತಿರುವುದು ಪ್ರಮುಖ ಕಾರಣ ಎಂದು ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ ಡಯಟ್‌ನ ನಿವೃತ್ತ ಉಪನ್ಯಾಸಕ ಬಿ. ವೆಂಕೋಬ, ಶಿಕ್ಷಕರನ್ನು ಮೊದಲು ಪಾಠ ಮಾಡಲು ಬಿಡಿ. ತರಬೇತಿ, ಎಲೆಕ್ಷನ್ನು, ಅದೂ, ಇದೂ, ಅಂತ ಎಲ್ಲ ಕೆಲಸಕ್ಕೆ ಸರ್ಕಾರ ಗಂಟೆಗಟ್ಟಲೇ ಬಳಸಿಕೊಂಡರೆ ಮಕ್ಕಳಿಗೆ ಯಾರು ಪಾಠ ಮಾಡಬೇಕು ಎಂದು ಪ್ರಶ್ನಿಸಿದರು.

ಪ್ರಾಥಮಿಕ ಶಿಕ್ಷಣದಲ್ಲಿ 3 ಸಾವಿರಕ್ಕೂ ಹೆಚ್ಚು ಶಿಕ್ಷಕರ ಕೊರತೆಯಿದೆ. ಇದರಿಂದ ಪ್ರಾಥಮಿಕ ಹಂತದಲ್ಲಿ ಮಕ್ಕಳ ಕಲಿಯುವಿಕೆಗೆ ಹಿಂದೇಟಿಗೆ ಪ್ರಮುಖ ಕಾರಣವಾಗಿದೆ. ಇರಲಿ, ಈ ಕೊರತೆಗಳ ಮಧ್ಯೆ ಪಾಠ ಮಾಡಬೇಕೆಂದರೆ ಸರ್ಕಾರದ ಅನೇಕ ಕೆಲಸ ಕಾರ್ಯಗಳಿಗೆ ಶಿಕ್ಷಕರ ಬಳಕೆ ಪೂರ್ಣ ಪ್ರಮಾಣದ ಕಲಿಕೆಗೆ ಅಡ್ಡಿಯಾಗುತ್ತಿದೆ ಎಂದು ಅಳಲು ವ್ಯಕ್ತಪಡಿಸಿದ ಸರ್ಕಾರ ಪ್ರಾಥಮಿಕ ಸಹ ಶಿಕ್ಷಕರ ಸಂಘದ ಜಿಲ್ಲಾಧ್ಯಕ್ಷ ರಾಘವೇಂದ್ರ ಅಳ್ಳೊಳ್ಳಿ, ತರಕಾರಿ ತರೋದು, ಅಡುಗೆ ಮೇಲ್ವಿಚಾರಣೆ ನಡೆಸೋದು, ಮೊಟ್ಟೆ- ಹಣ್ಣು ತರೋದು, ಹೀಗೆ ಒಂದಲ್ಲಾ ಎರಡಲ್ಲಾ ಎಲ್ಲದಕ್ಕೂ ನಮ್ಮನ್ನೇ ಜವಾಬ್ದಾರಿಯಾಗಿಸುವದರಿಂದ ಯಾವುದನ್ನು ಮಾಡಬೇಕು ಅನ್ನೋದೇ ಗೊಂದಲ ಮೂಡಿಸುತ್ತಿದೆ ಎಂದರು.